PHILIPHITHEK
Shii Phaul Re-è Jigigam
Yaophi
Phaul ro Jigigam Philiphithek shii zey pha ji ne Masedonia du-ùa pha Roman European nyiak shii Phaul è igobi rab pha charch shii zey. Hì ne guaphasamoy phatheg hà um muii shii zey, chiih-è hì ne gai Masipho bliaphothek pha suang è awai shii diig phi mage pha ishak shii chiih-è Philiphi pha charch shii biidiie pha muyua ji è diig rey dun. Thuh de hì pha jigigam è lubo yi chiih-è Isu Masi shii Phaul ro jam migi ji è nyayao mua.
Jigigam Khthiie zey pha chiang ne Philiphi Masiphothek è airo chid pha ishak shii ithek è aishii nong phi pha lasen thoh ge pha chiang è laso phi. Ai è awai ro ishak shii khoh srane ithek izai rek yi, ji è ithek ne airo diigchiaothek shii nane awaithek ro wie shii lububo rek ne izai now yi. Ai è ithek shii munyua miiyang nane wiangwe shii phrai mua pha jum ziig ne Isu shii um bone khung. Ithek ro chai Masi rog shii um pha ji ne Hamangkhung-aphuii ro bushun lasen rone ai è ithek shii nowkhlei yi, Jewthek ro Iphey ji è mua pha asi pha nyie ji ne ithek è migi è muage ro. Ai è hanyie yi Masi rog shii ò sieng pha ji shii ne Hamangkhung-aphuii è lubo nane liijiing phi rone zey ro.
Hì pha jigigam ne lubo, luthong, ò jia nane zud ne Masipho migi nane chai shii chuh rek bone gang è cheb rek phi. Hì de Phaul è Philiphi pha charch shii jam è miie rey rone dong phi ro.
Iliing shii um pha ji
Yaophi (1:1-11)
Phaul awairo Ishak (1:12-26)
Masi shii chai (1:27; 2:18)
Thimothi nane Ephaphrodithus ro muphak (2:19-30)
Makphothek nane buiithek shii phriie (3:1; 4:9)
Phaul nane airo Philiphi pha ijakthek (4:10-20)
Jongsha (4:21-23)
1
1 1:1: Blk 16:12 Masi Isu ro khiaothek Phaul nane Thimothi re-è—Hamangkhung-aphuii ro branthek Philiphi shii rai pho hanyie yi Masi Isu rog shii ò rek pha, Charch pha dumuiithek lao ne chiih-è nongphothek shii de:
2 Hamangkhung-aphuii gathek ro Aphuii nane Ithong Isu Masi è nathek shii bushun nane liijiing phi bo.
Phaul è airo thampho shii sia
3 Gu idang ishak nathek shii now shii gu ne gui Hamangkhung-aphuii shii nathek chiang laso phi;
4 Chiih-è gu zab ishak nathek zab shii sia shii, gu ne lubo rog shii sia 5 nyieliieshii nathek è igobi è thuh thog pha mua pha blia shii nathek è gu shii nong phi ro. 6 Ji-è thuh gu ne thieg Hamangkhung-aphuii hanyie è hì pha wie blia ne nathek duchoi jao pha ji ne, Masi Isu pha Inai ajong sapho shii ne rek ne rai ruii phro. 7 Nathek ne idang gu lubu shii um ro! Chiih-è gu rek pha nathek chiang shii than pha ne gu shii khriig um bie ro. Chiih-è Hamangkhung-aphuii è gu shii phi pha jo shii thuh gu ne phatheg hà um shii chiih-è fuang hàne mua shii ragia rek pha nane chuh è rab shii de nathek zab ne mathang um ro. 8 Gu ne izai yao rone Hamangkhung-aphuii ne guro khagi ro, gu è nathek chiang guro jam than rone yao mage shii zab ne Masi Isu awai lubu è thog ruii phro.
9 Gu ne sia nathek ro miie ne ò rog shii izai khani nane isiie chua ne muna è muna rey ruii ne, 10 ji è nathek ne nyie yi zab è wie ji gua muii ruii phro. Chiihphado nathek ne gang rey ne the pha Masi ro inai è ichad rey ruii phro. 11 Hamangkhung-aphuii ro chiong nane biisiie chiang pha nathek ro chaithek ne wie pha ichuathek nyie yi Isu è rek mua bie pha ji è zan ro.
Sieng pha ne Masi ro
12 Gu nathek shii thieg yi pha yang ro, gu ijakthek, gu shii rey pha manathek ne izai mua shii ibi shii yi pha nong ro. 13 1:13: Blk 28:30Idohhè shii, zab saja ro hò pha arming nane zab gai ichiih um pha ji ne gu phatheg hà um rone thieg nyieliieshii gu ne Masi ro khiao ro. 14 Chiih-è gu phatheg hà um pha ji ne bajo migiphothek ne Ithong shii muna lububo rey dun, ji è ithek ne zab pha ishak shii mua ne arumdang pha yua* 1:14: mua giak jigi shii umHamangkhung-aphuii mua. pha lububo rey dun.
15 Zai ji ne ithek gai ne Masi ji yua nyieliieshii miegriie pha nane gui, jimagunde gai ne wie yang pha ji è rek. 16 Ji rek pha ji ne miie è ro, nyieliieshii ithek ne thieg Hamangkhung-aphuii è gu shii ne mua shii ragia rek pha blia phijong ro. 17 Gaithek ne Masi shii isiie è ayao ro, jimagunde munyua miiyang pha ragung è; gu phatheg hà ba shii ithek ne gu shii muna diig phi ruii pha rek.
18 Hì ne nyie miyao de oi ro! Masi ro yua pha ji shii ne asi pha now magunde si pha now magunde zab rey now pha jine athodang pha sang ro— Chiih-è gu ne idang sang ruii 19 nyieliieshii naro misiathek re-è chiih-è Isu Masi ro ragung è nyie nong gu shii rek pha ji è ichad rek phi ruii phro ne gu thieg ro. 20 Guro jam chid pha ji nane luthong ne guro blia shii gu ne khuchung de buyud arey yi pha, jimagunde idang pha ishak, chiih-è thuh shii, gu ne ley lububo rek chid, ji è guro zab pha blia shii guro chai shii sieng magunde iy magunde gu ne Masi shii biisiie rek chid. 21 Chiih-è guro chai ne nyie lei? Gu sieng pha ne Masi bey. Chiihphado, iy pha ji ne gu shii phua ro 22 Jishii athodang pha ji è sieng arone wie blia muna rek mua, chiihphado gu ne ayao mua gu ne nyie gua chid. 23 Gune ithua nyi shii ri. Gune hìpha chai thoh ne Masi rog shii muna sieng pha now ro, nyie yi zab è wie mana ro; 24 Jishii nathek chiang shii gu ne isieng rai pha mugak ba ro. 25 Gu ne hì nyayao mua, chiih-è ji è gu ne thieg gu ne rai. Nathek ro Migi shii lubo nane ibi rey pha ji shii pha chodo phi pha, gu ne nathek rog shii rai ruii ne, 26 Ji-è gu nathek rog shii dinne um mage shii, nathek shii nathek ro chai Masi rog shii um pha chiang shii gu chiang shii wiangwe ne muna rek pha chiang um phro.
27 Thuh, mugak pha mana ne hì ro nathek ro chai ne Masi ro mua duiine um chid, ji è dinne gu nathek shii riig pha awuii mua magunde, chiih-è jia chid pha ji shii nathek ne mua migi shii ò mak rek muii rone chiih-è nathek ne blia jia shii chuh è riu rone gu ne yoi ruii phro. 28 Nawaithek ro mak shii arum chid rabo; idang lububo rek bo, chiih-è hì ne khagi rek ruii phro ithek ne mua dun chiih-è nathek yang ruii phro, nyieliieshii hì ne Hamangkhung-aphuii è hanyie shii yang phi ruii phro. 29 Nathek shii ne Masi ro blia rek pha jo phijong ro, aishii migi rek bie pha ji asi ro, jishii ai chiang shii diigchiao zud rek pha phi phro. 30 1:30: Blk 16:19-40Thuh shii nathek de mak hà gu rog shii ichua nyayie mua phro. Igobi gu è mak rek pha ji nathek è doh pha mak ò ji ro, chiih-è nathek yoi pha gu thuh de mak rek ramuii pha jia ji ro.