1  2 Pi 1:17-18Fefera ingo yoveni yoveniva dabako sidara uria-da ambova, Iesu erea, Pita bua, Jems unda ikoko Jon gha bua, nenukako dafaru yafabe einida itiva yayavuguturie. 2 Anava bubua, unda ambo nimbi gigigutueta, Iesu da dibe kaverea feferami janimbarigo urota, unda asugari dighari beago kaverea, saghai forosago ea, unanami janimbarigo urie. 3 Aghá ueta, unda ambo nimbi bakode gigigutueta, gaimbo ambi Moses ungá Elaija gha Jojabeeda kasava sirorea, Iesu de gaga regegutueta, 4 Pita na erea, Iesu du eghá ririe, “Jojabee, namonde amó eve desea vitera, aná taubana re. Aghá-gea, imó uno adora, amó dobo bakode, eini indú, eini Moses du, kotú eini Elaija du aghá simbugaita rore.”

5  Gen 22:2; Ps 2:7; Is 42:1; Mat 3:17; 12:18; Mak 1:11; Luk 3:22; Deut 18:15Pita aghá ria, gooso unanaghami vorefuria, númane afureguturieta, gooso rova be fugia eghá ririe, “Ená anda neno bari Mendi re. Undú amó gangoro bee eta roreta, unda gaga donu radua-nu, niningige!” ririe.

6 Avore, Iesu da ambo nimbi aná be niningiguturia aghade, númane oru urota, kukurufa ea, dibe be dano endava tatakembeguturie. 7 Aghá urieta, Iesu na furia, númanda tamova righia, “Ererege! Mania oru egegata!” ririe. 8 Aghá ririeta, númane dibe jará ea gigiguturia, anava enembo eini tefo re. Tago, Iesu nuenembo gigiguturie.

9 Anada ambova, númane dafaru vareta vorefurota, Iesu númandu buregari gaga eghá ririe, “Nímane donu gigigetora, mania enembodu regegata! Do-gea, Enemboda Jojabee* amburarivareta jebugea erota, anada ambova regegadora, aná avore.” 10  Mal 4:5Aghá ririeta, Iesu da ambo nimbimi undú uriga urie, “God Embó eini utota furaita rouvie. Tago, bee dodu Moses da Agho Dari irugari kakatomi* ‘Elaija sei furaita rouvie.’ regegeta rosu?” 11 Aghá regeguturieta, Iesu na mino ririe, “Aná gaa bee re. Elaija na sei furá, aná Embó God na utaita riria-da emboro simbugaita rouvie. 12  Mat 11:14Tago, amó nímandu eghá rere, Elaija umó seibe furie-tago, enembo umó jo tanana ambi-gea, númane undava donu aita uno uria aghagonu urota, mema ututurie. Kotú dabako aghagonu Enemboda Jojabeedava beago númanena mema utaita rousue.” 13 Aghá rieta, unda ambo nimbi tanana egeguturie, Iesu umó Jon Bafutaito ari katonu nundubuturota ririe.

14-15 Avore, númane aria, aná natofo desea vitiria-va bububuguturieta, embó einimi furia, Iesu da dibe kena koubumi jengirea eghá ririe, “Jojabee, anda mendidu neno mema ea sonembadi rere! Unda nundubari kasovigeaveta umó jifeta rouvie, kotú mema jojabe itatama eta rouvie. Umó fefera oruabe ivariva juta rouvie, o uvuva juta rouvie. 16 Amindu umó inda ambo nimbidava bua futare-tago, númanena rata umó jebugari jo inono irambi re.” 17 Aghá ririeta, Iesu na mino ririe, “O yove, nímane oreki vitera enembo, aná gaa ningambi deriva egegeta rosoravore. Nímandava gaabee ari tefo re. Amó fefera yafa daiyaghago namonde irirota, nímanda mema bouvu fumba? Avoreta, aná mendi bua, andava fu!” 18 Aghá rea, taimu aná mendidava asugea vitiria-nu Jojabee na dibe beva rirota tuviturieta buburitueta, jo gaimbo ambi aná mendi jebuguturie.

19 Anada ambova, Iesu da ambo nimbimi nenuka furia, undú uriga eghá egeguturie, “Námane tuvetora, daiyagha taimu vorambi etu?” 20-21  Mat 21:21; Mak 11:23; 1 Ko 13:2Aghá regeguturieta, Iesu na mino eghá ririe, “Anada bee mo, nímanda gaabee ari aná bee tefo aghago re. Amó nímandu gaa bee rere. Nímanda gaa bee ari ijokoko, ika ragaro maineda veego iradua mo, nímane aná dafarudu, ‘Enavareta gosá ea ii, onava jiradi,’ radora, aghago aita rouvie. Nímane donu aita nundubasira, aná bee sirorasue.* Itiva tutuno 20-21 da rova tutuno 21 da gaga tefo re. Anada bee mo, ekaresiada* beforo ririkigari oruabeda nundubariva, tutuno 21 da gaga Matyu na gefiria, aĩ, enembo einimi gefiria, aná jo tanana ambi re. Amindu aná gaga jo itiva itambi re. Eve tuva gefiria, aná evere: “Tago, taimudu eghá rere. Taimu eghago mane tuvaita regegadora mo, undari bari tama urota, God dava utuvako jiria benunu urota iririguturota aghá ari inono aita rosoravore.””

22-23 Anada ambova, Iesu da ambo nimbi bubua, Galili Frovensi anava danode desiturieta, Iesu na númandu eghá ririe, “Enemboda Jojabee* enembomi bua, gitofoda ingova utota, númanena umó dedegota ambua, fefera bakode sidara adua-da ambova, God na rata, umó rekago jebugea eraita rouvie,” aghá ririeta, unda ambo nimbi niningigea, neno mema jojabe itatama egeguturie.

24  Ex 30:13; 38:26Anada ambova, Iesu unda ambo nimbide aria, Kaperneam buburituria aghade, aná tafaroro kamboda takesi bari kakatomi Pita dava uriga egeguturie, “Inda irugari kato, Tafaroro Kamboda* takesi ututa rouvia?” 25 Aghá ririeta, Pita na mino ririe. “Aĩ, ututa rouvie,”

Aghá rea, Pita kaverea aria, kambo rova teterurieta, Jojabee na seibe jará urota, undava uriga urie, “Saimon, inda nundubari mo doro? Endava kini mane mino o takesi númanda sasingudava buta rousua, aĩ, defosi enembodava buta rousua? Rege, ningore!” 26 Aghá ririeta, Pita na mino ririe, “Defosi enembodava buta rousue,” ririeta, Iesu na ririe, “Amindu Kini da sasingudava jo bambi egegasue! 27 Tago, rourogo númane neno akuago auve-degea rereta, ii, saova monga fugea, uvu oka tutunova beradora-da beva, angá anda Tafaroro Kambo mino ari guri* tambaita roravoreta, bua ii, angá anda takesi mino adi!”