1 Gamkel ho khun itih phat le nou anei jiuvem ti nahet em? sajuh ho gam lah a aso u khu namu khah tah em? 2 Lha ijat gai uvem ti nahet khah em? itih phat le soh diu ham ti nahet em? 3 Anou neina dingin tolla aboh mat jiuvin chule ason chu ahing doh jiuve. 4 Anou ho chu tollhanga akivah khang jiuvin chuti chun achennau adalhah teng ahung kinungle ji tapouve. 5 Gamlah sangan khu kon chamlhatna apeh a chule akihenna khao kon alhap peh ham? 6 Gamthip lah hi amaho umna dinga kapeh ahin achenna diuvin hamhing ke louna gam kepei. 7 Khopi sung husa atheinom pon chuleh ahohsal diu kangtalai tol jong aumpoi. 8 Molsang lah chu akivahnau mun ahin, hamhing don thah jouse ahol lelei. 9 Gamlah bongchal chu vahngoi din anop peh dem? Nagancha an koina huong sunga chun jan khat beh aum nadem? 10 Gam bong chu naloukhoi nalang konna chu nakhum theija nalou nakhoipeh ding hinam? 11 Athahat na chu eipente ti natahsan em? nadalhah a chule nana natoh peh ding chu natahsan em? 12 Nachang in langa po dinga nanganse ding ham? Chuleh na changphol a konna chang nahin pohpeh ding hinam? 13 Vangongchai jin alha ahin jap jin ahinlah nachakang toh tekah thei ahipoi. 14 Vangongchaijin atwi leiset chunga atha jin leivui khun akahlum dinga akoiji ahi. 15 Thilkhat touvin akengin chonkeh inte ahiloule gamsa khattouvin sumathah inte tijong agelpoi. 16 Anoute chunga jong a engse lheh jengin ama a hilou bang bangin athi diu jong khoh asapoi. 17 Ajeh chu Pathen in ama a konna chihna alahdoh peh a, thil hetkhen theina apehlou ahi. 18 Ahinlah itih phat hijongle lhai dinga ahung chopdoh phat phat uleh sakol lhaihat pen pen jong achunga toupa toh adalha tha jitai. 19 Sakol thahat khu nangin napeh hija ahiloule angonga amul bahkai khu nangin nakesah ham? 20 Khaokhopi kichop thei banga akichop theina khu nangin napeh ham? Anah khon gin khu tijat jat aum jenge. 21 Galsat dinga ahung kipatdoh tengle atin in leiset akhot in athahat in akipah jin ahi. 22 Chemjam masanga ajam pon, kichat kiti chu anuisat in chuleh kichatna aneipoi. 23 Thalchang amalam ngan aleng jeng jung in, chuleh tengcha leh tenglung aval lah lah jenge. 24 Lunghang tah in akengtin in tol akhot jal lah lah in chule kelngoi ki ahung kimut ging phat in galmun manon alhaikit jitai. 25 Saki kimut gin chun anah akhongin gamla tah a konin gal gimnam ajan, gal kisat gin thong leh captian pa thupeh ngah in akinuh nuh jenge. 26 Mu khu nangin nachihna a nahilla vanlama sangtah'a lengle le a chule alhaving teni khu lhanglam nga ajah ji ham? 27 Muvanlai sangtah'a alentouva chunglang peh a buh asah khu nangin nepeh ham? 28 Kolsong chunga achengin gamlatah songkuo hoa chenna in akiseme. 29 Hiche a konhin aneh ding sahing akihol in mitchim keuvin avelhi jingin ahi. 30 Anouten thisan achop chop un gancha thikam umna hiche munna chu ama namu ding ahi. ✡ Matt 24:28; Lk 17:37