1 Ɛ xa Alatala maxɔdin

a xa tulen nafa ɛ ma ɲɛmɛn na.

A tan nan foyen nakelima,

a yi tule gbeen nafa

a yi birin ma xɛɛn nasabati.

2 Amasɔtɔ wule falan nan suxurene ra.

Yiimatone wule feene nan toma.

E wule xiye falane nan tima!

E madɛndɛnna tima fala fuune nan na.

Nanara, yamaan bata siga a xun xɔn,

e tɔrɔxi

alo kari mi xuruseen naxanye ma.

3 N bata xɔlɔ na xuruse rabane ma han!

N yɛɛratine hakɛne saranma e ra nɛn.

Amasɔtɔ Alatala Sɛnbɛn Birin Kanna

a ɲɔxɔ luma nɛn a kurun xɔn,

a yamana, Yuda bɔnsɔnna.

A fama e ra nɛn yɛngɛni

alo a soo kɛndɛne.

4 Kuntigine sifan birin minima a tan nin.

Banxin tongon gɛmɛ kɛndɛn minima a tan nin.

Bubu wudin minima a tan nin.

Yɛngɛ so xanla minima a tan nin.

5 E luma nɛn alo sofa wɛkilɛxine

naxanye e yaxune yibodonma yɛngɛni

alo kira xɔn borona.

Bayo Alatala e xɔn,

e yɛngɛn soma nɛn,

e sofa soo ragine yarabi.

6 N Yuda bɔnsɔnna sɛnbɛ soma nɛn,

n yi Yusufu bɔnsɔnna rakisi.

N mɔn e rafama nɛn e konni

bayo n bata kininkinin e ma.

E luma nɛn alo n mi e rabeɲin.

Alatala nan n tan na, e Ala,

n na e maxandine yabima nɛn.

7 Efirami kaane findima nɛn sofa wɛkilɛxine ra.

E sɛwama nɛn alo e minxin na a ra.

E diine na toma nɛn, e ɲaxan,

e sɛwama nɛn Alatalaa fe ra.

8 N nan n ma yamaan xilima nɛn,

n yi e malan.

N na e xunbama nɛn,

e mɔn yi wuya alo a fɔlɔni.

9 Hali n to e raxuyaxi ayi siyane yɛ,

n ma fe rabirama e ma nɛn yire makuyeni.

E nun e diine yi kisi,

e mɔn yi xɛtɛ.

10 N na e rafama nɛn

keli Misiran yamanani

n yi e malan keli Asiriya yamanani.

N fama nɛn e ra Galadi nun Liban yamanani,

koni e mi xanɲɛ mɛnni.

11 Ala baan walanne ragodoma nɛn

e yi tɔrɔ baani gidi,

hali Nila baan tilinne xɔrima nɛn.

Asiriya yamanan wason kalama nɛn,

Misiran yamanan sɛnbɛn yi ɲan.

12 N tan nan e sɛnbɛ soma,

e yi sigan ti n xinli,

Alatalaa falan nan na ra.