Ludi
Walo bagubagunana
Ludi edeededena iyawatagili toloinao bagubagunali ali sauga mena. Ludi iya Mowabe sinena na Yudiya tomona ikasolanan na saugana wainena ana sauga imwawasi kabo imulolo-panaisi lawana Naomi koina yo nuwanuwana lawana mekanakava silau Isileli dedeina yo tabe nuwanuwana Isileli ali Yaubada imeli koina.
Ana kaba mwawasi koina Ludi wainena waluwaluna ilobai lawana ana susu kalona mena. Bwaite iya kasolene koina ilaoma kanasiga kin Deibida iyawatagilima.
1
Elimileki me wainena yo natunao silau Mowabe
1-2 Sauga beyabeyana koina toloinao Isileli siloiloinayan kaiwena sauganane koina Isileli nige ali kin ipapagan. Guliyam lalakina silobai dedeinane bwaine koina, kabo tomo yabo esana Elimileki me wainena yo natunao tatao labui ali yanuwa Bedeliema Yudiya dedeina mena silogabaen na silau Mowabe dedeina mena simiyamiya. Wainena esana Naomi yo natunao esali Malona yo Kilion. Na Elimileki ana boda esana Epalati. 3-4 Kabo Elimileki ana sauga imwawasi, iboita. Mwa Naomi me natunao tatao labui sibomamo simiyamiya. Kabo muli mena Malona yo Kilion Mowabe sinesineoliyao sikasolanagili, yabo esana Opa yo yabo esana Ludi. Simiyamiya bwaine koina besiele bolime sanaulu, 5 kabo Malona yo Kilion ali sauga simwawasi, siboita. Kabo sinali Naomi, nige wainena yo nige natunao sipapagan.
Naomi ana vivila Bedeliema mekanakava Ludi
6 Sauga yabo mena Naomi wasa ibenalan yakato Yeoba ana tomoyao isaguili kaiwena masuli lalakina silobai. Kabo Naomi me lawanao Opa yo Ludi sikatububu na silau Yudiya. 7 Ali yanuwa silogabaen yo silalau kamwasa mena Yudiya kaiwena. 8 Kabo Naomi iwalolau lawanao kolili iba, “Kwavivila, kwalau ami yanuwa mena totoumiyao kolili. Walo yawasosi wainemiyao kwamulolo kolili yo tabe kwamulolo koliyau, na nuwana Yeoba kani imulolo kolimiu besiele. 9 Inamwanamwa tem Yeoba isaguimiu na wakasoleyoi na ami kaba miya ipagan na kwamiya namwanamwa ami yanuwa mena.”
Kabo muli mena lawanao isapwalili imuloloili yo mekanakavao sivalam. 10 Siwalo koina siba, “Nigele, mekamakava kowa talau am tomoyao kolili.” 11 Na Naomi iwalo lawanao kolili iba, “Lawaguwao kwavivila. Tawae kaiwena nuwanuwamiu muligu mena kwalaulau? Kwanuwatui yakato yau kani yakabiyoi na natuguwao wakasolanagili-yoi? 12 Kwavivila ami yanuwa mena, yau iyaele yabeluko, nige sowasowagu yakasoleyoi. Tem yawaloba yakato kani boniyai bwaite yakasole yo natuguwao sipagan, 13 gubesi, kani sowasowamiu kwasanasana kanasiga silalaki kabo wakasolanagili? Nigele, nige sowana kwamiya kwasikwasiki kwamiyamiya. Yagu nuwanae ilalakisosi kabo muli mena komiu ami nuwanae kaiwena Yeoba iboma iyakamkamna-yau.”
14 Mwa sivalam yoi, kabo Opa lawana isapwali yo mekanakava simulolo yo ivivila ana yanuwa mena, na Ludi lawana ikabi-kalatan, genuwana ilogabaen. 15 Kabo Naomi iwalo Ludi koina iwaloba, “Lawagu ugitai, Opa ivivila totounao yo ana yaubadao kolili. Kuvivila kulau mekamkava.” 16 Na Ludi iba, “Tabu kuwalo yalologabaegiwo. Yalaowa mekaukava kowa. Toweya kulau yau tabe kani yalau, toweya koina kumiyamiya yau koina yamiyamiya, totoumwaone totouguwao yo tabe am Yaubada yagu Yaubada. 17 Toweya koina kuboita yau kani yaboita, yo bwaine kani sipuluiyau. Tem ginauli yabo luwaluwalila mena ipei-suwalagila ee kabo Yeoba ana kawa-gula ilaoma koliyau.” 18 Saugana Naomi igitai Ludi nuwanuwasosina ilau mekanakava mwa nige walo yaboyoi iwawalowen koina.
19 Silalau ee kanasiga siyawatagili Bedeliema. Saugana siyawatagili yanuwane koina kabo tomo simiyamiya yanuwane koina kateli sipitali siyaliyaya kaiwena Naomi sigitai, kabo sinesineo sibomamo sienelineli-yagili, siwaloba, “Yawasosi bwaine Naomi?” 20 Kabo Naomi iwalolau kolili iba, “Tabu esagune kwayoyogayan Naomi, na kwawaloba Mala, kaiwena Yeoba Tomiyasaesosi yagu miyamiya isibayanaeyako. Naomi Ibeliu kainali mena kana bui ‘yaliyaliyayana’ yo Mala kana bui ‘nuwanuwanaena’ 21 Saugana yanuwa bwaite yalogabaen yagu boda ilalaki yo yagu gogo sibaibaiwasosi, na yagu sauga vivilama koina Yeoba ikalaiyauma menima bwagabwagagu yabubutuma molosi. Tawae kaiwena esagune Naomi kwayogayogayan, tem Yeoba Tomiyasaesosi yagu miyamiya isibayanaeyako yo meyagu nuwanae?”
22 Naomi ana vivilama dedeina Mowabe koina mekanakava lawana Ludi, Mowabe sinena edeededena bwaite. Bali* Bali siya Yudiya tobubutuma kali lalakina. Bali kanna kana koleya besiele laisi. Sigili yo beledi koina siginauli. Bali yo witi kali koleya yo ali paisowa kikiunamo sitoyatoyawa. Bali kana koleya besiele kawasi yo kana sae besiele tomo. Saugana tem kanna imatuwa kabo baline yaina sitom sitanoi yo sibwagili kaigedai. Sibwagili imwawasi yo situtu kabo patuna mekanakava dimwana sisalulu. Sauga muli mena bali dimwana sikalakalai. Tem yaumai ilotalu sigabaen mwayaga mena kabo yaumai dimwana iyui-kalai bali patunamo ibeku bwatano mena. Lolau ana dedei koina paisowana inamwanamwasosi. Dimwana sikele-gabaen kabo kannamo sikalai siyawatagili yanuwa mena. Muli mena kabo sikalai sigili yo beledi siginauli. kana sauga sepasepa iyatubu kabo Naomi yo lawana siyawatagili Bedeliema.
1:20 Naomi Ibeliu kainali mena kana bui ‘yaliyaliyayana’ yo Mala kana bui ‘nuwanuwanaena’
*1:22 Bali siya Yudiya tobubutuma kali lalakina. Bali kanna kana koleya besiele laisi. Sigili yo beledi koina siginauli. Bali yo witi kali koleya yo ali paisowa kikiunamo sitoyatoyawa. Bali kana koleya besiele kawasi yo kana sae besiele tomo. Saugana tem kanna imatuwa kabo baline yaina sitom sitanoi yo sibwagili kaigedai. Sibwagili imwawasi yo situtu kabo patuna mekanakava dimwana sisalulu. Sauga muli mena bali dimwana sikalakalai. Tem yaumai ilotalu sigabaen mwayaga mena kabo yaumai dimwana iyui-kalai bali patunamo ibeku bwatano mena. Lolau ana dedei koina paisowana inamwanamwasosi. Dimwana sikele-gabaen kabo kannamo sikalai siyawatagili yanuwa mena. Muli mena kabo sikalai sigili yo beledi siginauli.