Ibrawi Ashuwots Maants Wosheets Wosho
Kindo
Woshan b́ guut'e mang wotts k'efo boats b́ bodtsosh bo imnetiyo k'azosh t'ints krstiyaniyotssha b́ tesh, guut'tsonwere Ibrawino eteefwotsitsi amantsuwotssh b́ kitsirwo Iyesus Krstos arkonat s'uwaatsi Ik'o b́ bek'shtso b́ wotoniye. Krstiyani hanots bo imnetiyon bo kup'itwok'o boon b́ kup'shiri, hanowere b́ k'alor arik wotts keez keewwotsi bogshdek't b́ kitsir.
1. Bo ats bodts gond bek'man jangosh Nihosh arikon azazets wottso Iyesus dúre dúriko Ik' na'oniye, Ik' na'a b́ wottsotse Taari natotse teshts nebiyiwotsna, Musenat Woshetswotsiyere ayidek't boogke.
2. Iyesus nat taarotsi Kahaniyotsiyere ayidek't een wotts dúre dúri Kahani k'aab b́ wottsok'o Ik'o b́ tookon keewre.
3. Iyesus weeron amantso morrotse, k'ironat shatotse kashitwe, Iyesus Kahani naasho b́ wottsotse Ibrawino eteef ashuwots imnetiyo niwwotsnat gizi wosho c'ishok'o be'eyiru kasho arik b́ wotitwok'o k'alre.
Han guut'tso Israe'el taarikiyotse shúúts een detsts ashuwots imnetiyo ariyok'o woshdek't (k'ot'ok 11) nababirwots bo imnetiyon bo kup'itwok'o b́ gawiyiri, mank'o k'ot'ok 12 nababirwots bo ááwwotsi Iyesusats woshde'r bo imnetiyon bo kup'itwok'onat kon naari gond bek'onat kic'o bo ats b́ bodal bok'amitwok'o b́ iziri, s'uwaatsnowere izonat ats kordek'i keewo bí imiyakon b́keewo need'ib́k'ri.
Jamon mas'aafan b́detstso
Kindo, Ik'o Krstosn b́ be'etsok'o 1:1-3
Krstos Wosh na'oniyere damb b́ wotok'o 1:4—2:18
Krstos Musenat Iyasuwiyere damb b́ wotok'o 3:1—4:13
Jami abaatse Krstos Kahani b́ woto 4:14—7:28
Krstos taaro jamoniyere damb b́ woto 8:1—9:22
Krstos wosh woto bog b́wottsok'o 9:23—10:39
Imneti bogo 11:1—12:29
Ik' geneúsho 13:1-19
Gúúpi Ik' k'ono 13:20-21
B́ s'uwoko 13:22-25
1
Ik'o b́naay weeron noosh b́keewtsok'o
1 Ik'o yoots dúr ay weerindon, nebiyiwots weeron nonih nih wotssh ayoto keewtni b́ teshi, 2 Andomó dúr s'uwanatse jam keewo b́ naatetwok'o b́ woshtson b́ naay weeron noosh keewre, dats jamonowere bíne bí'azi. 3 Ik'i mango golr b́be'et bíyatsne, bí b́ doyon b́ s'eenon Ik'onton ike. B́ kúp' aap'on azeets jamo tep'dek't kurirwee, ash ashuwots morro b́ s'ayintsiyakon darotse Ik' kup'o k'ani aaromants beewtsere.
Naay wotts Ik'o b́melakiyotsiyere ayidek't bog b́wottsok'o
4 1:4 Dub. 2:7; 2 Sam. 7:14; 1 Naash. 17:13 Eshe bísh imets shúútso melakiwotssh imets shúútsoniyere bogtso b́ wottsok'oon Ik'o naay, melakiwotsiyere ayidek't boge.
5 B́ jamon melakiwotsitse,
«Neehe t naay neene, hambets taa neen shuure,»
Wee
«Taa bísh nih wotitwe, bíwere t naayi wotituwe»
bí ettso konshe?
6 1:6 Iwi. 32:43 Ik'o b́ naay k'aabo datsanats b́woshor
«Melaki jamwots bísh sagadone» etre.
7 1:7 Dub. 104:4 B́ melakiwots jangoshmó
«B́ melakiwotsi shayirwotsi* 1:7 Shayira: Eto Griki mas'aafotse jongok'o woshefe etiru biitso detsfe.
B́ gutswotsno taw laluwo woshitwee» bí eti.† 1:7 Shayra: Eto b́melakitsi jongok'o woshitwe eta.
8 B́ naayi jangoshmó,
«Ik'ono! n naashi jooro dúre dúroshe b́ beeti,
N mengsti gumbonu kááwon bín nk'eezit gumbee,
9 1:8-9 Dub. 45:6-7 Kááwu finono n shuni, morri gondo n shit'i,
Manatse tuutson Ik'o neen,
n tohwotsiyere bog gene'úwo neesh imet fuuto níats b́ fuuti» etfe.
10 Andowere aani, «Doonzono! nee shin shino datsu nk'oons'i,
Darwotswere nkishi finnee,
11 Bo jametswere t'afitkne,
Neemó beetune,
Bo jametswere tahok'o s'uwitkne
12 1:10-12 Dub. 102:25-27 Shemok'o boon k'odetune,
Bowere tahok'o wonetúnee,
Nemó jam aawo woneratsnee,
N dúronwere s'uwo deshatse» bíeti
13 1:13 Dub. 110:1 Ik'o b́ melakiwotsitse,
«N balangarwotsi n tufi shirots t gedfetso
t k'ano maantsan beewe» bí et konshe?
14 Bere, melaki jamwots kashit ash ashuwotssh finosh wosheets Ik'i guuts wotts shayirwotsi woteratsnowa?