17
Damasi nun Isirayila
1 Waliyiya falana Damasi taan xili ma:
Damasi taan kalamatɔɔn ni i ra,
a taa xɔnna yi lu
alo gɛmɛne e bode fari.
2 Aroyeri yamanan taane luma nɛn nabeɲinxi
e findi xuruseene konna ra.
E luma nɛn na,
muxu yo mi e yigbɛtɛnma.
3 Taa makantan yin yo mi fa luma Efirami yamanani sɔnɔn.
Mangayaan bama nɛn Damasi taani.
Arami yamanan muxu dɔnxɛn naxanye luma,
ne binyen mi danguɛ Isirayila kaane binyen na.
Alatala Sɛnbɛn Birin Kanna falan nan na ra.
4 Nayi, na lɔxɔni,
Yaxubaa binyen xurunma nɛn.
A yamaan yi lu doyenɲɛ.
5 A luma nɛn
alo sansine na yelin malanɲɛ se xaba waxatini
alo a xaba muxun na a tɔnsɔn xabaxine malan a yii
alo e na tɔnsɔnne makentun Refa lanbanni.
6 A tɔnsɔn dɔnxɛna ndee luma nɛn a kentun daxin na,
alo oliwi bogine na rayolon tamin na,
a xɔri firin saxan yi lu a kondeni,
naanin suulun ɲɔxɔn yi lu a yii bogixine ra.
Alatalaa falan nan na ra, Isirayilaa Ala.
7 Na lɔxɔni,
muxune yɛɛne luma e da mangan nan na,
e yɛɛ rafindi Isirayilaa Ala Sariɲanxin ma.
8 E mi fa e yɛɛ rasigɛ suxure kidene yi mumɛ,
e naxanye rafalaxi e yiine ra.
E mi fa Asera kide gbindonne matoɛ mumɛ,
e nun e wusulan gandene,
e yɛtɛ yii fɔxɔne.
9 Na lɔxɔni, e taa makantanxin naxanye rabeɲinma Isirayila kaane bun, ne birin yigenla luma nɛn alo fɔtɔnna hanma geyaan kondena.
10 Amasɔtɔ i bata ɲinan Ala xɔn i rakisimana.
I mi i yengi dɔxi i kantan fanyen xɔn, i ya Ala.
Nanara, i bata nakɔɔn nafala a faɲin na,
i yi sansi xɔɲɛne si.
11 I e si lɔxɔn naxan yi,
hali e na soli na lɔxɔni,
na xɔtɔnna yɛtɛni i ya si seen yi fuga,
koni a xaba waxatin na a li,
a lɔma ayi nɛn,
furen nun sɔxɔlɛ ɲantaren na fa lɔxɔn naxan yi.
12 Ee! Siya wuyaxine sɔnxɔma
alo fɔxɔ igen xuxu xuiin kii naxan yi.
Ee! Yamanane muxune xaɲɛma ayi
alo baa ige gbeen na walanɲɛ ayi.
13 Siyane sɔnxɔ xuiin luxi nɛn
alo fɔxɔ ige gbeen xuxu xuina.
Marigin na a kɔnkɔ e ma,
e e gi, siga yire makuyeni.
E kedima nɛn
alo foyen na se dagin xali geyaan fari
alo sɛxɛ xaren kala ti foyeni.
14 Gaxu gbeen na a ra ɲinbanna ra,
benun xɔtɔnni, e mi fa na!
Na nan na muxune sɔtɔma
naxanye nxɔ seene birin tongoma.
Na nan e sɔtɔma naxanye fuma nxu ma.