27
Nodone Sia:ne Gadosu
1 Hina Gode da na hadigi amola na gaga:su gala.
Na da eno dunuba:le hame beda:mu.
Hina Gode da na se nabasu huluane mae ba:ma:ne, gaga:sa.
Na da hamedafa beda:mu.
2 Wadela:i hamosu dunu ilia da na medole legemusa: doagala:sea,
ilia da didigabone dafasa.
3 Dadi gagui dunu wa:i da na fane legemusa: eale sisiga:le disisia,
na da hame beda:mu.
Amola nama ha lai dunu da na doagala:sea amolawane,
na da gebewane Godema dafawaneyale dawa:lalumu.
4 Na da Hina Godema liligi afae fawane adole ba:i.
Na da liligi afae fawane hanai gala.
Na hanai amo da, Na da eso huluane esalea,
Hina Gode Ea diasu ganodini esalumu na da hanai.
Na da amogawi ea noga:idafa hou amoma fofogadigili nodone ba:mu,
amola Ema E da Ea hou nama olelema:ne adole ba:mu.
5 Bidi hamosu esoga, E da na ougihalesimu.
E da na Ea Debolo diasu ganodini gemu.
Amola magufu sedade, amo da:iya E da na gemu.
6 Amaiba:le, na da nama ha lai dunu nama eale sisiga:le disibi ili hasalimu.
Na da nodone wele sia:nanawane Hina Gode Ea Debolo diasu
amo ganodini Ema gobele salasu hamomu.
Amola na da Hina Godema gesami hea:mu amola nodone sia:mu.
7 Hina Gode! Na da Dima wele sia:sea, na wele sia:be nabima!
Nama asigiba:le, na sia: alofema!
8 Di da nama, “Nama nodone sia:ne gadola misa!” amane sia:noba,
na da bu adole i, “Hina Gode! Na da misunu!
9 Di da nama mae wamoaligima!”
Nama mae ougima! Na da dia hawa: hamosu dunu.
Dia na hamega mae fisiagama.
Di da na fidisu dunu galu.
Gode, na Gaga:sudafa! Na mae yolesiagama!
10 Na ada amola ame ela da na gogolesa ganoma:bela:?
Na hame dawa:.
Be Hina Gode da na noga:le ouligimu.
11 Hina Gode! Dia na hamoma:ne hanai amo nama olelema.
Nama ha lai dunu da bagohame gala.
Amaiba:le, Dia na oule, se hame nabimu logo amoga oule masa.
12 Nama ha lai dunu da ogogosu amola beda:ma:ne magagisu
amoga na doagala:sa.
Ilia da nama hasalasisa:besa:le, na mae yolesiagama.
13 Na da na osobo bagadega esalusu amo ganodini,
Hina Gode Ea noga:idafa hou ba:mu, amo na da dawa:digisa.
14 Hina Gode Ea hou dafawaneyale dawa:ma!
Baligili da:i dione mae heawini dawa:ma!
Hina Gode Ea hou dafawaneyale dawa:ma!