1-2 C Yum, lojon c chumlibet cꞌʌlʌ ti oniyi.

Cheꞌ ñac max tyo a mele colem wits tyac,

Cheꞌ ñac max tyo a mele jini lum yicꞌot mulawil, Diosetyʌch.

Cꞌʌlʌ oniyix cꞌʌlʌ ti beleꞌ ora, Dioset.

3 Mi sajtyel quixtyañu, mi sujtyel ti tsꞌubejn cheꞌ maꞌ wʌcꞌ a tꞌan.

4 Lajal maꞌ qꞌuel jumpꞌej mil jabil cheꞌ bajcheꞌ jumpꞌej qꞌuin tsaꞌix bʌ ñumi.

Lajal bajcheꞌ chaꞌpꞌej uxpꞌej ora ti acꞌbʌlel.

5 Maꞌ pʌy majlel quixtyañujob cheꞌ bajcheꞌ ti butꞌjaꞌ.

Ajñumelob jach cheꞌ bajcheꞌ lojon c ñajal.

6 Lajalobʌch bajcheꞌ jam muꞌ bʌ i pasel cheꞌ mi sʌcꞌan.

Cheꞌ mi yicꞌan tsepbilix, tyʌquinix.

7 Como jisʌbiloñix lojon chaꞌan ti a michꞌlel.

Tsitsiñayon lojon ti bʌqꞌuen chaꞌan a michꞌlel.

8 Tsaꞌix a qꞌuelbeyon lojon c mul.

Tsaꞌix a tsictisʌ jini mucul bʌ lojon c mul chaꞌan a bajñel qꞌuel.

9 Jal mi ñumel j qꞌuin tyac chaꞌan michꞌet.

Mi ñumel lojon c jabilel ti ajacñʌyel chaꞌan ti wocol.

10 I ñajtyʌlel lojon c jabilel jiñʌch setenta.

Mi pꞌʌtyʌlon lojon, mi lojon c tyaj ochenta jabil.

Mi lojon c ñusan tyʌts tyac bʌ troñel yicꞌot wocol.

Mi jilel lojon c jabilel ti ora. Mi lojon c sajtyel.

11 ¿Majchqui miꞌ luꞌ cʌn i pꞌʌtyʌlel a michꞌlel?

¿Majchqui yujil i bʌcꞌñañet bajcheꞌ yom chaꞌan ti caj cabʌl a michꞌlel?

12 Cʌntisañon lojon chaꞌan mi lojon c ñaꞌtyan maꞌix jal wʌꞌ añon lojon ti mulawil

Chaꞌan mi lojon c pensalin bajcheꞌ yom mi lojon cajñel.

13 Laꞌ c Yum. Chaꞌ qꞌueleyon lojon ti yutslel a pusicꞌal.

¿Jaypꞌej tyo ora jintyo mi quej a chaꞌ pꞌuntyan a wajtroñelob?

14 Laꞌ jastiyicon lojon a wutslel ti jujumpꞌej sʌcꞌan.

Cheꞌ jini mux lojon c chaꞌlen cꞌay.

Cꞌajacña lojon coj ti beleꞌ qꞌuin cꞌʌlʌ mi lojon c ñoxꞌan.

15 Aqꞌueñon lojon i tijicñʌyel lojon c pusicꞌal cheꞌ bajcheꞌ cꞌamel ti a wʌqꞌueyon lojon c wocol.

Cheꞌ bajcheꞌ cꞌamel ti lojon cubi jini bʌbʌqꞌuen bʌ.

16 Pʌsbeñob a melbal a wajtroñelob.

Laꞌ tsictiyic a ñuclel tiꞌ tyojlel i yalobilob.

17 Laꞌ tsictiyic a cꞌotyajlel c Yum ti lojon c tyojlel.

Xucꞌchocoñon lojon ti jini troñel chʌncol bʌ lojon c mel.