25
Sulemani a sanda gbɛtɛne
1 Sulemani a sanda gbɛtɛne nan itoe ra, Yuda Mangan Xesekiyaa muxune naxanye sɛbɛxi.
2 Alaa binyen findixi feene luxunna nan na,
mangane binyen yi findi feene yɛ fenna ra.
3 Koren mateen nun bɔxɔn tilinna nun mangane kui feene,
muxun mi nɔɛ ne sese fɛsɛfɛsɛ.
4 Xa i wure gbeti fixɛn gbiin ba,
xabun nɔɛ goron tofaɲin nafalɛ nɛn.
5 Xa i muxu ɲaxine ba mangan nabilinni,
a mangayaan sabatima nɛn tinxinna xɔn.
6 I nama i yɛtɛ yigbo mangan yɛtagi,
i nama ti muxu gbeene tideni.
7 Amasɔtɔ a fisa mangan xa a fala i xa,
a naxa, “Te be n fɛma,”
benun a xa i rayagi kuntigina nde yɛtagi
i yɛɛn naxan na.
8 I nama mafura i mawugɛ muxun fari kitisadeni.
I nanse ligɛ dɔnxɛn na,
xa a yoon sɔtɔ i ma.
9 Yoon fen i adamadi boden xun ma kitisadeni,
koni i nama muxu gbɛtɛna wundo feen makɛnɛn
10 alogo naxan na a mɛ,
na nama i konbi,
i yi xili ɲaxin sɔtɔ habadan.
11 Xɛma sawurane nun gbeti se tofaɲine,
ne fan alo fala faɲina.
12 Fekolonne maxadi xuiin luxi nɛn
a ramɛ muxun xa
alo tunla soon xɛma daxin tunla ra
hanma maxidi seen xɛma daxina a ma.
13 Xɛra tinxinxina a xɛ muxun nii yifanma a ma nɛn
alo foye faɲina se xaba waxatini.
14 Naxan na a yɛtɛ matɔxɔ a finma seene fe ra
anu a mi muxun kima,
na luxi nɛn alo kundaan nun foyen
naxanye mi tulen nafama.
15 Muxu diɲaxin nɔɛ kitisaan mabandunɲɛ nɛn.
Fala ɲaxumɛne fan nɔɛ xɔnna kalɛ nɛn.
16 Xa i kumin to,
naxan i lugɛ, na nan don,
alogo i nama a radangu ayi,
i yi a baxun.
17 I nama lu sigɛ i bodena banxini yɛyɛ,
alogo i ya fe nama xɔli ba a ra,
a i raɲaxu.
18 Muxun naxan wulen sama a adamadi boden xun ma,
na luxi nɛn alo silanfanna nun gbelemɛn
nun xalimakuli ɲɔɛ ralemunxina.
19 I mi i yigin sɛ yanfantenni tɔrɔ waxatini,
alo ɲin xɔlɛn nun san kalaxina.
20 I na sigin sa muxu sunuxin yɛtagi,
na xɔlɔn luxi nɛn
alo i na domaan ba muxun ma xunbenli,
hanma i muluxunna sa furen dɛ.
21 Xa kamɛna i yaxun ma,
donseen so a yii.
Xa min xɔnla a ma,
igen so a yii,
22 bayo na luma a xa nɛn
alo i tɛɛ wolonne nan malanma a xunna ma,
Alatala nan i saranma.
23 Foyen naxan kelima sogeteden kɔmɛnna ma,
na tulen nafama nɛn.
Yanfa falane fan muxun yɛtagini xɔlɔma.
24 A fisa i lu banxin fari ma dogodogoni,
benun ɛ nun ɲaxalan yɛngɛ gidin xa lu banxini.
25 Xibaru faɲin na keli yamana gbɛtɛ yi,
na ɲaxun alo ige xunbenla muxu xadanxin xa.
26 Tinxin muxun naxan gaxun muxu ɲaxin yɛɛ ra
na yifu nɛn alo tigin dunduxina
hanma xɔɲin ige lɔxina.
27 A mi lan i yi kumi gbeen kɔn.
I na binyen fan fen i yɛtɛ xa,
binye mi na ra.
28 Muxun naxan mi a yɛtɛ suxuma,
na kanna mi nɔɛ a yɛtɛ xun mafalɛ
alo taan naxan nabilin yinna bata bira.