Mateu Nymerohpyry sero Jezu poko
Sero pape tymerose Mateu a. Jezu poetory kynexine ynororo. Apitoryme erohketyme kynexine kowenu poetoryme, tineru apoiry poko kowenu tinerũme.
Tynymerohpyryae Jezu ytoytopõpyry poko kuurutorỹko mana sero nono po. Jezu nyrihpyry poko kuurutorỹko roropa mana, aomihpyry poko, enara.
Kuesẽkõme imehxo Jezu exiry poko kuamorepatorỹko mana kure rokẽ Jezu ritohme kyya xine.
1
Jezu ekyrỹpyã esety poko
(Ruk 3.23-28)
1 Sẽ nase Jezu Kyrixtu enurutopõpyry poko. Tawi paryme Jezu kynexine. Aparão paryme roropa Tawi kynexine.
2 Aparão mokyro Izake zumy.
Izake mokyro Jako zumy.
Jako mokyro Juta zumy, Juta akorõ tõ maro.
3 Juta mokyro Pereze zumy, Zera zumy roropa.
Jẽkõ Tamara kynexine.
Pereze mokyro Ezerõ zumy.
Ezerõ roropa Arão zumy.
4 Arão mokyro Aminatape zumy.
Aminatape mokyro Nasõ zumy.
Nasõ mokyro Saramõ zumy.
5 Saramõ mokyro Poaze zumy.
Poaze eny Raape kynexine.
Poaze mokyro Opete zumy.
Opete eny Ruti kynexine.
Opete mokyro Jese zumy.
6 Jese mokyro tuisa Tawi zumy.
Tawi mokyro Saromão zumy.
Saromão eny mokyro Uria pytỹpyry.
7 Saromão mokyro Ropoão zumy.
Ropoão mokyro Apia zumy.
Apia mokyro Aza zumy.
8 Aza mokyro Josapa zumy.
Josapa mokyro Jorão zumy.
Jorão mokyro Uzia zumy.
9 Uzia mokyro Jotão zumy.
Jotão mokyro Akazi zumy.
Akazi mokyro Ezekia zumy.
10 Ezekia mokyro Manase zumy.
Manase mokyro Amõ zumy.
Amõ mokyro Josia zumy.
11 Josia mokyro Jekonia zumy, Jekonia akorõ tõ maro.
Mame morara ahtao soutatu tõ tooehse Papironia poe Izyraeu to poremãkapose. Tuhke totapase eya xine. Toto akoĩpyry tarose eya xine Papironia pona.
12 Morarame tarose tahtao xine Jekonia toemũkuase moroto Saratieume.
Saratieu mokyro Zoropapeu zumy.
13 Zoropapeu mokyro Apiuti zumy.
Apiuti mokyro Eriakĩ zumy.
Eriakĩ mokyro Azoro zumy.
14 Azoro mokyro Satoke zumy.
Satoke mokyro Akĩ zumy.
Akĩ mokyro Eriuti zumy.
15 Eriuti mokyro Ereaza zumy.
Ereaza mokyro Matã zumy.
Matã mokyro Jako zumy.
16 Jako mokyro Joze zumy.
Joze mokyro Maria nio, Jezu ẽ nio.
Jezu mokyro Kyrixtu, Kuesẽkomo.
17 Morara exiryke Aparão tõ toemũkuase. Imũkuru tõ roropa toemũkuase. Ipakõ roropa toemũkuase. Morara exiryke Aparão poe tãtakenahtose toto 14me Tawi enurutopõpyry pona. Ẽ xia ropa, Tawi poe Izyraeu tõ arotopõpyry pona Papironia pona, morararo toemũkuase ropa toto 14me. Morotoino Izyraeu to arotopõpyry poe Ritonõpo nymenekahpyry enurutopõpyry pona 14me toemũkuase ropa toto.
Jezu Kyrixtu enurutopõpyry
(Ruk 2.1-7)
18 Mame ynara Jezu Kyrixtu enurutopõpyry kynexine. Maria Jezu eny tymenekase Joze a typytyme repe. Yrome oximaro exipitopyra ro tahtao xine poetoẽme toehse nohpo Ritonõpo zuzenu poe. 19 Mame mokyro Joze zae exikety kynexine. Nohpo poetoẽme eneryke tyya iniome se pyra toehse ynororo repe. Yrome jarao Maria hxirory se pyra kynexine. Morara exiryke tõsenetupuhse irumekary poko. Tokare pyra rokẽ irumekary se toehse ynororo repe. 20 Mame moro poko aemynyhmaryhtao ro taosenehkase ynororo Ritonõpo a. Ynara tykase Ritonõpo nenyokyhpyry aosenety eya,
—Aimo Joze, Tawi paryme mase. Etako pahne, torẽtyke pyra exiko Maria poetoẽme exiry poko. Mokyro apoiko opytyme. Ritonõpo zuzenu poe poetoẽme mã ynororo. 21 Enurũko mana orutuame. Mame Jezume mokyro esehpãko mase. Ynara exiryke, typoetory tõ kurãkãko mana. Toto rypyry korokãko roropa mana. Morara exiryke Jezume esehpãko mase, tykase sã mokyro Ritonõpo nenyokyhpyry Joze a aosenety.
22 Morara toehse emero Ritonõpo omihpyryae ro. Pake ynara tykase Ritonõpo exiryke urutono a,
23 “Nohpo mã poetoẽme exĩko, orutua maro exipitopyra ro tahtao.
Mame enurũko mana orutuame.
Mame esety Emanueume exĩko,”
tykase ynororo Ritonõpo poe pake. (“Emanueu,” kary, “Ritonõpo kymaro xine mana,” kary epereu omiryae.)
24 Morarame typakase ropa tahtao Ritonõpo nenyokyhpyry omipona toehse ynororo. Maria tapoise eya typytyme. 25 Yrome typyty maro pyra kynexine aporo aenururu ponãmero. Mame tonuruse ahtao Jezume tosehpase eya.