GIN M’ON E BABYOR NI PI’
JOHN
Gin m’on e babyor ni pi’ John e bay riy l’agruw ban’en ni ba ga’ fan. Ba’adag John ni nge ayuweg girdi’en Kristus ngar pired ni kar ta’ab girdi’gad Got nge Fak ni Jesus Kristus. Ma bin migid e fonow nagrad nge dab ra folgad ko machib ni go’ bogi ban’en, ya nge kirebnag thilrad Got nge Fak. I leamnag e pi tamchib nem ni urngin e kireb e ma yib u daken e par ko re fayleng ney. Aram fan nde mich u wun’rad ni Jesus e yib i ngal’ nib girdi’, ma yad ma weliy murung’agen e tin nu fayleng ban’en, mma motoyil e girdi’ nu fayleng ngorad ni bochan e mmil farad nga fayleng. Ma dar nanged kanawo’en ni ngan thap ngak Got u daken e yam’ ni tay Jesus ni Fak e Girdi’.
I John e yoloy nib tamilang ni Jesus e riyul’ ni ngal’ nib girdi’, ma urngin e pi’in ke mich Jesus u wun’rad me t’uf Got rorad e nge t’uf bagayad rok bagayad.
Tin ni bay riy
Tabolngin 1:1–4
Tamilang nge lumor 1:5—2:29
Pifak Got nge pifak mo’onyan’ 3:1–24
Tin nib riyul’ nge tin ni gathi riyul’ 4:1–6
Thingar ni par nib t’uf be’ rok be’ 4:7–21
Gel ni yira tay u daken e michan’ ngak Kristus 5:1–21
1
Fare thin ni murung’agen e yafos
1 Gamad be yoloy ngomed murung’agen fare Thin ni murung’agen e yafos, ni ki immoy ko tabolngin: kug rung’aged, ma kug guyed nga owchemad; errogon, kug guyed, ma ke math pa’mad ngak. 2 Ma nap’an ni yib i m’ug e re yafos nem ma gamad guy, ere gamad be weliy murung’agen ma gamad be weliy ngomed murung’agen e yafos ndariy n’umngin nap’an ni i par rok e en ni Chitamangiy mi nib ndag ngomad. 3 Ma tin kug guyed ma kug rung’aged e gamad be yog ngomed, ni fan e ngam uned ngomad ngad ta’ab girdi’gad e en ni Chitamangiy nge en ni Fak ni Jesus Kristus. 4 Kug yoloyed murung’agen e ren’ey ni fan e nge yag ni yan i libug e felfelan’ rodad.
I Got e tamilang
5 Ba’aray e thin ni kug rung’aged rok Fak ni nggogned ngomed ni nge lungumad: I Got e tamilang, dariy bochu’uw e lumor u fithik’. 6 Ere fa’anra lungudad e kad ta’ab girdi’gad nike ta’reban’dad, ma ka gadad be par u fithik’ e lumor, ma aram e gadad be ban ko tin gadad be yog nge tin ni gadad be rin’. 7 Machane fa’anra ud pired u fithik’ e tamilang — ni bod ir ni bay u fithik’ e tamilang — ma aram e kad ta’ab girdi’gad nike ta’reban’dad, ma racha’en Jesus ni Fak e ir e be be’ech nagdad u urngin e denen rodad.
8 Fa’anra lungudad e dariy e denen rodad, ma aram e gadad be ban nagdad ma tin nib riyul’ e dariy u fithik’ i lanin’dad. 9 Ma fa’an gadad ra weliy e denen rodad ngak Got mrayag ni ngad pagan’gad ngak, ya tin nib mat’aw e ra rin’ — ya ra n’ag fan u wan’ e denen rodad me be’ech nagdad u urngin e kireb ni kad ngongliyed. 10 Fa’anra lungudad e dawor da denengad, ma aram e kdogned ni Got e be’ nma lifith l’ugun, ma aram e dariy e thin rok u fithik’ i lanin’dad.
DRAFT VERSION — Proofreading in progress