1 Mi quejel c chꞌujutisan lac Yum ti beleꞌ ora.

Mi quejel c bej sub i ñuclel c Yum.

2 Ti pejtyel c pusicꞌal mic mulan c bej sub i ñuclel lac Yum.

Cꞌajacña i yoj mi quej i yubiñob jini pecꞌoꞌ bʌ i pusicꞌal.

3 Conla c sub i ñuclel lac Yum.

Laꞌ lac motin ñuc isʌben i cꞌabaꞌ.

4 Tic sajcʌ lac Yum. Ti yubiyon.

Tiꞌ lajmisʌbon pejtyel c bʌqꞌuen.

5 Lac Yum tiꞌ jacꞌbeyob jini quixtyañujob.

Tsiquil tiꞌ wutyob chaꞌan tijicñayob.

Machꞌan ti ajqꞌuiyob ti quisnil.

6 Cheꞌ ñac ti uqꞌuiyob jini pꞌumpꞌuñoꞌ bʌ

Lac Yum ti yubibeyob. Tiꞌ cotyʌyob loqꞌuel ti pejtyelel i wocol.

7 I yajtroñel Dios chꞌoyol bʌ ti panchan miꞌ joy mʌctyan jini muꞌ bʌ i qꞌuel ti ñuc lac Yum. Miꞌ cʌñʌtyañob.

8 Ñopola chaꞌan weñʌch lac Yum.

Ñaꞌtyanla chaꞌan cꞌajacña i yoj jini muꞌ bʌ i tyaj i cotyʌntyel ti lac Yum.

9 Qꞌuelela ti ñuc lac Yum, jatyetla i chaꞌañet bʌ la,

Como maꞌan chʌ bʌ tyo yom i chaꞌañob muꞌ bʌ i qꞌuelob ti ñuc lac Yum.

10 Jini yal bajlʌm mi yubin wiꞌñal.

Pero mach cheꞌic jini muꞌ bʌ i sajcan lac Yum.

Mi quej i tyaj pejtyel chʌ bʌ wen tyac.

11 Laꞌla, calobiletla, ubibeñonla c tꞌan.

Mi quej j cʌntisañetla bajcheꞌ yom laꞌ bʌcꞌñan lac Yum.

12 ¿Majchqui yom i jalejel wʌꞌ ti mulawil chaꞌan miꞌ tyaj

tijicña bʌ?

¿Mach ba jatyetyʌch?

13 Cʌñʌtyan a tiꞌ ame maꞌ wʌl chʌ bʌ mach wen.

Cʌñʌtyan a wacꞌ ame a chaꞌlen lot.

14 Cʌyʌ simaronlel, mele chʌ bʌ wen.

Jopꞌo a wajñel ti ñʌchꞌtyʌlel a pusicꞌal.

15 Lac Yum miꞌ qꞌuel jini tyojoꞌ bʌ.

Miꞌ ñʌchꞌtyʌben i yoración.

16 Pero mach yom i qꞌuel jini muꞌ bʌ i chaꞌleñob simaronlel.

Mi quej i jisañob chaꞌan machꞌan miꞌ chʌc ñaꞌtyʌntyelob ti mulawil.

17 Jini tyojoꞌ bʌ miꞌ cꞌajtin i cotyʌntyel ti lac Yum.

Mi yubiñob. Mi yʌcꞌ ti ñumel pejtyel i wocol.

18 Lʌcꞌʌl an lac Yum baꞌan jini chꞌʌjyemoꞌ bʌ.

Miꞌ cotyan jini ñoj chꞌʌjyemoꞌ bʌ chaꞌan ti caj chʌncol bʌ i pensaliñob i mul.

19 Miꞌ tyaj cabʌl wocol jini tyojoꞌ bʌ.

Pero lac Yum mi yʌcꞌ ti cojlel ti pejtyelel i wocol.

20 Miꞌ cʌñʌtyʌben pejtyel i bʌquel.

Machꞌan mi xujlel mi juntsꞌijtic.

21 Jini simaron bʌ mi quej i yubin cabʌl wocol

Jini muꞌ bʌ i tsꞌaꞌleñob jini tyoj bʌ mi quej i xotꞌob i mul.

22 Lac Yum mi quej i mʌñob loqꞌuel ti mulil i yajtoñelob chaꞌan mi yʌcꞌob ti cojlel,

Machꞌan mi quej i yʌjqꞌuelob ti xotꞌ mulil jini muꞌ bʌ i tyajob i cotyʌntyel ti lac Yum.