9
A Kinori Ge Lakea ne Huriki a Iuda
1 * 2Ko 8:1-7I uka a vuhuna ga taki mua mu gu kori e huriki a tara na Vure o Iudea, 2 a vuhuna a lohoka vona mu ngaru hateka ni kori ria. Iau a bibi rike a rane mua pali ne huriki a tara na Vure o Masedonia. A vakalongo ria ne mua e huriki a Akaia, mu vakatubu na pida i lakea pali ni ru palupu a moni. Na tahuna ri longo mua mu ngaru hateka ni habi a moni, ria ranga ri ngaru hateka ni habi a moni.
3 Pali ngane ga rudu lakene mua a bakovi ala tolu nga, to go tuhori mua ni ru palupu a moni. Muri e huriki lobo ri gi matakilaka vona a ngava a bibi rike a rane mua vona i muholi. 4 Muri, e huriki a Masedonia, ma ri gi lakene turagu ri gi matai mua i uka ma mu ru palupu ma a moni. Bara maruhu. Mua ranga bara mu maruhu hateka, a vuhuna mu taki pali ta mu gu habi. 5 A koi mu gu maruhu, lakea a taki a bakovi ala tolu nga, to go muga lakene, to go kori mua ni ru palupu a moni, ra mu ta muholi vona muga mu gu habi. Lakea ra moni nga, a kinori ne mua, i uka ma mu gu habi tuhare. Bara mu habi na hatene mua.
6 * Snd 11:24-25Mu luhoi kamumu a ngava nga: a viri i varo a uve popote bara i mirio a mavo popote kunana. Pali a viri i varo a uve i kupo bara i mirio a mavo i kupo. 7 Mua takutaku mu luhoi kamumu i riva moni mu gu habi. A viri i koi ni habi, nahea ge habi a moni. Naha ni habi tuhare, a vuhuna a Vure i ngaru e huriki ri habi na hatene ria. 8 Muri a Vure bara i hate balala, i vakatahoka mua vakaroro a maki mu ngaru. Bara mu tahoka hateka a maki, lakea bara mu kara ni tuhori e huriki ranga. 9 * Sng 112:9I manga a ngava ni here hosi na Hinere, i maea,
“I hate balala, i kori e huriki a matasia.
A Vure ge luhoi vakaroro a naro kamumu vona.”
10 * Ais 55:10A Vure ra viri i habi a vutuna maki ni varo, i vakabele a maki ni kani ne huriki, ia kunana bara i vakabele a vutune mua ge kupo, ge rata a naro malamala ne mua ge tahoka a kanena i kupo. 11 * 2Ko 1:11; 4:15I muholi, a Vure ge gamai mua na naro lobo, mu gu kara ni hate balala vakaroro. Na tahuna mete taparaki ne huriki a matasia a moni ne mua, bara ri kavurikea a Vure. 12 Na tahuna mu kori mavonga e huriki ranga, a kanena bara i rua. E huriki a tara na Vure bara ri bole a maki ri uka vona. E huriki ala kupo bara ri kavurikea a Vure. 13 Na tahuna mu kori e huriki maea, bara ri vakabagetua a Vure. A naro hate balala ne mua, mu kori e huriki nga, mu kori e huriki a tara na Vure lobo, bara i vakasiri manga mu longototo a Velenga Kamumu ne Kristo. 14 Muri, bara ri ngaru hateka mua, ri vasileki ne mua, a vuhuna bara ri luhoi mule a hini a Vure i rata a naro kamumu hateka ne mua. 15 Si gi kavurikea a Vure vona a maki i habi tavula ne hita. I kamumu hateka, si keri ni tuveve polo na ngava!