AÚPÁ BARÉEIN BAYA MA SIAN DÁKÓ UKHEIN BOMPON MINO
(Revaresen)
Aúpá Baré ein Baya Ma Sian Dákó Ukhein Bompon Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Yonin ma Patmosi Musóká do siantan karan o váken mi uvaren mino.
Uvarein orana ino.
AD sikisti-eiti (68) ráké seventi (70) ráké mai aúban mino. Romúke kin Nero ma vanasi aruan puriyá ein pimpái uvanten mifo AD seventi (70) fin Yerusaremí baru ídá ira saman kaúkan nafi áa AD nainti (90) ráké nainti-faipi (95) rá ma Kini Domisiani ano ma vanasi uman amen aruan puriyáin ma veni kin doran mo khípein orana kayo fin mino. (AD eiti (80) ráké nainti-sikisi (96) ráké mai aúban mino.)
Ma vompon ma uvantein baru ino.
Esiá barafin áau orun perapá Eisiní un nompin bain musó Patmosí ino.
Ma vompon ma uvaman amikhein kéká ino.
Mai ma yan manápá ifo afápá kan un kádan monó namun kayo ma Esiá barafin bákan aví tikhein kayo vá inká minó akhempá ma Yisasintá monó ten oriyan ban nain nanin banta vá ino.
Nái ana vará ma vompon uvanten nafino.
Enará ukhein danasinta van ma sakhanampaí uádan aúpá baré ein ma sian amá ukhein bompon ma Yisasi ano Yonin amein nan mino. Esé Araíin Bompompin (Esé Araíin Bompon 1-11) ma vain banasi ano ma umeí uren Tiyarafenun me ampiren orein bayan tian amá ukhen mino. Ma vompon mano mai ma umeí uren Tiyarafenun me ampiren nentá orikharen ma aú baéden ará manafiní in doran ma Yisas Karaisi ano maman dákó ukhein mi sian amá ukhen mino.
Aúpáke Yanasinta ma Maman Dákó Ukhein Mai:
Esiá barafin ma vain monó namun kayofin Romu kamanin mano uman amiyan ma inká baru finté uman amiyan ma iyain nan mi amaan baya sikhen mino (1:1–3:22). Inká Tiyarafenui Sipi sipi Arará ano ma savore sópe an dakhein mai:
1. Tiyarafenu ano ma ma vara yaimin nain (4:1–19:10)
2. Namu avúavá ma maman bararasí inain (19:11–20:15)
3. Auyen bara vá inaru vá ma erin nain mai auyen Yerusaremí ino (21:1–22:5).
Mo khípan baya maen Karaisi ma vanasifin tiádan bain mino (22:6-21).
1
Esé Araí In Baya Ino
1 * Rev 22:6Pefá ma aúpá baré ein danasinta ma e unen dákó ono van iyan maen Yisas Karaisi ano vei yoran banta kayo aní ino van Tiyarafenu ano mai yaná béin amen mino. Máan turan mai yaná maman dákó ino van mana enisori siantan bei yoran banta Yoni vaípá oren mino. 2 Mo aní in ma ódaren maen Tiyarafenui vaya vá Yisas Karaisini avúavá bá puntáden tiamen mino. 3 * Rev 22:7, 10Ma sakhanampa vaya ma yankáan monó nanin banta amin nain kéká bá inká mai vaya iniren ma mai ánain dakhafin nain kayo vá Tiyarafenu ano avábá aminten mino. Para vara seyo, mai yanasinta ma yákó inain damú inka ádesí iyan mino.
Dan Manápá Ifo Afápá Kan Un Kádan Monó Namumpin Ma Mumunan Nanin Banta Van Ma Yoni Amusin Baya Siantein Mino
4 * Eks 3:14-15; Rev 3:1; 4:5Téi Yoni anon dan manápá ifo afápá kan un kádan monó namun kayo ma Esiá barafin ban ma maifin mumunan nanin banta vaípái mai vompon uvamádékun oren mino.
Mai ma fefá baren taréa van ma inká ínaimpá dere ma fara van nain má inká dan manápá ifo afápá kan un kádan Aunan kéká ano ma Tiyarafenui kin kará aufá bain mái sarisari vá kusin má ano vá tiretin má bano. 5 * Íbo 89:27; Kor 1:18Inká Tiyarafenui vaya ma funtáden tian dákó en ma inká purin pinté an uanten orun mantaven ma ma vara ráke kin kayoi ánon bantaí ma ukhein banta Yisas Karaisini sarisari vá kusin má ano yere vá tiretin má bano.
Mai ma setin avábá uren ma vei narefó ma umei karavusi fintena útútintein banta avisá daní ó tifano. 6 * 1Pi 2:9; Rev 5:10; 20:6Be Afóe Ayarafenui monó doran bantaí uven Tiyarafenu vá barará nanin banta vá aúban báken dorarí ino van mi véi ano setin tivían bei yafisin aúpin kaúken mino. Mai vará béin moéke kákan bí amesin ná beni yafisin doran mano fara van oriyan bano. Pura.
7 * Dan 7:13; Sek 12:10; Mat 24:30; Yon 19:34-37; 1Te 4:17Onano. Konan daró béi erintin maen
minó auu ano oniyantin
inká mai ma véin ayorampin ma vankampó antáká ein kéká bá ano yere oniyantin maen
ma varai minó akhen pákena nanin banta ano véin nan ifí danten mino.
Pura ino.
8 * Rev 21:6; 22:13Bafan Tiyarafenu ano máa sikhen mino. “Téi maé Araíin má Kípan mái vá uno.* Kiriki vaya finté Arfa vá Omekha va se ma siyain mai Araíin má Kípan má unon tiyan mino. Revaresen 21:6; 22:13 fin dere vá onano. Mai ma fefá baré taréa vá ma inká ínaimpá dere ma fara vá ma Moékan Ákona vá Banuna uno.”
Yonin Auu Vaédan Ma Yisasin Onein Baya Ino
9 Téi Yoni siretin afá aváe uno. Yisasin oo yaiyé Tiyarafenui yafisin aúpin tiretin má mana yoran bantan báké tirá kusin pinté ara ara uman bariyá tiféuno. Tiyarafenui vaya vá Yisasini vaya vá ma sian dákó eruna van mi Patmosi musóká tiviren mo karavusií urá baré uno. 10 Bafani yamú afoká uví bentá monó tiyá ékun toyampáké mana oova ano ufen ma aseiníen máa semí, 11 “Ma ma oneona yanasinta vompon dókifin uváde vá dan manápá ifo afápá kan un kádan monó namun kayofin ma mumunan nanin banta vaimpin ná dan orino. Mai monó namun kayo maen Efesasií Simenaí Pekamamií Taiatairaí Sadisií inká Firaderfia vá Raodisia vá ino.
12 Mai ma soyampáké ma vaya siyain onano siré dovaébé onékun maen dan manápá ifo afápá kan un kádan oon uruan dankará intánuran baren mino. 13 * Dan 7:13; 10:5Máan tukhan mai ma oon uruan intánukhein danka kayo aúbaná mana Vanta Anin ma einí ukhein mano arantantá aravukhein ayá buí daná uren inká akhoní in ma korifó uvanteimpó akhoní uren baren mino. 14 * Isi 43:2; Dan 7:9; 10:6; Rev 2:18; 19:12Béin ánon do ano efan ankará íkan inká auufenté ira ma anamuná einí iyaren mino. 15 Máan tiyan maen béin arantan mano aeni ma irafin iyó uran ma karo kharo einí iyákan inká beni vaya ano non iya ma káosiyan avaya seiní iyan mino. 16 * Ibu 4:12; Rev 2:12; 19:15Máan tiyan maen inká dán manápá ifo afápá kan un kádan ofu ve ayan kurompá pákakhan inká míkan akhempá an ukhein baenati ano ven oo fenté e unen mino. Máan tiyan maen ben auná pinté áau ano ma moékentá panu seiní iyaren mino.
17 * Ais 44:6; 48:12; Rev 2:8; 22:13Máan tukharéí ma mo oné ben arantampin o sinkamé purin an davékun maen ayan kuron pákena yámampó ten timaniná kaúden máa semí, “Téi maé Araí in má Kípan má umpo ída vá akhokho van ono. 18 Téi maé para van oriyan ban mi varéi fúkaré umpo saréa ayun para vá oriyá banté uno. Máan tukhéi furin má beni aron ída van masípin ma ira khiyain tákena khi vá pákakhé uno.
19 “Máan tukheruna van mi mai ma saréa yákó inain danasinta vá inká ínaimpá ma yákó inain danasinta vá ma oniyaona vá bompon dókifin uvarano. 20 Mai ma yan manápá ifo afápá kan un kádan ofu ma siyan kurompá páké ma inká yan manápá ifo afápá kan un kádan oon kayo vá ma uruan korifó uvantein dankará ma intánuran bákan ma oneonai ana vaya mai máan mi ukhen mino. Dan manápá ifo afápá kan un kádan ofu maen mai ma yan manápá ifo afápá kan un kádan monó namun kayo ma vain pintena enisori kékái van mino. Inká dan manápá ifo afápá kan un kádan oon ma uruan dankará intánuran bain maen mai ma yan manápá ifo afápá kan un kádan monó namun kayo ma vain mino.
*1:4: Eks 3:14-15; Rev 3:1; 4:5
*1:7: Dan 7:13; Sek 12:10; Mat 24:30; Yon 19:34-37; 1Te 4:17
*1:8: Kiriki vaya finté Arfa vá Omekha va se ma siyain mai Araíin má Kípan má unon tiyan mino. Revaresen 21:6; 22:13 fin dere vá onano.
*1:13: Dan 7:13; 10:5
*1:14: Isi 43:2; Dan 7:9; 10:6; Rev 2:18; 19:12
*1:16: Ibu 4:12; Rev 2:12; 19:15
*1:17: Ais 44:6; 48:12; Rev 2:8; 22:13