1 Ri vaveru lobo a maka tabekena malala, lakea e Iosua i gale palupu a kabu ne Reuben, a kabu ne Gad, a kalavana a kabu ne Manase, 2  * Gi 32:20-32; Ios 1:12-15i taki ria, i ta maea, “Mu rata lobo pali a maki e Moses a vora ne BAKOVI DAGI i vakuku mua vona mu gu rata. Mu ramai lobo a maka nitagu. 3 Na parava lobo mu tuhori e huriki a turane mua. I uka tara parava mu gu ha taro ria. Mu ramai kamumu a maka nitane BAKOVI DAGI a Vure ne hita. 4 Ngane, e BAKOVI DAGI a Vure ne hita i habi a nivalemu ne huriki a turane mua, i manga hosi i ta muholi ne ria. I mavonga mu hamule mai a tanga ne mua, na tabeke ne Iordan, hosi e Moses a vora ne BAKOVI DAGI i habi ne mua. 5 Mu mata kamumu mu ramai a nivakuku, a vinara ne Moses a vora ne BAKOVI DAGI i habi ne mua. Mu ngarua e BAKOVI DAGI, a Vure ne mua. Mu ramai a naro lobo vona, mu longototo a vinara vona, mu pesi tora turana, mu rata a leho vona na hatene mua, na nitora lobo ne mua.” 6 Lakea e Iosua i nanea e BAKOVI DAGI ge gamai ria, muri i rudu mule ria na tanga ne ria.

7 E Moses i habi na kalavana kabu ne Manase a malala na tabeke ne Basan, pali e Iosua i habi tabu na kalavana kabu ne Manase, turana a kabu ranga ne Israel, a malala na tabeke na nirolona haro ne Iordan. Na tahuna e Iosua i rudu e huriki nga ri hamule na tanga ne ria na tabeke ne Iordan tara, i nana e BAKOVI DAGI ge rata kamumu ria. 8 Lakea i ta maea, “Mu tahoka a maka bulmakau, a silva, a gol, a bras, a aen, a maka varakia mu radi ne huriki a pile. Mu hamule na tanga mua, mu habi ne huriki a viri mua.”

9 Lakea e huriki a bakovi na kabu ne Reuben, ne Gad, a kalavana kabu ne Manase ri laho hamule mai a tanga ne ria. Ri pe mule e huriki a Israel ranga na tanga e Silo o Kenan, ri hamule lakea na tabeke ne Gilead, na malala ne ria. Ri bolea a malala iea, i manga a ngava e BAKOVI DAGI i taki e Moses vona.

10 Re huriki nga, i uka ma ri pe mulea ma a malala e Kenan, ri vano ri bele na malala tabukoi na dahana naru e Iordan, ri vakapesia vonga a dede-kedo dagi tabukoi na naru. 11 I ranga Israel ri vano ri taki e huriki a turane ria, ri ta maea, “A kabu ne Reuben, ne Gad, a kalavana kabu ne Manase ri ratea a dede-kedo na dahana naru e Iordan, na tabeke ne hita.” 12 Ri longoa a ngava iea, lakea ri vano ri vapopo na tanga e Silo, ri kisi puru a maki na vabinga, ri gi vaubi turana a kabu nga i tolu.

13 E huriki a Israel ri rudua e Pinias e tune Eleasar a prister, i lakea na kabu ne Reuben e Gad, a kalavana a kabu ne Manase na tanga e Gilead. 14 A matakari i ravulu ri vano turana. Ra matakari nga ne Israel, ri matakaria a kabu takutaku ne ria. 15 Ri vano ri bele o Gilead ri taki maea e huriki a kabu ne Reuben, ne Gad, a kalavana kabu ne Manase, 16  * Vin 12:13-14 “E huriki a bakovi a ngatavine ne BAKOVI DAGI, ri nana maea, ‘I navai mu ngalahere na Vure ne hita a Israel? Mu longotaro pali a nitane BAKOVI DAGI, mu vakapesia a dede-kedo ne mua. Ngane i uka ma mu ramai tabu e BAKOVI DAGI. 17  * Gi 25:1-9 Hosi ri rata a naro hale na tanga e Peor, lakea e BAKOVI DAGI i rudu vilia a gilanga dagi i ratapile e huriki a tara vona. Si bole a nimadihi vona ra naro hale iea i valai i harena mona. Mu luhoi ra naro hale iea i uka ma i kara hita, lakea mu ngaru ni rata tabua tara? 18 I navai ngane mu marikoi ni ramai e BAKOVI DAGI, mu ngalahere vona?

“ ‘Mua bara mu longotaro a nitana ngane, kuduvi bara i tahate hita lobo a kabu ne Israel. 19 Mu luhoi a malala ne mua i muto na matane BAKOVI DAGI, i kamumu mu pe a malala ne mua, mu valai mu bole ranga malala ne mia, ra malala ne BAKOVI DAGI i pesi vona a mailo vona. A dede ne BAKOVI DAGI, a Vure ne hita i tabuli pali. I navai mu longotaro a nitane BAKOVI DAGI, mu ha taro mia mu vakapesia a dede-kedo ne mua? 20  * Ios 7:1-26Naha ni longokaburungi a narone Akan, e tune Sera. E BAKOVI DAGI i ta kari vona a maka maki na tanga e Ieriko, pali e Akan i longotaro a nitana, i bole a maka maki, muri e huriki a Israel ri bole a maregoa na naro hale vona. A naro hale ne Akan, i uka ma i madoko vona kikeri. A naro hale vona i madoko ne huriki lobo ri bole a vuranga vona.’ ”

21 Lakea a kabu ne Reuben, ne Gad, a kalavana kabu ne Manase ri koli e huriki a matakari na kabu ne Israel, ri ta maea, 22 “E BAKOVI DAGI i tahoka a nitora dagi, ia kikeri ia e BAKOVI DAGI. I lohoka vona i navai si ratea a maki iea. Mua ranga mi ngaru mu gu lohoka vona. Mia bara mi longotaro a nitane BAKOVI DAGI, i uka ma mi ramai a vinara vona, mu rabalaki mia. 23 Mia bara mi longotaro a nitane BAKOVI DAGI, mi vakapesi a dede-kedo ne mia ne vona ni ngalahere vona, ne vona ni habi a nihabi gutu-vuro, a nihabi na vit, a nihabi na nivalemu, e BAKOVI DAGI bara i habi a vuranga ne mia.

24 “Pali mia mi vakapesia a dede-kedo iea, a vuhuna mi mangenge, muri ma e huriki a hamone mua, ma ri gi taki maea e huriki a hamone mia, ‘I navai mu kavurikea e BAKOVI DAGI a Vure ne mia e huriki a Israel? 25 E BAKOVI DAGI i ru a naru e Iordan ge a nagi ne hita, mua a kabu ne Reuben, ne Gad, a kalavana kabu ne Manase i uka ma mua a tara ne BAKOVI DAGI.’ Mi mangenge vona e huriki a hamone mua ma ri gi hatekakari e huriki a hamone mia i uka ma ri gi kavurikea e BAKOVI DAGI.

26 “I mavonga mi vakapesia a dede-kedo iea, i uka ma ne vona ni rata a maka nihabi legelege. 27 Mi vakapesia ge a kilakila na kabu ne mia, ne vona ni vakasiri e huriki a hamone hita muri ma, mia ranga mi kavurikea e BAKOVI DAGI na mailo vona. Mia ranga mi rata a nihabi gutu-vuro, a nihabi na nivalemu, a maka nihabi ranga.

“Ma ge muri ma e huriki a hamone mua ri gi biu e huriki a hamone mia, ri gi ta maea, ‘Mua, i uka ma mua a tara ne BAKOVI DAGI.’ 28 Mi luhoi maea, ma mu gu ratea ne mia a nita iea o mu gu ratea ne huriki a hamone mia, bara mi ta maea, ‘Mu masia, a dede-kedo iea e huriki a gare ne mia ri ratea i manga kunana a dede ne BAKOVI DAGI. Pali i uka ma a dede-kedo ne vona ni rata a nihabi ni gutu-vuro, ni rata a maka nihabi ranga. A kilakila kunana ne huriki a tara ne mia a tara ne mua.’ 29 Mi vakapesia a dede-kedo iea i uka ma ne vona ni rata a nihabi gutu-vuro, a nihabi ni gutu a vit, a maka nihabi ranga. Mi marikoi hateka ni rata mavonga. Mia bara mi rata mavonga bara mi longotaro a nitane BAKOVI DAGI mi ngalahere vona. Mia i uka ma mi luhoi ni kuloi a dede ne BAKOVI DAGI, a Vure ne hita, ra dede iea i pesi na matana mailo vona.”

30 E Pinias a prister turane huriki a gare na kabu takutaku ne Israel, ri longoa a nitana kabu ne Reuben, ne Gad, a kalavana kabu ne Manase ri vivi. 31 Lakea e Pinias e tune Eleasar a prister i taki maea ria “Ngane si lohoka vona e BAKOVI DAGI i made turane hita, a vuhuna i uka ma mu ngalahere vona. I mavonga mu korimule hita a Israel na rongova ne BAKOVI DAGI.”

32 Muri e Pinias, e huriki a matakari ri pe ria na tabeke ne Gilead ri hamule lakea o Kenan, ri vakalongo e huriki a Israel na nitana kabu ne Reuben, ne Gad, a kalavana a kabu ne Manase. 33 E huriki a Israel ri vivi vona a nitane ria. Ri kavurikea a rana Vure, i uka ma ri luhoi tabu ni vano ni vaubi turane ria, ri gi ratapile a tabekena malala ri made vona. 34 Lakea a kabu ne Reuben ne Gad ri vunua a dede-kedo iea e “Ta Kavakava,” a vuhuna ri ta maea, “A kilakila iea ne vona ni vakalongo hita lobo, e BAKOVI DAGI kikeri ia a Vure.”