Ecclesiastes
Ya meippanggep eyan libluh ni Ecclesiastes
Ya nengitudek eyan libluh ey hi Solomon. Ya eyad libluh ey neitudek hu humang eyan kantuy: “Kaw wada hu silbin biyag eyad ta-pew ni puyek?” Heninnuy hu neamtaan tu: “Endi silbin biyag eyad ta-pew ni puyek hedin endi hi Apu Dios di biyag tayu.”
Impeamta etan ni nengitudek eyan libluh ida etan kamepennidwan kameipahpahding eyad ta-pew ni puyek. Pinhed etan ni nengitudek eyan libluh ni amtaen ida etan ni memidbid e ya biyag ni hakey ni tuu eyad ta-pew ni puyek ey makulug ni endi hu silbitu hedin eleg tu ibbilang hi Apu Dios di biyag tu. Et humman hu, makahhapul ni idaydayaw tayu hi Apu Dios di biyag tayu niya mandinnel itsun hi-gatu. Yadda etan tuun mengippahding ni nunya ey panyaggud Apu Dios hu biyag da eyad ta-pew ni puyek.
Ya neitudek eyad libluh:
1. Ya biyag ey heni endi hu silbitu tep yallin edum ni aggew ey mettey itsu niya endi hu tayu ellan ni hipa humman ni nan-aatuan tayu eyad ta-pew ni puyek. (chapters 1–2)
2. Nem hi Apu Dios ey wada hu planuh tun hi-gatsun mategu eyad ta-pew ni puyek ni keiphedan tayu niya keiddeyyawan tu. (chapters 3–10)
3. Yallin edum ni aggew ey mepappeg hu biyag tayu eyad ta-pew ni puyek, et humman hu mahapul ni meiddeyyaw hi Apu Dios di biyag tayu. (chapters 11–12)
1
Emin ey endi silbitu
1 Huyyadda in-inhel etan ni mittuduh e u-ungngan David e patul lan nunman. Huyyan mittuduh ey nambebley di Jerusalem. Heninnuy kantu:
2 Emin ey endi silbitu. Em, emin ey endin hekey silbitu.
3 Hipa gun-uden ni tuun umngunungunu?
4 Kamanhinhinullul hu tutu-u, kamangkei-ungnga edum ey kamangkettey edum, nem kamannananeng hu puyek e eleg mehulluli.
5 Henin aggew e simmimil ni nelinug ey anggegannu mewan ni nambangngad di simmilan tu.
6 Heni mewan ni dibdib e nampalaw di south ni nampalaw mewan di north e kamambinbinangngad.
7 Yadda dama kulukul niya wangwang ey ida kamampellaw ni emin hu danum dad baybay nem kapyatun eleg mepnu et eleg mehewwal. Ey nambangngad ida mewan humman ni danum di kulukul niyad wangwang ni nalpuan da.
8 Kamengippeinglay hu neitu-wan. Eleg mehingla hu matan daka ennang-anga ey eleg mehingla hu tangilan daka deddedngela.
9 Humman metlaing hu kamekapkapya e endi edum tep yadda etan neipahding ni nunman hu kameipahpahding ni nunya. Emin hu hipan wadad eyad ta-pew ni puyek ey wada dedan ni nunman.
10 Wadadda na-mu menghel ni kanday “Yan nunyan ebuh hu wada hanneya.” Nem eleg, tep neipahding dedan lan nunman ni eleg itsu pay ni maiungnga.
11 Ey mukun hanniman, ey tep eleg hengngudaddan tuun nemnemnemen hu neipenahding lan nunman. Ey henin nunman idalli dama hu mangkei-ungnga e eleg dalli hannemnem hu kameipahpahding ni nunya.
Endi silbin laing
12 Hi-gak ey mittuduhhak niya patullak di Israel ey nambebleyyak di Jerusalem.
13 Impahding kun emin hu kabaelak ni mengewwat ni emin ni hipan kamekapkapya eyad ta-pew ni puyek. Ey neawatan ku e nekalligat hu neitu-wan ni indawat Apu Dios ni tuu.
14 Emin hu wada eyad ta-pew ni puyek ey endi silbitu e heni kapeppepduga hu dibdib.
15 Yadda nepiku ey eleg mabalin ni andengen ey eleg mabalin ni pekibbillang hu endi.
16 Kangkud nemnem kuy “Nelalla-ingngak ey daddakkel inamtak niya daddakkel hineniktamak nem yadda la edum ni nampatul eyad Jerusalem.”
17 Impahding ku mewan ni emin hu kabaelan ku ma-lat amtaen ku hu eleg pan-ingngehan ni kalinaing niya kakinulang ni nemnem. Nem anin huyya et endi silbitu e heni kapeppepduga dibdib.
18 Hedin kamangke-dumi kalinaing ey kamangkema-ma lemyung. Hedin kamangke-dumi inamta ey kamangke-dumi degeh ni nemnem.