12
E mangan naxanye nɔ
1 Mangane ni i ra Isirayila kaane naxanye nɔ, e yi e yamanane tongo Yurudɛn baan sogeteden binni, keli Arinon xuden ma han sa dɔxɔ Xerimon geyaan na, sa Yurudɛn mɛrɛmɛrɛne fari sogeteden binni. E itoe nan nɔ:
2 Amorine mangan Sixɔn naxan yi dɔxi Xɛsibɔn yi. A tan nan ma mangaya yi kelima Arinon xude wunla ma, Aroyeri taan yi dɛnaxan yi siga han Yaboko xudena Amoni yamanan danna. Galadi yamanan fɔxɔ kedenna fan yi na nan kui. 3 A tan nan mɔn yi Yurudɛn sogeteden binna mɛrɛmɛrɛne xun na, keli Kinɛrɛti Daraan ma han Araba Daraan naxan xili Fɔxɔ Ige Darana, sa dɔxɔ Beti-Yɛsimoti taan na, han Pisiga geyaan san bun yiifari fɔxɔn binni.
4 E mɔn yi Ogo fan nɔ, Basan mangana, Refa bɔnsɔnna muxu dɔnxɛna nde. A yi dɔxi Asatarɔti nun Edere taane nin. 5 A tan nan yi mangayani keli Xerimon geyaan nun Salaka nun Basan yamanan birin yi siga han Gesuri kaane nun Maka kaane yamanan danne nun Galadi yamanan bode fɔxɔna, siga han Manga Sixɔn ma mangayaan fɔlɔdena, Xɛsibɔn taan mangana.
6 Musa Alatalaa walikɛɛn nun Isirayila kaane yi na mangane birin nɔ. Alatalaa walikɛɛn Musa yi e yamanan so Rubɛn bɔnsɔnna nun Gadi bɔnsɔnna nun Manase bɔnsɔnna fɔxɔ kedenna yii, mɛnna yi findi e gbeen na.
7 Mangane ni i ra Yosuwe nun Isirayila kaane naxanye nɔ Yurudɛn baan sogegododen binni, keli Baali-Gadi taani Liban lanbanni han sa dɔxɔ Xalaka geyaan na naxan tema Seyiri geyane binni. Yosuwe yi bɔxɔni itoe birin so Isirayila bɔnsɔnne yii, a bɔnsɔnne birin yi e gbee kɛɛn sɔtɔ: 8 geya yamanan nun Sefela geya yiren nun Yurudɛn mɛrɛmɛrɛne nun geyane lanban yirene nun tonbon yirene nun Negewi tonbonna. Siyani itoe nan yi dɔxi na yirene yi: Xitine nun Amorine nun Kanan kaane nun Perisine nun Xiwine nun Yebusune.
9 E taa mangan naxanye nɔ, ne xinle ni itoe ra:
Yeriko mangana,
Ayi taan mangan naxan yi Betɛli fɛma,
10 Yerusalɛn mangana,
Xebiron mangana,
11 Yaramuti mangana, Lakisi mangana,
12 Egilon mangana, Geseri mangana,
13 Debiri mangana, Gederi mangana,
14 Xoroma mangana, Aradi mangana,
15 Libina mangana, Adulan mangana,
16 Makeda mangana, Betɛli mangana,
17 Tapuwa mangana, Xeferi mangana,
18 Afeki mangana, Lasarɔn mangana,
19 Madon mangana, Xasori mangana,
20 Simiron Meron mangana,
Akisafa mangana,
21 Taanaki mangana, Megido mangana,
22 Kedesi mangana,
Yokanayimi mangan naxan yi Karemele yi,
23 Dɔrɔ mangan naxan yi Dɔrɔ yamanani,
Goyin mangan naxan yi Giligali yi,
24 e nun Tirisa mangana.
Na taane birin taa keden manga keden. E malanxina, manga tonge saxan e nun keden.