Ne ihkĩnte jũm kra krã kêanre, jũpar nare ata pê ri hũm me inxi mã amji kĩn nare ton catê.

2 Ne por mehhêj xi xà jàhkĩj kôt amji to me hakràj atajê, mã nee me hakryti xà nare.

Ne quêt catyt kam me ipa xà ata pê ri me hakryti me, mecaxwãm pê me carĩcti ton xà.

3 Ne Pahpãm pê Pahhiti ata nee hãn ne prãm te mempejti curan na me hamãr nare.

Ne mehkên catêjê te amji mã ampo na mehprãmti atajê ri, Pahpãm ma ame cupê intê, ne intête ame to jũa mã, mempejti atajê kĩnte.

4 Ne cute me xuwcacati atajê pê ri ampo hamreare.

Ne quêt me hàpên prãmti catêjê mã ri, ampeaj kam ampo mã me to hakràj.

5 Ne por jũm ampeaj kam amji kampa ata ri, hãn ne hàprà kẽhkẽn xàa jõ amcro na ihkẽhkẽ.

Mã hàprà kẽhkẽn xà jõ amcro kam hãn ne hõtxwaa to hõtxwa mã gõr ata ri, cama ihkĩnte amji na ihpahàm rẽ.

6 Pahpãm hãn ne ihcunea na mempejti catêjê to impej.

Ne mehkêanre catêjê ri mempejti kĩnte me harkwa pejti kam, cute amji kam me hapac xà jàprêhti itajê to me amxu.

7 Ne mempejti catêjê to, nee me hapac kêt xà nare.

Kĩntee mã ri mehkêanre catêjê to, ihtỳj me hapac kêt xà.

8 Me hũmre krã kreti atajê ri, ihtỳj me hakrya kam amji mã, cute me hapackre xà atajê incwa.

Kĩntee mã, quê ha jũmjê amji to mehkrã kreti pyrentu prãm atajê me amji jarẽn to:

“Wa ramã ite itajê impar jahkre pejtu” hajỹr na, quê ha taa ramã amjia pê, cute amji kam hapac xà caca to mõ.

9 Ne por jũm mã cute amji kam hapac xà impejti jahkre pejti ata, quê ha nee apu amji mã ampo cupa to hajỹr nare.

Kĩntee mã quê ha jũm apu ihhêj xi tomõ ata, quê ha ihtỳj ihkên mã me axà.

10 Quê ha jũm te ampo kên na jũm pupun, ne nee intête cumãn nare na, quêha ihtỳj jũm ata cama amji mã ihkên to ajcamẽ.

Ne quêt quê ha jũm ampo kên tête me cumãn kam incrà, quê ha cama mehkwỳ to impejti japên to ipa.

11 Ne por catyt kam me hũmre cakôc xà impejti ata, ihtỳj mehkwỳ te catyt kam me ipa na mehtehcajpa.

Kĩntee mã ri me hũmre cakôc xà kêanre atajê, cama mehkwỳ to kêanre to prãm to me ipa, ne cumã hàwxũn me, me to kên pit jahkre pej.

12 Me pancryc me, pahte me pahkwỳ curê me, pahte me ajpẽn par nare ita, ihtỳj me papijapu na me pahto.

Ne me pahte me ajpẽn kĩnti ata pê ri quêtpahte me pahkên cunea to me pajapac kêt xà.

13 Ne mehkrã kre cakôc xà atajê cunea kam ri quêt me pamã amji jahkre pej pit.

Ne mehcakôc xà krã kêanre atajê pê ri mehkĩnte cama mehkên mã me irẽn xà.

Ne mehkrã kêanre catêjê ri, mehkĩnte nee me harkwa kôt hakop nare kam, hãn ne me to ihcakôc to me ipa, ne toa amji mã mehpahàmti ton to me ipa.

Ne me cupê hamreare atajê ri, mehkĩnte hãn ne me cupêhamreare te amji kam hapac xàa to me amji kampa.

16 Ne mempejti jàpên xà atajêa, hãn ne me to ajcamẽ.

Ne mehkêanre atajê ri mehkĩnte, pom mam mehkên xà itajê jirôa pê, amji mã mehkên to me ajcamẽ.

17 Ne por ampo kên tête mehkwỳ mã, mã ahnaa me ampo jicu atajê, quê ha me hõ pry pejti kôt me ipa.

Ne por ampo tête me cumã, mã nee me hũparnare atajê, quê ha mehkĩnte me hõ pry cupa ne mehkên mã me acjêj.

18 Ne mehhêj xiti atajê ri hãn ne me harkwa hêj xia to mehkwỳ kam incryc to me amxu.

Ne hãn ne ampo kên na mehkwỳ jarẽn pa, ne amjia kôthãn ne me to cati to mencràn to ipa atajê ri mehkrã nare.

19 Ca ha acakôc xà to ihcupan to cati, ca ha amji mã akên xà to cati.

Nãmri ca ha ate akrã kre na, ca ha ma garkwa kên to acakôc na amjijamã, ne garkwa cakôc xà impej to pit mã acakôc to apa.

20 Ne mempejti cakôc xà kôt ihtỳj ampo pejti hapôj, ne cupê ihhêj rũm wakỳre prà pejti ata, necupê ahna hĩ jàhwỳrti ata pyràac.

Ne mehkên catêjê cakôc xà ri ihkĩnte ihkôt hamreare.

21 Ne mempejti cakôc xà ri me hàhtôa ne me to impej.

Ne mehkêanre catêjê cakôc xà ri mehkĩnte, ma mehtyc xà wỳr me to ipa.

22 Ne me Pahpãm tĩr rohnỳtti mã ata, ihtỳj caku cunea kam amã ate amji kam me gapac xà to ipicamẽn to ihcuhhê tu.

Ne jũ wỳr quê iràn xàna, ampo me amã acaca xà te hajỹr xà ita to.

23 Ne me hàprêhti atajê mã, me hàprê xà ata pê ihhêj rũm me hapactu xà, ne me cumã ihkĩn.

Jĩkjê na ri, mehkrã kreti atajê mã cute amji kam mehapac xà impejti atajê, mã hũrên ame hakry.

24 Mehkên catêjê mã ihtỳj ampo cupaa to hũpa, ne cumã hũpahti ata quê ha ihtỳj to hanea to, to hane.

Ne mempejti atajê ri quêt ihtỳjcute me amji kam hapac xà impejti na me hapôj.

25 Quê ha kôc pahtỳjti ajpên mõ ne cato, ne mehkên to hamre tu.

Ne quêt mempejti krã kreti atajê, quê ha ihtỳj amehcuhhê, quê ha neekôcti ata jũmjê atajê rẽn, ne me to ihtẽm nare.

26 Ca ha nee jũ caxuw ampo ton xà ata wỳr jũm te xuwcacati ata kujahêc nare.

Ampo na? He cute me hajỹr catêjê pê ihhêj rũm ampo cacô te me wa cahhêc xà, nare, me cupê ihhêj rũm me panto kam cuhy kũm, ne ihtỳj ihhahac.

27 Ne por jũm amji mã Pahpãm tĩr rohnỳtti mã cupahti ata mã, cute amji to ipijapar xà japjêa to hapjê.

Ne por mehkrã kêanre, ne nee amji mã Pahpãm cupa nare atajê, quê ha mehkĩnte, cute amji mã me to amcro hyr xà ata japyre mã me ty.

28 Ne por mempejti atajê ri ihtỳj cute me ampo pejti cwỳr xà atajê jikaj, ne ihtỳj hãn ne me cucwa.

Ne mehkên catêjê te nee me hajỹr nare, na quê ha nee jũ caxuw me ampo pyr nare.

29 Pahpãm tĩr rohnỳtti mã ata ihtỳj mempej pytà.

Ne mehkĩnte mehkên catêjê mã ihtỳj mehpahàmti gõ.

30 Ne por catyt kam me ipa atajê mã ri ihtỳj mehkrĩ xà.

Ne mehkĩnte mehkêanre atajê pê ri mehkrĩ xà hamreare, ne nee mehkrĩ kam mencrà xà hamreare.

31 Ne por mehkrã kre te amji jahkre pejti atajê mã ri, ihtỳj mehcakôc xà krã kreti to me hapackre xà.

Ne por mehkêan kam ampo kêanre to mehapackre to me ipa atajê, quê ha ihtỳj mehkên xà kêanre atajê mã me amji gõ.

32 Me hũmre krã kreti atajê, ihtỳj hãn ne mehcakôc xà kam me hapac prãmti atajê to, me cumã mehcakôc.

Ne mehkrã kêanre atajê ri ihkĩntecama me harkwa kêanre to mehkwỳ kên mã curẽ.