BABYOR NI
JONAH
Murung’agen e Re Ke Babyor Ney
Fare Babyor ni Jonah e bay riy murung’agen ba profet ni guy rogon ni nge dabi fol ko tin ni yog Got ngak ni nge rin’. I yog Got ngak ni nge yan nga Nineveh nib binaw nib ga’ u Assyria, ma girdi’ nu Israel nge yu Assyria e yad ba togopluw. Mi Jonah ni be’ u Israel e dabun ni nge yan i yog e thin rok Got ngak e girdi’ nu Nineveh, ni bochan e richey miyad pi’ keru’rad ko denen ni yad be ngongliy me runguyrad Got nge dabki kirebnag e binaw nu Nineveh. Me munmum me fol Jonah rok Got, ma fa’ani gu’ nde kirebnag Got e binaw nu Nineveh me kireban’.
Murung’agen Jonah e be dag ni Got e bay gelngin nma gagiyegnag e tin ke sunumeg, ma ku be dag ni Got e ba t’uf e girdi’ rok mma runguyrad. Ya mus ko pi to’ogor rok girdi’en ni aram yu Israel ma ba’adag ni nge n’ag fan u wan’ e denen rorad nge ayuwegrad, ma dabun ni nge gechig nagrad me thang e pogofan rorad.
Gathon e Re Ke Babyor Ney
I Jonah nni pining made fol 1:1–17
Jonah ni pi’ keru’ ko kireb nge mat’aw 2:1–10
Thin rok Jonah nib togopluw nga Nineveh 3:1–10
Wurengan’ rok Got nga daken yu Nineveh 4:1–11
1
Jonah nde fol rok SOMOL
1 Reb e rran me non SOMOL ngak Jonah nib mo’on ni fak Amittai. 2 Ni ga’ar, “Man nga Nineveh, ni fare binaw nib ga’, ngam welthin nib togopluw ngay; gub na’ab nga feni kireb e girdi’ riy.” 3 Machane me mil Jonah rok SOMOL nge yan nga Tarshish. I yan nga Joppa, me pir’eg ba barkow u rom ni be n’en ni nge yan nga Tarshish; me pi’ puluwon nge un nga daken me cheag ngak e sala ko re barkow nem ngranod nga Tarshish, nike mal’af rok SOMOL.
4 Machane me pi’ SOMOL bangi nifeng nib gel nge yan nga regur; me cham e lang ngorad nib gel nge yan i par ni be chugur ni nge pil fare barkow. 5 Ma urngin fapi sala nrusgad miyad tolul nra bagyad ma be man ayuw ko birok e got. Miyad yin’ e chugum nu barkow nga maday, ni nge ba’ud e barkow. Ma ngiyal’ i nem ma ke yan Jonah i mol nga mayum ko barkow, ni kari mol.
6 Me yib e kapten ko i pir’eg u rom me ga’ar ngak, “Mang e kam rin’ ni kam mol? Mu od ngam meybil ngam ning e ayuw ko got rom. Ya sana ra runguydad, me siy ku da m’ad.”
7 Me ga’ar fapi sala, “Ngad girngiyed e pow ngad nanged e cha’ ni nga don’ed e kireb nga daken ko re riya’ ney ni keb ngodad.” Miyad rin’ ni aram rogon, me yan i m’ug ni Jonah. 8 Ma aram me lungurad ngak, “Ere chiney e ngamog ngomad! Mini’ e kireb rok e ren’ey? Mang e kamrin’ ngaray? Mang nam e mub riy? Ga be’ u uw?”
9 Me fulweg Jonah ni ga’ar, “Gu ba Hebrew; gu ma liyor ngak SOMOL, ni fare Got nu tharmiy, ni ir e sunumiy e binaw nge day.” 10 Me rus fapi sala, me lungurad ngak, “Rib kireb e n’en ni kam rin’!” Ya kar nanged ni be mil rok SOMOL, ya ke weliy ngorad.
11 Ma fare yoko’ e be gel i yan, me ga’ar fapi sala ngak, “Mang e nggu rin’ed ngom me mocha’ e day ngodad?” 12 Me fulweg Jonah ni ga’ar, “Mon’ed gag nga maday, me mocha’ e day ngomed. Gu manang ni gag e kireb rog ma ke aw e re yoko’ ney ngomed.” 13 Me maman fapi sala nge musmus rogorad ni yad be guy rogon ni nge thap fare barkow ko binaw, ma de yag ya be gel fare yoko’ i yan. 14 Ma aram miyad yog ngalang ngak ni lungrad, “SOMOL, gamad be meybil ngom ni dab mu li’mad nggu m’ad ni bochan e pogofan rok e re pumo’on ney; I gur SOMOL e bmil fan e pin’ey ngom; gur e mu rin’ e n’en ni ga ba’adag.” 15 Miyad chibiy Jonah nga ron’ed nga maday; ka chingiyal’nem me mocha’. 16 Me par fapi sala ni kar tamdaggad ngak SOMOL, miyad pi’ ba maligach miyad micheg ni ngu’ur pigpiggad ngak.
17 Me l’oeg SOMOL ba nig ni ba ga’ nge yib i ful’ Jonah; me par Jonah u lan yin fare nig ni dalip e rran nge dalip e nep’.
DRAFT VERSION — Proofreading in progress