2 थिस्सलुनीकिया दे ना प्रेरित पौलुस दी दुज्जी चिठ्ठी
जानकारी
प्रेरित पौलुसे दी ऐ चिठ्ठी होई सकदा थिस्सलुनीके दिया कलीसिया जो दितयो अपणिया पेहलिया चिठिया दे तुरंत बाद लिखया था। पौलुस सताव दे हालातां च इक-दुज्जे दे प्रति अपणे भरोसे कने अपणे प्रेम दे बारे च दसदे होए दुज्जे चर्चां च जाई करी उना जो घमंड दस्सा दा था। पौलुसे उना जो याद दिलाया कि परमेश्वर उना दे सताव जो चुकाई देणा। उना इसा कलीसिया च दो समस्याओं जो दुबारा ला संबोधित कितया है। सारयां पेहले, जियां कि 1 थिस्सलुनीकियों च था, कि सै इस तांई चिंता च थे कि प्रभु पहले ही बापस आई गिया है। पौलुसे उना ला आग्रह किता कि सै “मने च डरन ना,” ऐ डर कि “प्रभु दा दिन” (अध्याय 2: 2) पेहले ही आई गिया था। दुज्जा, उनी उना जो बेकार नी जाणे दी आज्ञा देईकरी बोलया कि, “यदि अगर कोई कम्म करणे जो तैयार नी है, तां उसयो खाणा मत खाणा दिया” (अध्याय 3:10)।
रूप रेखा
अभिवादन 1:1-2
प्रभु दिया वापसिया न्याय लोणा 1:3-12
प्रभु हले दीकर नी मुड़ी करी आया हैं 2:1-12
भरोसे दे लायक बणा 2:13-1
प्रार्थना कने कम्म 3:1-15
इक आखरी प्रार्थना 3:16-18
1
अभिवादन
1 ऐ चिठ्ठी मैं पौलुस सिलवानुस कने तीमुथियुस दिया तरफा ला थिस्सलुनीकिया शेहरे दिया कलीसिया दे ना लिखा दा है, जड़े पिता परमेश्वर कने प्रभु यीशु मसीह च न,
2 असां प्राथना करदे न की परमेश्वर तुसां पर अनुग्रह करे कने तुसां जो शांति दे।
न्याय दा दिन
3 हे मसीह भाईयो, तुहाड़े बारे च सांझो लगातार परमेश्वरे दा धन्यवाद करणा चाईदा। कने ऐ साड़े तांई ठीक भी है, की तुहाड़ा भरोसा यीशु मसीह पर बददा जा दा है, कने तुहाड़ा प्यार भी इक दुज्जे तांई बददा जा दा है। 4 इस तांई परमेश्वरे दिया कलीसिया च तुहाड़े बारे च घमंड करदे न, की चाहे तुसां पर जितणे दुख तकलीफ आऐ, पर तुसां लगातार सबर ने उना दा सामणा किता कने प्रभु यीशु मसीह पर भरोसा करदे रे। 5 तुहाड़ा दुखां जो सेहणा तुसां जो इस काबिल बणादा है की तुसां परमेश्वरे दे राज्य जा जाई सकन, ऐ ही सच्चा सबूत है, की परमेश्वर सच्चा न्याय करदा है।
6 क्योंकि परमेश्वर हमेशा सही न्याय करदा है, परमेश्वरे उना जो जरुर दुख देणे, जड़े तुहांजो दुख दिन्दे न। 7 कने उनी तुसां जो सुख देणा जड़े हुण दुखे च न, कने सांझो भी सुख चैन देणा, ऐ उस बकत होणा जालू प्रभु यीशु मसीहे अपणे शक्तिशाली स्वर्गदूतां सोगी स्वर्गे ला धधगती होई अग्गी चे प्रगट होणा। 8 कने जड़े परमेश्वरे जो नी पछेणदे, कने जिना साड़े यीशु मसीह दे शुभसमाचारे जो नी मनया, परमेश्वरे इना जो सजा देणी।
9 परमेश्वरे उना जो अपणी मोजुदगी ला बाहर कडी देणा कने परमेश्वरे उना जो अपणिया शक्तिया कने महानता जो जाणने दी अनुमति नी देणी, कने उना जो हमेशा दी सजा देणी। 10 ऐ उस रोजे होणा, जालू यीशु मसीहे अपणे पबित्र लोकां च महिमा कने इज्जत पांणे तांई बापस ओणा, जड़े लोक उस पर भरोसा रखदे न, तुसां भी उना लोकां सोगी होणा है जिना प्रभु यीशु दी महिमा करणी है, क्योंकि तुसां साड़ी गबाइया पर भरोसा किता।
11 इस तांई असां लगातार तुहाड़े तांई रोज प्राथना भी करदे न, की परमेश्वर तुहांजो उसा जिन्दगी जो जिणे दे काबील बणाऐ जिस तांई तुहांजो सदया है, कने सै तुहाड़ी हर इक भली इच्छा जो पूरा करे, कने हर उस कम्मे जो सफल करे जड़ा तुहाड़े भरोसे दा नतीजा है। 12 असां ऐ प्राथना करदे न की लोक तुहाड़िया बजा ने प्रभु यीशु मसीह दी महिमा करन, कने तुसां जो भी इज्जत मिलणी क्योंकि तुसां उदे न। ऐ सब कुछ परमेश्वरे कने यीशु मसीह दे अनुग्रह ने होणा।