1 Got e ke runguydad ke pi’ e re maruwel ney ngodad, aram fan nder mulan’dad. 2 Kad paged urngin e ngongol nib mith ni yima tamra’ ngay; darid ngongolgad u fithik’ e sabanban fa reb e gadad be pingeg fan e thin rok Got ngad ban niged e girdi’ ngay. Gadad be weliy e tin nib riyul’ nib tamilang, ma gadad be par u p’eowchen Got ma gadad be guy rogon ni nge guy e girdi’ e ngongol rodad miyad nang u lanin’rad ni aray rogon. 3 Ya fa’anra der tamilang u wan’ be’ fare Thin Ni Bfel’ ni ir e gadad be machibnag, ma kemus ni pi’in kar maloggad e der tamilang u wun’rad. 4 Der mich u wun’rad ni bochan e fare kan nib kireb nu roy u fayleng e ke tay lanin’rad u fithik’ e lumor. Ya ke ta’rad ndab ra guyed ram’en fare tamilang ni be mat nga dakenrad, ni fare tamilang ni be yib ko fare Thin Ni Bfel’ ni murung’agen e fla’ab rok Kristus, ni Kristus ni ir e ri ta’reb rogorow Got. 5 Gathi murung’agmad e ir e gamad be machibnag ngak e girdi’, ya gamad be machibnag ni Jesus Kristus e ir e Somol, ma gamad e tapigpig romed ni bochan Jesus. 6 Fare Got ni ir e yog ni ga’ar, “Nge m’ug e tamilang u fithik’ e lumor!” e ku ireram e re Got ni ir e ke tamilangnag an’mad kug nanged e fla’ab rok ni be gal ram’en u owchen Kristus.

7 Machane gamad e pi’in bay romad e ren’ey ni bfel’ ni pi’ fare Kan Nthothup e gamad bod e rume’ ni but’, ni nge m’ug ni re gelngin nem ni ir e ba th’abi gel e yib rok Got, ma gathi gamad e yib romad. 8 Pire’ yay nike ingmad e gafgow ke pir’iymad u gubin yang, machane da gu masengsenggad; yu ngiyal’ e bay n’en ma da ku gu nanged e n’en ni nggu rin’ed, machane der mulan’mad; 9 pire’ e girdi’ ni be togopluw ngomad, machane dariy ba ngiyal’ ndariy ta’abe’ ni fager romad; ba gel e maad’ad ni yibe tay ngomad yu ngiyal’, machane dawor nthang e fan romad. 10 Dowmad nra yim’ e gubin ngiyal’ ni be yan u thathren e riya’ ni bod rogon e n’en ni i rin’ Jesus, ni fan e fos ko yam’ ni tay e ngki yag nni guy romad. 11 N’umngin nap’an e yafos romad ko biney e tamilang e gubin ngiyal’ ni be chugur e yam’ ngomad ni bochan Jesus, ni fan e nge m’ug pangin ko re dowef romad ney, nib dowef nra yim’. 12 Fan e ren’ey e yam’ e be lekmad; ma yafos e be maruwel u fithik’med.

13 Be yog e babyor nib thothup ni be ga’ar, “Kug welthin ni bochan e ke michan’ug ngak Got.” Ere ireram rogomad ni ka gamad be welthin ni bochan e ke michan’mad ngak Kristus. 14 Ya gamad manang ni Got ni ir e faseg Somol Jesus ko yam’, e ku ra fasegdad ko yam’ ni bod Jesus, me chagiydad nga ta’bang u p’eowchen. 15 Urngin e pin’ey ma gimed e fan ngomed; ma bay i yo’or e girdi’ i yan ni be taw e ayuw rok Got ngorad ni bochan e be runguyrad, ma bo’or e meybil ni bay ra pi’ed ni yad be pining e magaer ngak Got, ni aram e yad be tayfan.

16 Ireray fan nri der mulan’dad. Yugu ra be wod dowdad i yan, ma lanin’dad e yibe be’echnag u reb e rran ngu reb. 17 Re gafgow ney ni gadad be tay nib gafgow nib achig ma dabi n’uw nap’an me m’ay e bayi fek i yib ngodad ba fla’ab ni ba ga’ ni dabi m’ay bi’id, nri kab gel feni ga’ ko re gafgow ney. 18 Ya gathi pin’en ni yibe guy nga owchey e ir e ke l’agan’dad ngay, ya pin’en ndanir guy nga owchey. N’en ni yibe guy nga owchey e bayi m’ay; ma n’en ndab ni guy nga owchey e bay i par ndariy n’umngin nap’an.