1 Koto* Mt 4:18; Mk 4:1* Mt 13:1-2; Mk 3:9-10; 4:1 mendepa Jisasame endaki Genesatete pete lemba dokonya katapala endakali longo dupame Gotenya pii doko salanya tuu tuu lao epeami-pyaa. 2 Dokopa* Mk 1:16,19 baame sipi lapoma endaki lemba dokonya siamo kandea-pyaa. Wapaka nyingi akali dupame sipi dolapo yakinatala wapaka nyingi mandi dupanya kuni pateamo dupa kaimbu pyao nepao kateami-pyaa. 3 Dokopa* Mk 4:1-2 Jisasame Saimonenya sipi dokonya pyakalyetala baa lamaiyoo, “Embame sipi tuu lanya endakinya kuki omosale pyasa!” lea-pyaa. Dokopa baame sipi dokonya katao endakali dupa mana lamaiya-pyaa.

4 Mana* Jo 21:3-8 lamaiyoo etapala baame Saimone lamaiyoo, “Nyakamame nyakamanya wapaka nyingi mandi dupa endaki lumu omosale pyandatala wapaka nyalapale mona, sipi dake tuu laa!” lea-pyaa. 5 Dopa* Lu 8:24,45; 9:33,49; 17:13 leamopa Saimoneme baanya pii yanu pyakamaiyoo, “Naimame kuka gii doko luu napaliuu wapaka kutawaka katao etete lekeleke tapala wapaka mende nanyalamanokana, Akali Andake, embame leenoli pyoo wapaka mandi dupa dee pyandatowana,” lea-pyaa. 6 Dokopa dokaitame Jisasame leamoli piaminopa wapaka etete longo mandinya ipao palea-pyaa. Dokopa mandi dupa lapyalanya pia-pyaa. 7 Dopa piamopa nyakamanya kalai awapa pyoo paenge akali sipi mendenya peteamino dupame, “Naima nisala ipupa!” lao kiango piami-pyaa. Dopa piaminopa akali dutupame ipupala sipi dolaponya wapaka mandipiaminopa sipi dolapo endakinya landa pyalanya pia-pyaa. 8-10 Dokopa* Eke 33:20; Mt 8:8* Mt 13:47; Mk 1:17,19; Jo 21:15-17 Saimonepi, akali Sepete ikiningi Saimone-pipa awapa kalai piambino Jemesapi Jonepi, dee endakali baa-pipa awapa kateamino dupa pitakapimi wapaka nyiamino doko kandatala pakame kumiami-pyaa. Dokopa Jisasame moko kateamo dosa Saimone Pitame tombauli sepala lao pituu, “Namba akali koo pingina, Kamongo, embame namba kayapala puu!” lea-pyaa. Dopa leamopa Jisasame Saimone lamaiyoo, “Emba paka nakayape! Indupa pituu tee pyao embame endakali dupa lete katena lao nyoo katatena,” lea-pyaa. 11 Dopa* Mt 19:27 lateamopa dokaitanya sipi dolapo pyalya lao nyoo endaki lemba kee dokonya setapala oapi dupa pitaka yakinatala baa watao peami-pyaa.

12 Jisasa* Lu 17:11-19 yuu taono mendenya kateamopa akali kopetalimi etete koyapae mendeme Jisasa kandatala baa kateamo dosa tombauli sepala dapa lao tee lea-pyaa: “Akali Andake, embame nambanya kopetali doko mee jakatoo lao maseteno kandao doko, kapa pao mee jakalapenona,” lea-pyaa. 13 Dopa lateamopa Jisasame akali doko kingimi watandatala lao pituu, “Nambame emba mee jipili lao masilyona, emba mee jaa!” lea-pyaa. Dopa lalu piamo gii dokopaka akali dokonya kopetali yaina doko mee jia-pyaa. 14 Mee* Lep 14:1-32; Mk 1:34; Lu 17:14 jeteamopa Jisasame akali doko kyoto joo lamaiyoo, “Embame dake endakali mendaipi mende etete lamaiya naenya, pitisa dokome emba kandena puu! Dopa petala emba mee jilino doko dokaitame kandena laitaka pyoo wamba Moseseme mana seteamoli pyoo opale mende Gote lao kundi maiyalena,” lea-pyaa. 15 Dopa* Mt 9:26; Lu 4:14,37 leamoaka doko, baanya kalai piamo dokonya pii doko tayamosa endakali kambu longo mendapuame Jisasanya pii doko sala ipao pituu nyakamanya yaina paleta dupa baame mee jekena lao ipata piami-pyaa. 16 Dokopa* Mk 1:35; Lu 3:21; 6:12; 9:18,28; 11:1 baame koteaka lao endakali napalenge yuu dupanya pao loma seta pingi-pyaa.

17 Koto* Mt 15:1; Mk 5:30; Lu 6:19 mende Jisasame endakali dupa mana lamaiyoo kateamopa Patasi mendapuapi mana setapae dupanya lao mana lenge akali mendapuapi dupa ipao peteami-pyaa. Dokaita Galili yuu dokonya taono wakale wakale dupanyapi yuu Jutiapi Jetusalemepi dupanya katao ipupala peteami-pyaa. Kamongo dokome baa pupu lasiamopa baame endakali yaina pyapae dupa kapa pao mee jakamaipenge jia-pyaa. 18 Dopa piamopa akali mendapuame akali papa tambotae mende lapa tokonya soo epeami-pyaa. Dokaitame akali doko soo Jisasa andaka kateamo tengesa dosa setamana lao masoo soo tuu lao kolandao makande piami-pyaa. 19 Makande piaminoaka doko, endakali longome tumbatae kateamino dokome andaka kolandapenge nanjia-pyaa. Dopa piamosa soo anda-ketae pyakalyetala anda doko tunguiyami-pyaa. Dopa petala baanya lapa toko doko kende katatala baa lapa toko doko-pipa endakali peteamino kaina dokonya Jisasanya enomba-kaita pyandeami-pyaa. 20 Dokopa* Mt 8:10; Lu 7:48 Jisasame dokaitanya masoo miningi dupa kandatala lao pituu, “Wane, embanya koo dupa kunanya nepekelyona,” lea-pyaa.

21 Pii* Ais 43:25; Lu 7:49 leamo doko sepala mana setapae masingi akalipi dee Patasipi dupame nyakamalapo lao pituu, “Gote ikimi koo dupa kapa pao kunanya nepakamaipenge jilyamona, akali dake apimi Gote kilya kandao lelya kanjemape?” leami-pyaa. 22 Dopa lelyamino lao Jisasame kandatala dokaita lamaiyoo, “Aipuma nyakamame moname dopa lao masilyamipi? 23 Anduku laa nayapengepe? Akali dakenya koo dupa kunanya nepakamailyona lapenge dokope, pande baa sakatatala kaita paena lapenge dokope? 24 Dopaka* Jo 5:8 doko, Endakalinya Ikiningi dokome isa yuu dakenya katao endakali dupanya koo dupa kunanya nepenge pupu lapae doko baa-kisa singi lamo lao kanjepalena,” lea-pyaa. Dopa latala baame akali papa tambotae doko lamaiyoo, “Emba sakata! Sakatatala embanya lapa toko doko nyoo soo andaka puu lelyona,” lea-pyaa. 25 Dopa leamo dokopaka akali dokome dokaitanya enombasa sakatatala baanya lapa toko doko nyepala soo baanya andaka pea-pyaa. Pao pituu Gote lao lalyema pea-pyaa. 26 Dopa* Lu 1:12; 2:20; Ap 19:17 piamopa endakali dupa pitaka walu lao mona andao paka kayapala Gote lao lalyoo pituu, “Indupa gii dakenya naimame angi waka mendapua kanjemanona,” leami-pyaa.

27 Dopa petala Jisasame kamaka pyakalyetala pao pituu muni takisa nyingi akali Lipai lenge mende takisa nyingi anda ongonya peteamo doko kandatala lamaiyoo, “Embame namba watao ipu!” lea-pyaa. 28 Dopa leamopa akali doko sakatatala baanya oapi dupa pitaka yakinatala Jisasa watao pea-pyaa.

29 Akali Lipai dokome baanya andaka Jisasanya nee longo yangakamaiyamopa takisa nyingi akalipi endakali wakapi longo dupa awapa dolapo-pipa nee nao peteami-pyaa. 30 Peteaminopa* Lu 15:1-2; 19:7 akali Patasipi dupanya mana setapae masingi akalipi dupame pii mumu longo lao Jisasanya disaipele dupa lamaiyoo, “Aipuma nyakama akali takisa nyingipi mana koo minao paenge endakali dupa-pipa neepi endakipi awapa nao pilyamipi?” leami-pyaa. 31 Dokopa Jisasame dokaitanya pii sepala yanu pyakamaiyoo, “Endakali yaina napingi dupa dokosaa katatasa pupenge nanjilyamo. Yaina pyapae dupa pupenge jilyamo. 32 Nambame* 1 Ti 1:15 endakali epe tolatae dupa mona kapilyina lao epena laanya naepeo. Endakali mana koo minao paenge dupa mona kapilyina lao epena laanya epeona,” lea-pyaa.

33 Dopa* Lu 7:18; 11:1; Jo 3:25 leamopa akali mendapuame baa lamaiyoo, “Akali Jonenya disaipele dupame yuu gii longole nee nanao loma seta pilyamino. Patasi dupanya disaipele dupame dopaka pingima. Dopaka doko, embanya disaipele dupame neepi endakipi dupa nawaka kalyaminona,” leami-pyaa. 34 Dokopa* Jo 3:29 Jisasame dokaita lamaiyoo, “Akali mendeme enda kelyapala watapae pyao baanya kaita miningi dupa-pipa awapa kalyamo gii dokopa, dokaitame nee nanena lao nyakamame kaita lyokapimilipi? Etete kapa pao kaita lyokala nayapimili! 35 Dopaka* Lu 9:22; 17:22 doko, yuu gii mende ipatamo dokopa enda kelenge akali doko dupanya kainanya nyokonyetatamopa dupame nee nanao katatamina,” lea-pyaa.

36 Dopa latala baame kongali pii mende dokaita lamaiyaka-pyaa: “Endakali mendaipi mendeme yonge pee enenge mendenya kanguoo nyepala yonge pee wambatae tii telya mendenya kii pimbala naenge. Baame dopa pitamo kandao doko, yonge pee enenge doko koyasetatamopa yonge pee wambatae doko enenge dokopa mendai dopaleaka nanjeta. 37 Dee endakali mendaipi mendeme waene enenge doko mena meme yanungimi penge wasepae wambatae dupanya kambuoo pisala naenge. Mendeme dopa pitamo kandao doko, waene enenge dokome bolo lapala penge doko polapala kai laa yuunya patamopa penge dupa apata koyataka. 38 Dopaka* Jo 3:19 doko, waene enenge doko penge enengenyaka pisepenge. 39 Dee* Jo 2:10 endakali mendeme waene wambatae doko nakande soo sepala waene enenge mende nawani nakaenge. Baame waene wambatae doko iki auu pipaena lenge daape!” Jisasame lea-pyaa.