4
4:1-22 Kanisera* Mane Furia, Pita Ungá Jon Gha Koto Egeguturia Re.
1 Pita ungá Jon gha da gaga jo rea sidara ambi irieta, ungá umó enembo dava gaga rieta, fristi* mane, Jiusi enemboda babarigari, ragaro Sadyusi* enembo dumeni, kotú God da Kamboda* mene-mene ari kakatoda beforo righari numonde dano furia bububuguturie. 2 Númane neno sembago egeguturie. Anada bee mo evere: Pita ungá Jon ghana enembodu gaga eghá iruguturie. Iesu amburarivareta jebugea eroruria aghagonu, enembo amburarivareta jebugea eraita rousue. Anada gaga irugutueta niningigea, númane injigha egeguturie. 3 Númane bubua, Pita ungá Jon gha nandia bua, tumba riritua-du aria, diburava gagajeguturieta, avo eviviguturie. 4 Aghá egeguturie-tago, enembo oruabe Pita ungá Jon ghada gaga, God du Tafaroro Ari Kambo anava ningia gaabee egeguturie. Aná embobo gaabee urota, Iesu da natofo egeguturia, 5,000 re, evevetu kotú sasingu mane jo irugambi egeguturie.
5 Rifo atiturieta, Jiusi enemboda kokotofu, enemboda babarigari, kotú Moses da Gaga irugari kakatode* dano furia, Jerusalem anava desuturie. 6 Fristi da beforo righari, ragaro Anas de, Kaiafas, Jon, Aleksander mane aná, beforo righarida totofo beago anava desuturie. 7 Desea, númane ririeta, Iesu da ambo nimbi bua furia, rorova ititurieta jijireguturieta, uriga egeguturie, “Nímane avoda anova kotú avoda ragarova ritata aná embó eka dimbaride jebuguta?”
8 Uriga aghá urieta, Asisi Kakara na Pita dava asuguturieta, neno nundubea ririe, “Kokotofu kotú enemboda babarigaride, dano eve bububugetora-du, ghanena rore. Nghaĩ jajavegutuu-gea, gaga raita roreta. 9-10 Námanda ari taubana egegutara-de kotú ená embó eka dimbaride daiyagha jebuguta-du uriga rosoravore. Amindu, nímane kotú Israel enembo dano gigigadi rea, isaghava raita rore. Nasaret embó Iesu, God da ninenguturieta furia embó ifatarava dedegutata, God na ritata amburarivareta jebugea erora-da ragaroda anova námane ritata, ená embó nímanda dibeva jiria vitia, umó jebuguta. 11 Ps 118:22God seibe Iesu du nundubuturota, kasiava eghá ririeta gefirie:
‘Singoi eini kambo itari kakatomi injigha ea doa
fugituria-nu Jojabee na bua, unda kambo roro tutumbudu
itia simbuguturie.’
12 Amindu rea, namonde amó jebuga bubugaita egegadora mo, namonde Iesu unuka umonu gaabee egegaita rosore. God na namonde anda ari-bari akokogo nundubea gia doaita rea, Iesu ninenguturieta furie. Jebuga bari emboro eini tefo re.”
13 Pita ungá Jon gha beforo gari-da ove urie-tago, jo fefera yafabe gegembugambi re. Avotago ungá umó aná embobo usituria-du oru jo egegambi re. Aghá ueta, Pita ungá Jon gha, Iesu de deĩ urota ano undava rururia-nu tanana ea númane duduku-dadaka egeguturie. 14 Kotú embó eka dimbaride utata jebuguta anava jiria irieta gia, gaga donu eini rari mana-mana egeguturie. 15 Aghá ea, númane Iesu da ambo nimbi ungagha aná ririeta bubua aria airo jiriturieta, númane mino-mino rea niningiguturie. 16 “Namonde daiyagha a? Enembo dano Jerusalem enava, embó jebuguta aná ningia, tanana egegetue. Amindu rea, jo namonde amó kivu ari katogo irambi re. 17 Avotago, rourogo natofo dano niningigauve-degea rirota, namonde númane buregea eghá regegore, ‘Mania Iesu da ragarova gaga eini irugata o kotú, regegata!’ ” aghá regeguturie.
18 Anada ambova, ghogho ririeta, Iesu da ambo nimbi ungagha furia teteruguturieta, númane fafota urota eghá regeguturie, “Mania Iesu da ragarova gaga eini irugata o kotú, regegata!” 19 Aghá ririeta, Pita ungá Jon gha erea, númandu mino eghá regeguturie, “Niana mo taubana ro, nendufako nundubea gigige! Námane God da dibeva mo, nímanda gaganu niningigara, aĩ, God da gaga niningigara? 20 Atá námanda donu gerara kotú niningara, aná jo eve tukú ambi egegaita rosore.”
21-22 Aghá regeguturieta, kanisera* mane desuturia aná, dano ungá undava rekago gaa fakarago regeguturie-tago, númandu jo mema eini utambi, ninenguturieta igiguturie. Anada bee mo, aná embó eka dimbaride nueda urova aghá sirorea irirota, ghaeko 40 sidara uria-da ambova, umó urieta jebuguturie. Ananu gigigea, enembo nanjogo God du raga regeguturie. Amindu rea, aná kokotofu oru egegea, Pita ungá Jon ghadu mema eini jo utambi re.
4:23-31 Iesu Gaabee Ari Kakatomi God Dava Ano Baita Rea, Benunu Egeguturia Re.
23 Kanisera* mane dodoguturieta, Pita ungá Jon gha Iesu gaabee ari kakatodava aria bubua, fristida* kokotofu kotú enemboda babarigaride donu regeguturia, ananu isagha egeguturie. 24 Ex 20:11; Neh 9:6; Ps 146:6Urieta niningigea, numonde dano God du benunu egeguturota, eghá regeguturie, “Jojabee Ano Kato, inona ririeta, uutu endade karaje, kotú eini-eini nanjogo dano siroruturie. 25 Ps 2:1-2Inda Asisi Kakarada anomi ririeta, námanda abua Devit, inda buro kato eghá gefirie:
‘Gitofo unda abua-abua neno akokogo ea,
daiyagha God de mene-mene egegasua, ananu nundubuturota
manaka gaegeguturie-tago, jo egegota inono ambi aita rouvie.
26 Endada kini mane, nendufako simbuguturie.
Kotú babarigari furia danode desea, God de
kotú unda ninenguturieta furia embódedava,
mene-mene aita simbuguturie.’
27 Luk 23:7-11; Mat 27:1-2; Mak 15:1; Luk 23:1; Jon 18:28-29Atá Devit da aghá riria-da bee siroruta. Aná mo, Kini Herot ungá Rom enemboda kotofu eini ragaro Pontius Pailat gha, takembea futa, Jerusalem enava bubua, gitofoda abua-abua dumeni kotú Israel enembode dano desea, inda Buro Kato kakara, Iesu, ninenguturieta furia-dava, mene-mene aita rea manaka gaegeguturia. 28 Inda donu sirorari-du nundubutara, aná númane egegutata, inda anomi bee siroruta. 29 Kotú oreki, Jojabee, námane inda buro kakatodu mema bouvu utari gaga regegetua-nu nundubadi reisi-rere. Aghade ege-gea, námane ivisa jará ea, inda Gaga orugha ambi regegore! 30 Inda ingo rurugea sonembuturadi-gea, enembo inda Buro Kato kakara, Iesu da ragarova jejebugoe, kotú unda ragarova ari ivata anogha dibe eini be eini ata sirorota, gia enembo nanjogo duduku-dadaka egegoe!”
31 Benunu aghá egeguturieta, aná desuturia kambesiva, enda gino-gino ueta, Asisi Kakara vorea númandava asuguturieta, ano bua, God da gaga minono oru ambi regegeta urie.
4:32-37 Iesu Da Natofo Neno Dabako Egeguturia Re.
32 Eka 2:44-45Iesu gaabee ari kakato, neno kotú nundubari dabako egeguturota, jo endava gugua-ghayafa neno bambi egegeta urie. Númanda gugua-ghayafa dano bua, mino-mino vesa egegeta urie. 33 Aghá urota, Iesu da ambo nimbi 12 God da ano jojabemi, Iesu amburarivareta jebugea eroruria-da Gaganu isagha egeguturie. Aghá uaveta, God númane dano ea simbugea goghó eta urie. 34-35 Númane dano uvude, undari-baride inono re. Anada bee mo, avodava enda o kambo vitiria-mi utua, guri bua Iesu da ambo nimbi 12 du ututugeta urie. Eaveta, númane bua enemboda irari kotú mema gerurota, guri vesa egegeta urie.
36-37 Aghade, enda butu Saiprus embó eini ragaro Josep, umó abua ragaro Levi da rova re. Unona unda enda utua guri bua, Iesu da ambo nimbidava ututurie. Aghá urieta, Iesu da ambo nimbi númane unda ragaro reka Barnabas ririkiguturie. Barnabas da bee mo, Neno Gangoro Utari Kato re.
4:11 Ps 118:22
4:24 Ex 20:11; Neh 9:6; Ps 146:6
4:25 Ps 2:1-2
4:27 Luk 23:7-11; Mat 27:1-2; Mak 15:1; Luk 23:1; Jon 18:28-29