42
1 Amalalu, Yoube da Hina Godema dabe adole i.
Yoube da amane sia:i,
2 “Hina Gode! Na dawa:! Di da gasa bagadedafa.
Di da liligi huluane Dia hamomusa: dawa:be,
amo huluane defele hamosa.
3 * Yoube 38:2Di da nama amane adole ba:i,
‘Di da Na bagade dawa:su abuliba:le dafawaneyale hame dawa:bela:?
Bai di da hamedafa dawa:su dunu.’
Dafawane! Na da na hame dawa:digi liligi,
amola musa: hame ba:su hou amo na da dawa:digimu hamedei,
amo udigili sia:su.
4 † Yoube 38:3Di da amane sia:i, ‘Na sia:sea, di noga:le nabima!
Na dima adole ba:sea, di Nama dabe adole imunusa:, logo hogoma!’
5 Musa: na da eno dunu ilia nama adole i fawane dawa:i galu.
Be wali na da na siga Di ba:i dagoi.
6 Amaiba:le, na da na sia:i amo dawa:beba:le, gogosiasa.
Na da Dima sinidigimu olelema:ne, gulu amola nasubu na da:iga gasagagala:sa.”
Sia: Dagomusa: Sia:
7 Hina Gode da Youbema sia:ne dagoloba, E da Ilaifa:sema amane sia:i, “Na da di amola dia sama aduna dilima ougi. Bai dilia da Na hou dafawane hame olelei. Be Nama hawa: hamosu dunu Yoube da moloiwane sia:i dagoi. 8 Wali, dilia bulamagau gawali fesuale amola sibi gawali fesuale, amo Youbema gaguli asili, amola dilia hou dabema:ne, gobele salima. Yoube da dili fidima:ne sia:ne gadomu. Amasea, Na da ea sia:ne gadosu nabimu. Dilia hamobeba:le, se dabe lamu da defea galu. Be Na da dilia hamobe defele, dilima se dabe hame imunu. Dilia da Yoube ea hou defele hame hamoi. E da moloi sia: fawane sia:i.”
9 Ilaifa:se, Bilida:de amola Soufa, ilia da Hina Gode Ea ilima adoi defele hamoi. Amola Hina Gode da Yoube ea sia:ne gadosu, amo dabe adole i. 10 ‡ Yoube 1:1-3Amalu, fa:no Yoube ea sama udiana amo fidima:ne, Hina Godema sia:ne gadolalu, Hina Gode da e bu bagade gaguiwane esaloma:ne, ea musa: gagui amo da:iya eno adunane dabuasilisi.
11 Yoube ea olalali amola ea dalusilali huluane amola ea musa: na:iyado, ilia da e gousa:la misini, ea diasuga gilisili lolo mai. Ilia ema asigi sia:ne, amola Hina Gode da ema bidi hamosu bagade iasibiba:le, ea dogo denesinisi. Ilia afaeafaea muni amola gouli lobo sogoga gasisalasu, Youbegili i. 12 Hina Gode da Yoube ea esalusu dagomu galu, amo e hahawane esaloma:ne hamoi. Amo da ea musa: esalusu hahawane hou baligi dagoi. Yoube da sibi 14,000 agoane, ga:mele 6,000 agoane, bulamagau 2,000 agoane amola dougi 1,000 agoane gagui. 13 E da dunu mano fesuale amola uda mano udiana ilia eda galu. 14 E da ea magobo uda mano amoma Yimaima dio asuli. Uda mano magobo bagia ea dio da Gesaia, amola uda mano ufi ea dio da Gelene Ha:bage.
15 Yoube ea uda mano da osobo bagade isisima:goi uda huluane ilia isisima:goi ba:su baligi dagoi. Ilia eda da ea dunu manoma nana iasu defele, uda mano ilima nana i dagoi. 16 Yoube da amo hahamona misi dagole, ode 140 agoane eno esalu. E da ea aowalali, ilia mano amo ba:i dagoi. 17 Amalalu, e da da:idafa hamoiba:le, bogoi dagoi.
Sia: ama dagoi