1 “Nxu nun n yɛɛne bata layirin xidi fa fala

n nama sungutunna mato kunfani.

2 Xa n na liga,

Ala nanse rafɛ n ma keli kore?

Ala Sɛnbɛ Kanna kɛɛn mundun nafama n ma keli kore?

3 Halagin mi fama tinxintareyaan xan xɔn ba?

Gbalon mi fama hakɛ kanne xan xa ba?

4 Ala mi n sigati kiin toma ba?

A mi n san funfune birin yatɛn kolon ba?”

5 “Na ma, n sigan ti nɛn fuyantenyani ba?

N sanne yi birama yanfan nin ba?

6 Ala xa n sa sikeli tinxinxin fari,

a yi n ma fɛtareya wanle to.

7 Xa n keli nɛn a kiraan xɔn,

xa n bɔɲɛn yi bira n yɛɛn fɔxɔ ra,

xa xɔsi yo yi lu n yiine ra,

8 nayi, n naxan sixi,

gbɛtɛ xa na don,

muxune yi n ma sansine matala na bɔxɔn ma.”

9 “Xa n bɔɲɛn kunfa nɛn ɲaxanla nde xɔn,

xa n dɔxɔ nɛn n dɔxɔ bodena ɲaxanla yɛɛ ra,

10 nayi, n ma ɲaxanla xa lu xɛmɛ gbɛtɛ bun,

e nun xɛmɛ gbɛtɛye yi kafu.

11 Amasɔtɔ xa n yi na liga nun,

n ma yalunyaan yi findima fe haramuxin nan na,

na yi findi hakɛn na kitisane naxan natɔrɔnɲɛ.

12 N ma kalan yi findin tɛɛn na

naxan yi n ganma han a n halagi fefe,

a yi n hɛrisigɛn birin kala.”

13 “N tondi nɛn kiti kɛndɛn sɛ n ma walikɛne xa ba,

e mawuga n fari waxatin naxan yi?

14 Xa n yi na liga nun,

n nanse ligɛ Ala na keli waxatin naxan yi?

A na na feen fɛsɛfɛsɛ,

n na a yabima nanse ra?

15 Amasɔtɔ a tan Ala keden peen nan nxu birin daxi,

e tan nun n tan nxu ngane kui.”

16 “N tondi nɛn tɔrɔ muxune maxɔdinna yabɛ ba?

N kaɲa gilɛne lu nɛn e yigitɛgɛni ba?

17 N kedenna donseen don nɛn ba,

n mi se so kiridine yii?

18 Anu, xabu n foninge waxatini,

n lu nɛn kiridine masuxɛ

alo e fafane.

Xabu n da,

n na n yengi dɔxi kaɲa gilɛne xɔn.

19 N yiigelitɔɔn to nɛn ba,

dugi mi yi naxan yii,

hanma tɔrɔ muxuna marabɛnna yi naxan ma,

20 n mi yi e marabɛri ba n ma yɛxɛɛ xabe dugi binyene ra,

alogo e xa duba n xa?

21 Xa n na n yiini te nɛn kiridin xili ma,

bayo n kitisane maliin sɔtɔma nɛn,

22 nayi, n tungunna xa ba n fanna ra,

n yii tɔnsɔnna yi bolon n tɔnxɔnna ra.

23 N mi yi na ligɛ bayo n gaxuxi Alaa gbalon yɛɛ ra,

n mi nɔɛ tiyɛ a yɛtagi a nɔrɔni

xa n yi na liga nun.”

24 “N yi n yigin sa xɛmani ba?

N yi a fala, n naxa,

‘I tan nan n kantan seen na?’

Ɛn-ɛn de!

25 N sɛwa nɛn n ma hɛrigɛ gbee kanyaan na ba,

n nafunla naxanye sɔtɔ?

26 N to sogen to xɔlɛ,

hanma n to kiken nayabuxin to kore xɔnna ma,

27 n bɔɲɛn mi kunfa wundoni.

N mi e batu mumɛ.

28 Xa n yi na liga nun,

na yi findima nɛn hakɛn na

kitisane naxan natɔrɔnɲɛ,

nayi n bata yi Ala ramɛ nun

naxan kore xɔnna ma.”

29 “N sɛwa nɛn n yaxuna ɲaxankatan na ba?

N na n bodon nɛn ba,

fe ɲaxine to a li?

30 N mi n yaxune danga

alogo Ala xa e faxa,

bayo n mi tinɲɛ yulubin tongɛ n fala xuine xɔn.

31 Naxanye birin yi fama n konni,

ne yi a falama nɛn, e naxa,

‘Muxun birin lugoma suben na Yuba konni.’

32 Xɔɲɛn mi yi xima tandeni mumɛ,

n yi n ma dɛɛn nabima nɛn dangu muxune xa.

33 N na n ma murutɛ feene luxun nɛn ba

alo adamadi gbɛtɛye?

N na n hakɛne luxun n yɛtɛ yi ba?

34 N yi gaxuxi yamana falan nan na ba?

I laxi a ra

a n yi gaxuxi denbayane maraɲaxun nan yɛɛ ra ba,

han n yi n dundu, n lu n konni?

35 A yi rafanɲɛ n ma

n ma mawuga xuiin yi ramɛ!

N ma fala dɔnxɛne ni i ra,

n na n yii fɔxɔn sama naxan ma,

Ala Sɛnbɛ Kanna xa n yabi.

Xa n yaxun yi mawuga kɛdin sɛbɛ n xili ma,

na yi rafanɲɛ n ma.

36 N yi a sama nɛn n tungunna ma,

n yi a so n xunna alo manga kɔmɔtina.

37 N nan n sigati kiin yɛbama nɛn a xa,

n yi fa a yɛtagi alo kuntigina.”

38 “N ma bɔxɔn yi gbelegbele n xili ma ba?

N ma xɛɛne yi e mawuga n fari ba?

39 N yi muxune bogi seene don ba,

n mi e saren fi?

N yi e kanne tɔrɔ ba?

40 Xa n yi na liga nun,

nayi, ɲanle xa sabati n ma xɛɛne ma,

benun murutun xa sabati,

sɛxɛn yi sabati,

benun fundenna xa sabati.”