1 E BAKOVI DAGI i taki e Moses e Aron i ta maea, 2 “Na tahuna a viri i tahoka a ngarava, a loto, a maki tara i kavuvu i vururu na kulina, lakea i vakabele a patala,* A gilanga a patala, ra lepra. a bakovi ni gi tuli lakea ne Aron a prister, o ge lakea ne tuna tara a prister. 3 A prister ge lei kamumua a hini i hale na kulina. Na tahuna i matai a vungana na kulina i kea, a gilanga i dupi dili na kulina, ra gilanga iea a patala. Muri na prister i lei loboa, ge vakalongoa i muto. 4 Pali a hini hale na kulina i uka ma i kea a vungana ge dupi, ge tonoa ge hamule na ruma vona, ge made kikeri tabu na parava ge polorua. 5 Na poloruana parava a prister ge lei tabua. Pali a prister ge masia i uka ma i mavu i rako lae na kulina a gilanga, ge takia a bakovi ge made kikeri tabu na parava ge polorua. 6 Na poloruana parava a prister ge matai tabua, a gilanga na kulina i lobo o i uka. A gilanga ge lobo, a prister ge takia i matapado, ra gilanga iea a gilanga tavula. Muri a bakovi ge vahilolo a maka varakia vona, ge matapado ia. 7 Pali muri na parava i vakasiri ia na prister, a gilanga na kulina i bele tabu, a bakovi iea ge vano ge matai tabua a prister. 8 A prister ge lei kamumu tabua a gilanga na kulina. A gilanga ge rako lae na kulina, ra bakovi iea i tahoka a patala. A prister ge vakalongoa i muto.

9 “A viri i tahoka a patala ni gi tuli lakea na prister. 10 A prister ge lei kamumua a kulina, ge masia a kulina i vaki, i kea, i ratea a vungana i kea, i mapoka a hini i vaki, 11 ra bakovi iea i tahoka a patala. A prister ge vakalongoa a bakovi iea i muto. Ngane a prister i lohoka vona, ra bakovi iea i muto, pali nahea ge tonoa ge made kikeri.

12 “Na tahuna a prister i masia a patala i rako lae na kulina viri, i tubu na gina i puru na vahana, 13 a prister ge lei kamumu tabua a kulina. Ia ge masia a gilanga i rako lobo na kulina, i ratea a kulina i kea, a kulina ge kea lobo, ra bakovi iea i matapado, a vuhuna a kulina i kea lobo pali. 14 Pali na tahuna a patala i mapoka, i tabuli kavakava a bobona, ra bakovi iea i muto. 15 A prister ge lei tabua a patala, ge masia i mapoka, i tabuli kavakava a bobona, ra bakovi iea i muto. Ra gilanga maea i hale hateka. 16 Pali na tahuna a gilanga i lobo, i keke a murina, ra bakovi iea ge hamule lakea tabu na prister. 17 A prister ge lei kamumua a kulina a bakovi iea, bara i masia i lobo, i keke a murina a patala, ra bakovi iea i matapado. Muri ge vakalongoa i matapado pali.

18 “A viri tara ge tahoka a loto na kulina, a loto vona i mavu, 19 muri a murina loto i keke, i vaki tala, i vururu, ra bakovi iea ge lakea na prister. 20 A prister ge lei kamumua a murina loto na bakovi. Na tahuna i mata visi a vungana na tabeke i vaki i kea, a ngarava vona i ngara i dupi, a prister ge takia a bakovi iea i muto. I tahoka a patala. 21 Pali na tahuna a prister iea i lei kamumu a loto, i masia i uka ma i ngara, i uka ma i kea a vungana, ge tonoa ge made kikeri na parava ge polorua. 22 Muri na parava ge polorua ge lobo, a loto ge vaki dagi, ra loto iea a maki hale, lakea a prister ge takia a bakovi i muto. 23 Pali bara a loto iea i tabuli na hini i taku kunana, i uka ma i rako ge tuvu lakea na hini ranga, ra loto iea a vuruna loto muga, a prister ge takia a bakovi iea i matapado.

24 “Na tahuna a viri i gutua a kanono a kulina, i lele a bobona, i vururu keakea o i keakea, 25 a prister ge lei kamumua a ngarava vona, ge masia a vungana ge kea na hini i gutua a kanono, i ngara i dupi, ra gilanga iea a patala. A hini i gutua a kanono i vakabelea a patala. A prister ge takia i muto. 26 Pali na tahuna a prister i lei a kulina, i uka ma i matai a vungana ge kea na hini i gutua a kanono, i uka ma i ngara, a prister ge takia a bakovi ge made kikeri na parava ge polorua. 27 Na poloruana parava a prister ge lei kamumu tabua a bakovi. A gilanga vona ge rako lae, a prister ge takia i muto. I tahoka a patala. 28 Pali a ngarava i uka ma i ngara, a harena kanono i kamumu kunana, a prister ge vakalongoa a bakovi iea i matapado, a vuhuna a ngarava vona a murina hini i gutua a kanono.

29 “Na tahuna a bakovi, a ngatavine i vona a vuruputuka a gina, o i pero a sivana, 30 a prister ge lei kamumua. A prister ge masia a vuruputuka, a pero ge dupi dili na kulina, a vungana ge ngango ngango, i makudu lae a vuna, ngane a prister ge vakalongoa i muto. A gilanga vona, a patala, i makali. 31 Na tahuna a prister i lei kamumua a vuruputuka a pero na bakovi, i matai i uka ma i dupi dili, a vuna i uka ma i koru rike ma, ge takia a bakovi ge made kikeri taro na parava ge polorua. 32 Na poloruana parava, a prister ge lei tabua a kulina bakovi iea. A vuruputuka a pero i uka ma i tuvu lakea na hini ranga, i uka ma i ngango a vungana, i uka ma i dupi dili, 33 a bakovi iea ge ali a vuna na gina, a sivana, pali nahea ge ali a hini i tuvu vona a vuruputuka a pero. Muri a prister ge takia ge made kikeri na parava ge polorua. 34 Na poloruana parava, a prister ge lei tabua a vuruputuka a pero na bakovi iea. A vuruputuka a pero i uka ma i ngara, ge takia a bakovi iea i matapado. Muri ge loi a maka kala vona bara i matapado ia. 35 Pali a vuruputuka a pero ge rako lae muri na tahuna a prister i takia i matapado, 36 a prister ge lei tabua a kulina, i masia i rako lae na kulina a gilanga, nahea ge matakana a vuna i ngango, a vuhuna a bakovi iea i muto. 37 Pali a prister i lei kamumua a bakovi, i matai a vuruputuka a pero i uka ma i ngara, i tuvu mule a ivu, a prister ge takia a bakovi iea i matapado.

38 “Na tahuna a bakovi, a ngatavine tara i tahoka a maki i keke lae na kulina, 39 a prister ge lei kamumua a hini keke. I uka ma i kea hateka, a maki tavula. A bakovi iea i matapado.

40 “Na tahuna a vuna bakovi i makudu tala na gina i lete, ra bakovi iea i mata­pado. 41 A vuna bakovi i makudu na hini polomeli na dumena, i lete, ra bakovi iea i matapado. 42 Pali bara a ngarava tara ge bele na lete vona i vururu i kea, ra gilanga iea a patala. 43 Muri a prister ge lei kamumua a ngarava iea, ge vururu ge vona kume, ra ngarava iea i mata manga a patala. 44 Ra gilanga i tabuli na gina i hale hateka, a patala. A prister ge takia a bakovi iea i muto.

45 “A viri i tahoka tara ngarava hale maea ra patala, ge rea na matutuna varakia, nahea ge pelengea a vuna. Ge kavitagua a ngavana na limana, ge gale maea, ‘Iau a muto! Iau a muto!’ 46 A bakovi i tahoka a gilanga maea, i muto. Ge pagitala na mada, ge made kikeri polovavo.

47-48 “Na parava ranga a limuta i tuvu na maka varakia ni rata na vuna sipsip, na kala, na kulina bulmakau. 49 Ra maki iea ge goma o ge vururu, bara i rako lae, ni gi bole ni gi vakasiri na prister. 50 A prister ge bolea ge lei kamumua, ge ru herehere na tabeke tara, ge harena na parava ge polorua. 51 Na poloruana parava ge lei kamumu tabua. A limuta ge tuvu lobo vona, bara i ratapilea. A maki i tuvu vona i muto. 52 A prister ge bole a maki nga ge rungani na kanono, a vuhuna a maki i manga a patala i bele ne ria.

53 “Bara prister ge masia a maki iea i maea kunana, i uka ma i tuvu tala tabu na maka varakia, 54 ge taki ria ri gi loi a maka varakia, ri gi ru here na parava ge polorua tabu. 55 Muri a prister ge lei tabu a maka varakia, muri na tahuna ni loi, ge matai a limuta i tababana vonga o i uka. Na tahuna i matai i tababana vonga, pali i uka ma i vulala tala, ge vakalongo ra maka varakia ri muto. Mu gu rungani na kanono. A limuta ge tabuli na ngalana, o na bitona, mu rungania.

56 “Pali a prister ge lei kamumu tabu a maka varakia ni loi, ge masia a maki i manga a limuta i lobo o i uka. Bara i lobo, ge rape tala a hini i madoko vona a limuta ge vuroki. 57 Muri a limuta ge bele tabu na varakia, na maki ni rata na kulina bulmakau, a tahona a maki nga ge bole ge rungani na kanono. 58 Pali na tahuna i loi a maka kala o a maki ni rata na kulina bulmakau, i malavuroki a limuta, ge vahilolo tabu, bara ri matapado.”

59 Ra ngava iea a vinara na maki i manga a patala i vakahale a maki ri muto: ra nirodo, a kala ni rata na hotu kamumu, a vuna sipsip, a maka maki ni rata na vuna bulmakau. Ra vinara iea i taki a maki i matapado, a maki i muto.