Yang Isinulat Ni Pablo Tung Ni FILEMON
Patkaw Ang Pasanag Tung Kumpurming Magbasa
Ti Filemon ang naang pinaeklan ni Pablo yang sulat ang naa sasa kang tumatalig ang manggaranen duun tung lansangan yang Colosas. Yang balay na, yay pagsaragpunan yang mga tumatalig ang sam pundaan duun. May sasang kirepen nang nag̱aranan tung ni Onesimo ang ya ray nanakaw tung anya (18) ang pagkatapus nagpatakras da. Atii kanay tung batas yang gubirnu, kung may kirepen ang manakaw tung ag̱alen na, dapat ang imatayen. Numanyan tung pagtakras ni Onesimo, nakaw̱ut da duun tung siudad yang Roma ang nagkatuun tung uras ang atiing ti Pablo nag̱aditini pa duun. Indi ta ilem maskean kung ya pa ag̱aring nagbag̱at tanira ni Pablo. Maskean ta ilem ang natetenged tung pagpasanag ni Pablo tung anya, ti Onesimo nagsuku ra yang sadili nang nagtalig tung ni Ginuung Jesu-Cristong nagpatapnay (10). Pagkatapus naglua rang durug katinaw̱angen tung ni Pablo. Purisu gustu rin ni Pablong awiran na, piru kumus anday gustu nang manlepes tung ni Filemon ang yay may kirepen, naisip nang mas matinlu ang ipabalik na ra ilem tung ag̱alen na (13-14). Purisu ya ra kay ipinagpasulat na yang sulat ang naa ug̱ud ingalukan na ti Filemon ang magpatawad da tung ni Onesimo. Iningaluk na ka tung anyang indi na ra ipabetang ti Onesimo ang sasang kirepen na ra ilem, kung indi, kaw̱ig̱en na ra kang sasang putul na natetenged pariu ra tanirang pagtalig tung ni Ginuung Jesu-Cristo.
Ang para maeklan ni Pablo yang isip ni Filemon ang para risibien na ra ti Onesimo, durug tinlu yang pametang-betang na ta bitala tung sulat ang naa. Baklu ra sambitay na yang aran yang kirepen ni Filemon (10), nagpasalamat da kanay tung Dios natetenged tung pagtalig ni Filemon may tung gegma na tung mga kaputulan ig pinanuntan na ka ta ipag̱ampu na para tung anya (4-7). Indi ra nagkalalangan tung anya sigun tung pagkaapustul na, kung indi, nagpakigkesen da ilem ta matinlu tung anya (8-10). Pagkatapus binadbaran na ra ta maayen yang isip ni Filemon ug̱ud kung may pagsangkelan na pa sigun tung tinakaw ni Onesimo tung anya, makuat da tung isip na (11-19). Pagkatapus yang gustu nang ingalukun tung ni Filemon, asan da ipapanaway na tung may kaministiran nang palinaynayan da ni Filemon yang isip nang aburidu natetenged tung ni Onesimo (20-21). Purisu unu duru unug dakul yang kumpiansa ni Pablo tung ni Filemon ang magpauyun da.
Yang sulat ang naa, nagkadengan ang ipinaekel na tung isinulat na tung sam pundaan duun tung Colosas. Ay ti Onesimo, ipinanunut na ra ilem tung ni Tikikong yay pinapag̱ekel na yang sulat ang atia (Colosas 4:9).
1
Yang Intrada Yang Sulat (1-3)
1-2 Yang nagpasulat yang sulat ang atia yuung ti Pablong sasang ditiniadu tani natetenged ilem tung pagkererengenu tung ni Jesu-Cristo. Yang sulat ang atia, pinaugtunan da ni Timoteong sasang putul ta. Ipinaekel da yamen tung nuyu, Filemon, ay yawa sasang nag̱amaal yamen ig sasa kang aruman yamen ang panirbian ka tung ni Jesu-Cristo, pati tung ni Apiang sasang kang putul tang baw̱ay* 1-2a Ti Apiang atia puiding kasawa ni Filemon. may tung ni Arquipo† 1-2b Ti Arquipong atia, puiding ana na Filemon, u kung belag, sasang pagpadag̱en-dag̱en tung sam pundaan duun tung Colosas. ang yay maning pa tung sasang masigkasundalu yamen, asta tung intirung sam pundaan ang pamagsaragpun-sagpun asan tung balay mu.
3 Yang nag̱ipag̱ampuu ang para tung numyung tanan asan, ang mas pang maispirinsiaan mi yang kaneeman yang Ama tang Dios durua ni Ginuu tang Jesu-Cristo ang pamagpadag̱en-dag̱en tung numyu ig mas pang ikasadya mi yang kaampiran mi tung nirang naang baklu.
Yang Pagpasalamat Ni Pablo Natetenged Tung Gegmang Nag̱ipaita Ni Filemon Tung Mga Masigkatumatalig Na (4-7)
4 Filemon, kada iampua yeen, nag̱apasalamatana yeen tung Dios ang yay panirbianu. 5 Ay kipurki may balitang nagngelu ang yawa unu paggegma tung tanan ang mga masigkatumatalig mung binuat da ka yang Dios ang mga tauan na ig pagpadayuna ka unu tung pagtaralig̱en mu tung ni Ginuung Jesus. 6 Yang nag̱ipag̱ampuu para tung nuyu, putulu, ang ekel tung pagpadayun mu tung pagtaralig̱en mu tung ni Ginuung Jesus ig ekel ka tung pagkamalamad mu tung tanan ang kaayenan ang ipinakdul yang Dios tung yaten ang mga tumatalig, mas pang paderepan mu yang pagpakignunut mu tung tanan ang mga taung binuat da ka yang Dios ang mga tauan na ug̱ud yay ikadengeg ni Jesu-Cristo. 7 Magkabag̱ay ang maning tia yang nag̱ipag̱ampuu para tung nuyu, putulu, ay pagkagngelu yang balitang atia, inampayanaw ra ta kasadyaanung duru ig asan da ka kumintel yang isipu natetenged ka man tung gegmang atiang nag̱ipagpaita mu tung mga kaputulan ta. Ay natetenged unu tung nuyu, putulu, namagkatinir da ka unu ta ketel yang mga isip yang mga kaarumanan mu asan ang binuat da ka yang Dios ang mga tauan na.
Yang Nag̱aingaluk Ni Pablo Tung Ni Filemon (8-11)
8 Intunsis simanyan, Filemon, may ipakigksenu rin tung nuyu. Sabag̱ay, anda kay dalenden yang isipung magkalalangan tung nuyu kung unu pay dapat ang buaten mu natetenged ka man tung katengdananung naa ang yuu sasang apustul ni Jesu-Cristo. Piru indiaw ra ilem magkalalangan tung nuyu. 9 Kung indi, magpakiksenaw ra ilem tung nuyu, ay nag̱askeanu ang yawa sasang maginegmaen. Ay yuung pagpakiksen bali tung nuyu, maepetaw ra, nag̱aditiniaw pa ngani tani natetenged tung pagkererengenu tung ni Jesu-Cristo. 10 Purisu may sasang gustuu rin ang ingalukun tung nuyu natetenged tung sasang taung nagyari rang maning pa tung sasang anaw. Ya ray nabtangan na natetenged pinainunukuanu kung ya pa ag̱aring magsuku yang sadili nang magtalig tung ni Ginuu tang Jesus ang magpatapnay. Anday dumang nag̱aaningu, ya ra ti Onesimo.‡ 10 Tung bitalang Giniriego, yang kinaulug̱an yang aran na ay “matinaw̱angen”. 11 Tung bag̱ay, nag̱askeanu ka ang yang tukaw midyu anda ka man ang pisan ay pakinaw̱ang mu tung anya. Piru simanyan dakulung taw̱ang na tung nuyu pati tung yeen, ya ka.
Yang Nag̱aingaluk Na Ang Ti Onesimo Risibien Da Ni Filemon (12-17)
12 Simanyan, maskin durug maal tung pagtelengu, atia ra, ipinabaliku ra tung nuyu. 13 Kung tung bag̱ay, naisipanu ra rin ang awiranu ra kanay ang para mag̱ing sali mung magtaw̱ang tung yeen tani, mintras naniaw pa nag̱aditini natetenged ka man ilem tung pagparakaw̱utunu yang Matinlung Balita natetenged tung ni Jesu-Cristo. 14 Piru mintras indi pa nag̱aingaluku tung nuyu, indiaw ka malelyag ang magpanadiliaw ra ilem ang mag̱awid tung anya, nusias yang taw̱ang mu tung yeen midyu tung yawa ra ilem ngaeklayu tung kareg̱esan. Yang gustuu, kung unu pay mataw̱ang mu tung yeen, elatanu ra ilem yang buluntad tung isip mu. 15 Indi ra ilem inawiranu ay naisipu ka ang muya may planu yang Dios tung anya ang magpablag da kanay ta gesyeng uras tung nuyu ug̱ud kung magbalik da ngani asan tung nuyu, magsapenanamu ra ang asta tung sampa. 16 Yang tukaw tanya sasang kirepen ilem. Piru simanyan belag da ilem kirepen, kung indi, sasa ra kang putul tang nag̱amaal ta. Kumus talagang durug kamaal tung yeen, kapin pa siguru tung nuyu, ay kipurki belag da ilem kirepen mu, kung indi, magputulamu ra ka natetenged tung pagtalig ming durua tung ni Ginuu ta. 17 Kapurisu, kung pag̱atelenganaw nuyung sasang putul mu tung ni Ginuung Jesus, risibien mu ra ti Onesimo ang katimbang nang ya ra ka tiang tinanguniu.
Yang Pangaku Ni Pablo (18-21)
18 Kung alimbawa may binuatan nang malain tung nuyu u kung may utang na, yuu ray mangaku tia. 19 Uay, atia ra yang yeen ang sadiling pirmaw. Yuuy kamatuuran ang magbayad tung nuyu, Pablo. Siguru anday ministir ang sambitenu pa tung nuyu yang utang mung kaneeman tung yeen§ 19 May utang ang kaneeman ni Filemon tung ni Pablo, ay ekel tung ni Pablong nagpaintindi tung anya, nagkatinir da ta baklung pagpangabui nang anday pagtapusan na ang ya ray ipinaeyang ni Jesu-Cristo tung anya. Kung ikumpalar pa tung utang ni Onesimo tung ni Filemon, indi mangikuy-ikuy.. 20 Purisu, putulu, maimu ilem, paitaay ka ta sasang pag̱alinaynayan ta isipu sigun tung putul tang atia arangan da ilem tung pagtaralig̱en tang naang durua tung ni Ginuu ta ang katulad ka tung pag̱abuat mu tung dumang mga putul tang mga tumatalig asan* 20 Katulad tung sinambit ni Pablo tung birsikulu 7.. 21 Napagsulataw ra tung nuyu, ungkuy, ay dakulu yang sarig̱u tung nuyu ang buaten mu yang nag̱aingalukung atia tung nuyu ig pasubraan mu pa nganing.
Pati Ti Pablo Simpanan Da Ka Ni Filemon Ang Risibien (22)
22 Kidispuis pa, ungkuy, may sam bilug pang ingalukunu tung nuyu. Katulad ka tung pagrisibi mu tung putul tang atia, simpanay ka ta kuartung madayunanu asan tung balay mu. Kipurki may nag̱ipagpakisew̱atu tung Dios ang ekel tung pag̱arampuen mi para tung yeen, basi pa ra ilem ang mapalpasanaw ra ang para liw̱ianuaw rang magbisita asan tung numyu.
Yang Pagtapusan Yang Sulat Na (23-25)
23 Ti Epapras† 23a Ti Epapras sasang putul ni Filemon tung ni Ginuung Jesus ang tag̱a Colosas ka ang yay nagpaliked yang Matinlung Balita duun atiing primiru. Asan da nga basaay ta tung Colosas 1:7; 4:12. ang sasang arumanu ang nag̱aditini ka tani natetenged ka tung pagkererengen na tung ni Jesu-Cristo‡ 23b Pariu ka tung ni Aristarcong sinambit ni Pablo tung Colosas 4:10., pagpakikumusta asan tung nuyu. 24 Asta na Marcos ni Aristarco ni Demas, ni Duktur Lucas ang yay mga katabyangu tung pagparakaw̱utun yang Matinlung Balita, pamagpakikumusta ka asan tung nuyu.
25 Yang nag̱ipag̱ampuu ang para tung numyung tanan asan ang mas pang maispirinsiaan mi yang kaneeman ni Ginuung Jesu-Cristong pagpadag̱en-dag̱en tung numyu.
Ya ra ilem tia ay sarang ang maaningu tung nuyu, ungkuy,
Pablo
*1:1-2 1-2a Ti Apiang atia puiding kasawa ni Filemon.
†1:1-2 1-2b Ti Arquipong atia, puiding ana na Filemon, u kung belag, sasang pagpadag̱en-dag̱en tung sam pundaan duun tung Colosas.
‡1:10 10 Tung bitalang Giniriego, yang kinaulug̱an yang aran na ay “matinaw̱angen”.
§1:19 19 May utang ang kaneeman ni Filemon tung ni Pablo, ay ekel tung ni Pablong nagpaintindi tung anya, nagkatinir da ta baklung pagpangabui nang anday pagtapusan na ang ya ray ipinaeyang ni Jesu-Cristo tung anya. Kung ikumpalar pa tung utang ni Onesimo tung ni Filemon, indi mangikuy-ikuy.
*1:20 20 Katulad tung sinambit ni Pablo tung birsikulu 7.
†1:23 23a Ti Epapras sasang putul ni Filemon tung ni Ginuung Jesus ang tag̱a Colosas ka ang yay nagpaliked yang Matinlung Balita duun atiing primiru. Asan da nga basaay ta tung Colosas 1:7; 4:12.
‡1:23 23b Pariu ka tung ni Aristarcong sinambit ni Pablo tung Colosas 4:10.