1 Joun
Olo Iyoswo Sɨmoꞌmjo loso Joun Mtɨꞌmokumentisofoho.
Olo Hungkuno sɨmoꞌmjofoho.
Jisas ahwomomneꞌno nto sɨmentiso sohonta soswo foutiꞌnji (40) sikɨsɨtiꞌnji (60) nto uyakoloꞌmentiso ajwo sopolɨkeno olo iyoswo sɨmoꞌmjo loso Jisasɨye inomokomoyo Joun mtɨꞌmokumentisofoho. Joun sohwo iyoswo sɨmoꞌmjoso nto mtɨꞌmokumentisohwo olo nomꞌne loso mtɨꞌmokumentisofoho. Hungkuno hwapɨngoso afafoho. Osoꞌno hofɨko huno olenoho. Olo iyoswo loso Joun mtɨꞌmokumentisofoho. Hofɨko huno ole, olo iyoswo loso Joun kako aꞌamu hwaho engo Esiya angoꞌmmeemjo Jisasɨmo inɨngkunyo somneꞌno mtɨꞌmokuyahotɨmentisofoho. Joun oso aꞌamu hwasyo hungunoꞌnjo aꞌamu Nosɨtikɨso hofɨko aꞌamu Jisasɨmo inɨngkunyofe sɨmeho hiꞌntnnonohino somo wonyo umokontanɨngkofi yokumpohnꞌnyo umokumonto mtɨꞌmokumentisofoho. Olo iyoswo homo lomjo hungkuno hwapɨngoso olenoho. Sɨmeho uyosoꞌno huno syafɨhunoho. (Hungkuno hiso 1 Joun sohe engo 2, honɨngkano weꞌe 5. Osopo weho.) Olo iyoswo hiloso Joun ango ntɨpo humanto mtɨꞌmokumentisotɨkeno. Osoꞌno nakwo huno monayofoho. Osoꞌno nakwo olo iyoswo homo lomo atofo lɨhwasi tɨfi unɨngkohwano.
1
Jisas songo neꞌno humayoꞌne hungkunoso hwapɨngo hweho.
1 Jisas Kɨlaisɨmneꞌno ngko ifalifaliyo wamtɨꞌmokumoneꞌno yohono. Kako songo humayoꞌne hungkuno hwapɨngo hweho. Nakwoe hwaho mamtɨꞌmokiyo sohonta Jisas kako neꞌno humamojo hweho. Nakwo kakoe hungkunomo nupoꞌnontani kakoe sɨmoꞌmangomo tɨmo nuhwonontani kakoe aꞌapahomo aho upmꞌmokumentɨhwonefoho. Osoꞌno nakwo kakineꞌno hungkuno selalokuhwono. 2 Olo songo humayo hwapɨngo lohwo kako utɨhwaꞌnyopo iꞌmofopahonɨngki nakwo uhwonɨmentɨhwonefoho. Uhwonɨmentɨhwone soꞌno kakineꞌno hungkuno songo neꞌno humayoꞌne selalokuhwono. Kako Anɨtuye hungkuno huhwo lohwo kako aꞌamu imoꞌnonto utɨhwaꞌnyopo iꞌmofopahonɨngki uhwonɨmentɨhwonefoho. 3 Yoꞌmayo hopiꞌnono upaꞌnɨmentɨhwone soꞌnji uhwonɨmentɨhwone soꞌntnneꞌno selalokuhwono. Osoꞌno sekwoꞌnji nakwoꞌnji sɨmeho afa ufohiꞌnyoꞌne uyantaneꞌyɨhwono. Nakwoꞌnji Mpohwo Anɨtuꞌnji kakoe Hwomu Jisas Kɨlais sohwoꞌnji sɨmeho afa ufohiꞌnɨngkuhwone hopaso sekwoꞌnji sɨmeho afa ufohiꞌnano. 4 Olo hungkuno semtɨꞌmokiyalokwe loso tɨfi inɨngkafijoꞌmanji nakwoe sɨmehoꞌnji sekwoe sɨmehoꞌnji wopɨngoꞌnohini umoꞌnɨmontonoho.
Nakwo honɨngkano wopɨngomnohini wemoyɨhwano.
5 Olo hungkuno Anɨtuye hwomu nalɨmentisoso selalokuhwono. Hungkuno ole, Anɨtu kako wopɨngoꞌnohinoso hwapɨngo hweho. Kako wonyo honɨngkano nɨhuꞌno ane hweho. 6 Osoꞌno nakwo Mpohwoꞌnji sɨmeho afa ufohiꞌnano kolɨhwasi nakwo honɨngkano wonyomo oseno mohumentanɨngkuhwasɨꞌmanji nakwoe hungkuno hiso hwasyofoho. Nakwo mangoꞌnohinoꞌnwoho.
7 Nakwo Mpohwoe hungkunomo inɨngkowasoso Jisas kako inɨngkawowoꞌnɨngkiso paꞌnyoso nakwo aꞌamu hwahoponjo soꞌnyuye sɨmeho afaꞌnjo wohumantanoho. Ose ihwasɨꞌmanji Jisas Anɨtuye Hwomu sohwoe honɨyo nakwoe wonyo wae enaofɨhwosoꞌno nakwoe sɨmeho kihoꞌmasoꞌnji wohumantanoho.
8 Nakwo wonyo aneꞌnwoho hnnasoꞌmanji nakwoe sɨmehomneꞌno hwasyo hnnalokuhwono. Hungkuno neso nakwoe sɨmehomo monauyoho. 9 Nakwoe wonyo yoloho lɨjwaofasoꞌmanji Anɨtu wopɨngoꞌnohini iwoꞌnɨngkiso sohwo kako monesɨkwajonehoho. Oꞌo, kako nakwoe wonyo wae enaofɨhwosoꞌno nakwo sɨmeho kihoꞌmasoꞌnji wohumantanoho. 10 Nakwo ole hnnaso, Ngko wonyo ane hwoꞌnyoho. Ose hnnasoꞌmanji nakwo Mpohwo Anɨtu sohumneꞌno hwasyo hweho lalokuhwono. Kakoe hungkuno nakwoe sɨmehomo monauyoho. Hwapɨngoso Anɨtu nalohoho, Aꞌamu hopiꞌnono wonyo hiꞌnjo kuyoho.