1 Waxati famatɔni

Alatala Batu Banxin geyaan naxan fari

na danguma nɛn geyane birin na,

a lu geyane birin xun ma,

siyane yi lu fɛ a ma han!

2 Siya wuyaxine fama nɛn,

e a fala, e naxa,

“Ɛ fa, en siga,

en te Alatalaa geyaan ma,

Yaxubaa Alaa banxini.

A xa en xaran a sigati kiine ma,

alogo en xa bira a kirane fɔxɔ ra.”

Amasɔtɔ sariyan minima nɛn Siyon yi

Alatalaa falan minima nɛn Yerusalɛn yi.

3 A findima nɛn kitisaan na siya wuyaxin tagi.

A yɛngɛne ɲanma nɛn yama sɛnbɛmane tagi

hali naxanye makuya.

E e silanfanne bɔnbɔma nɛn,* Silanfanna: Sofane yɛngɛso dɛgɛmana.

e findi ɲinge kenne ra,

e tanbane yi rafala wɔlitɛne ra.

Siya yo mi fa silanfanna tongoma gbɛtɛ xili ma,

yɛngɛn mi fa maxaranɲɛ mumɛ.

4 Birin dɔxɔma nɛn a manpa binla nun a xɔdɛ binla bun,

muxu yo mi fa e magaxu,

amasɔtɔ Alatala Sɛnbɛn Birin Kanna bata falan ti.

5 Siyane birin sigan tima e gbee ala nan xili yi.

Koni en tan sigan tima Alatala nan xili yi en ma Ala

waxatin birin han habadan!

6 Alatalaa falan ni ito ra,

a naxa, “Na lɔxɔni,

n sankalatɔne malanma nɛn.

Naxanye yi suxi yɛngɛni

n yi ne xun lan,

n tɔrɔn nagidixi naxanye ma.

7 N sankalatɔne findima n ma yama dɔnxɛn na nɛn.

Naxanye yi xuyaxi ayi,

na muxune yi findi siya sɛnbɛmaan na.

Alatala dɔxɔma nɛn e xun na Siyon geyani

keli na waxatin ma han habadan.

8 I tan, Siyon taan sanganso matexina,

i tan naxan yamaan makantanma

alo xuruse rabaan nun a kuruna,

i fama nɛn sɛnbɛn sɔtɔdeni

naxan yi i yii a fɔlɔni.

Yerusalɛn mɔn findima nɛn manga taan na.”

9 Nanfera iki i gbelegbelema?

Manga mi fa i konni ba?

I kawandi muxun bata lɔ ayi ba,

alogo sɔxɔlɛn xa i li

alo ɲaxanla naxan tinna ma?

10 Siyon kaane, ɛ tɔrɔ,

ɛ gbelegbele

alo ɲaxanla naxan diin barima.

Amasɔtɔ iki ɛ minima nɛn ɛ taani

ɛ sa dɔxɔ burunna ra.

Ɛ sigama nɛn han Babilɔn taani.

Ɛ sa xɔrɔyama mɛnna nin,

Alatala sa ɛ xunbama mɛnna nin ɛ yaxune yii.

11 Iki siya wuyaxine e malanma i xili ma.

E a falama, e naxa,

“En fu e taan ma,

en xa Siyon kalaxin to!”

12 Koni e mi Alatala miriyaan kolon.

E mi a fe ragidixine famuma.

E mi a kolon a e malanma nɛn

alo malo xidine lonna ma.

13 Siyon kaane, ɛ keli,

ɛ maala bɔnbɔ!

N sɛnbɛn fima nɛn ɛ ma

alo wure fenne turaan ma

alo a torone na findi sulan na.

Ɛ yama wuyaxi yilunburunma nɛn,

e bata yi seen naxanye sɔtɔ yɛngɛni,

ɛ ne rasariɲan Alatala xa,

ɛ yi e nafunla so bɔxɔn birin kanna yii.

14 Iki, ɛ ganle malan, taa yɛngɛ sone!

Yaxune bata ɛ rabilin!

E bata Isirayila kuntigin yɛtagi garin dunganna ra.