JEMS
Ro Jigigam
Yaophi
Jems è jigigam ne “zab sohjambling pha Hamangkhung-aphuii ro bran ne dayiingdayang rey dun pha ji shii” inai nathek ro chai shii khi-èrek ne rai chid pha ji muyuagthek phi ne khrab srane zey ro, Zeypho ne miiriig ji è khoh srane khani blia nane Masipho ziig nane blia shii gayiig phi pha ji è doh yi ro. Masipho ro blia re-è ai ne wie pha miyao bukho nane dusho, chuajan, wie blia, miiriig-achiing, migi nane bliathek, ri shii kho ne, khani, guirai, wiangwe nane jum, gaithek shii chua, nyigodog, lubuphiang, nane misia hìthek zab shii Masipho ne nyie khi-èrek ne blia rek chid pha lei ne ai ne hìthek zab pha miyao shii yao ro.
Masipho giang shii nui shii, jigi ne migi rog bliathek rek phane miigak rone chuh rek phi ro.
Iliing shii um pha ji
Yaophi (1:1)
Migi nane Khani (1:2-8)
Dusho nane Nuruii (1:9-11)
Chai nane chuajan (1:12-18)
Yoi nane Rek (1:19-27)
Gidieg shii suang phriie (2:1-13)
Migi nane Bliathek (2:14-26)
Masipho nane airo ri (3:1-18)
Masipho nane Sohjambling (4:1—5:6)
Yoh yoh Muyuathek (5:7-20)
1
1 1:1: Mth 13:55; Mrg 6:3; Blk 15:13 Hamangkhung-aphuii nane Ithong Isu Masi ro khiao Jems re-è:
Zab pha Hamangkhung-aphuii ro bran sohjambling shii dayiingdayang rey dun pho shii salamthek yao ro.
Migi nane khani
2 Gu iijiiakthek, nathek lumuii shii zab pha chuajan thog ruii shii nawaithek shii sang bo, 3 chiih-è nawaithek ne thieg nathek ro migi ye chuathek shii yang mage shii, chiih-è gu shii ne zud mua pha blu mua ruii phro. 4 Nathek ne zai rek boh nathek ro zud ji è ne nathek ro zab lumuii shii buyud arey yie rabo, ji è nathek ne khriig chiih-è zab rey ne, nyie de asiog pha arey yi rabo, 5 Jishii nathek è hanyie magunde khani shii asiog arone, hanyie è nathek shii phi ruii pha, nathek ne Hamangkhung-aphuii shii sia bo, nyieliieshii Hamangkhung-aphuii è nathek zab shii lubu hong ne chiih-è bushun rek ne phi ro. 6 Jishii nathek sia mage shii, nathek ne migi rek ne anowdak rabo. Hanyie magunde nowdak arone hasam è khamuii pha khasao shii thedan thadan pha duiine ro. 7-8 Jiduii pha bran arone nathek ro khani shii arab mua chiih-è nathek è rek pha zab shii aphak mua, nathek ne Ithong è nyie magunde mua ruii phro ne anow chid rabo.
Dusho nane bukhothek
9 Hanyie dusho Masiphothek shii Hamangkhung-aphuii è ithek shii lakhung chiing mage shii sang bo, 10 1:10,11: Aij 40:6,7 (LXX) chiih-è Hamangkhung-aphuii è bukho Masiphothek shii buzam yi mage shii sang bo. Chiih-è bukhothek ne jabiing pha iibua duiine san dun phro. 11 Hasiang yi bajo chieg rek mage shii misieng ne hùb dun phro; ji pha iibua ne thud dun phro, chiih-è khie ne mua dun phro. Ji duiine bukhothek ne awaithek chong hà wuii shii mua dun phro.
Chai nane chuajan
12 Hanyie yi chujan shii isiie rek ne rai ithek ne sang phro, nyieliieshii ithek yi chuajan shii yang ne hiia mage shii, Hamangkhung-aphuii è aishii miie muii pha ji shii nyie sbang rek muii pha chai ne lasen duiine choi ruii phro. 13 Branthek chuajan pha ji shii chai mua arone, gethek ne ayao rabo, “hìpha chaujan ne Hamangkhung-aphuii è thog rone ayao rabo.” Nyieliieshii Hamangkhung-aphuii shii ne awie pha ji è achai mua, chiih-è ai ne hanyie shii achai phro. 14 Jishii gethek ro awie pha ji shii chid pha ji è ibong hà phang mage shii gethek shii ne chuajan dun. 15 Chiihphado gethek ro awie pha chidthek wiig pha ji è layog giak ruii phro; chiih-è layog, ji weg rey mage shii, iy pha ji giak ruii phro.
16 Gu khuiinothek nane bumuiithek, akhin-arin yi rabo! 17 Zab wie lasen nane zab khriig ne hamangkhung è thog ro; hìne Hamangkhung-aphuii è thazam thog ro, hamangkhung pha muchuangthek shii rabpho, hanyie ne alai chiih-è igiia shii iidoh ayie ro. 18 Ai awai è yang pha ji è gethek shii izai pha miyaogam ji è chai phi ro, ji-è gethek shii ne zab ai è rab pha duchoi igobi pha ithua shii rai mua yi ro.
Yoi ne rek
19 Hì nowkhlei bo, Gu khuiinothek nane bumuiithek! Zabjia ne khthiie yoi bo, Jishii rasie è yao chiih-è rasie è lijieg bo. 20 Bran ro lijieg ne Hamangkhung-aphuii ro giangthek phak shii zab arek mua phro. 21 Ji-è zab awie pha lajia nane buii rek pha ji shii thoh muii bo. Hamangkhung-aphuii shii phi srane nathek lubu shii hai pha miyaogam jishii choi bo, nyie yi na shii ragia rek mua ro.
22 Airo miyaogam yoi bie pha ji è akhin-arin yi rabo; ji phachiang shii, miyaogam shii nyie yao pha ji rek ne rai bo. 23 Na è miyaogam yoi srane jishii ji duiine blia arek arone bran hanyie è awai mizia shii jangbang hà riig ai ne ji è mia rone riig pha duiine ro. 24 Ai ne awaithek shii wie rone riig chiihphado dundun chiih-è awai ne nyie khi è mia pha jine blengdun. 25 Jishii bran shii ichad rek phi khriig Iphey ji shii wie è riig pho ne, chiih-è thaluii arek bie pha chiih-è chiihphado abia pha jishii blia rek ne rai pho ne—nathek è nyie rek pha ji re-è Hamangkhung-aphuii è nathek shii khirzey phi phro.
26 Hanyie magunde nathek ne giang rone now bey? Nathek yi nawaithek ro ri shii azud arone, nathek ro giang ne adunmey chiih-è nawai shii khinrin ara ro. 27 Aphuii Hamangkhung-aphuii è igang nane zai giang rone now pha jine hì ro: Dusho nane misiungthek ro diig shii wie gayiig ne chiih-è nawaithek shii sohjambling shii è buii pha ji è ruang rek bo.