8
Danxutɔ yamana
1 Alatalaa falan ni ito ra, a naxa, “Na waxatini, e Yuda mangane nun kuntigine xɔnne bama nɛn gaburun na, e nun a saraxaraline nun a nabine nun Yerusalɛn kaane birin. 2 E yi e sa sogen na, e lu raxuyaxi ayi kike dɛgɛn nun sare ganla birin bun, naxanye yi rafan e ma, e yi naxanye batuma, e bira naxanye fɔxɔ ra, e yi xibarune sɔtɔma naxanye ra, e xinbi sin naxanye bun. E xɔnne mi fa malanma, e mi maluxunɲɛ, e birin findima nɛn lɔxɔn na bɔxɔn fari. 3 Sayaan xɔnla yama ɲaxini ito muxu dɔnxɛne suxuma nɛn, n na e raxuya ayi dɛnaxanye birin yi.” Alatala Sɛnbɛn Birin Kanna falan nan na ra.
Alaa yamaan tondi fena
4 Yeremi, a fala yamaan xa, i naxa, “Alatala ito nan falaxi, a naxa,
‘Muxun birɛ ba, a mi keli?
Muxuna a xun xanbi soɛ ba,
a mi fa a xun xɛtɛ?
5 Nanfera nayi,
Yerusalɛn yamani ito xun xanbi soxi,
e lu e masigɛ n na waxatin birin?
E tantanni han,
e tondixi e xun xɛtɛ n ma.
6 N tuli matixi e ra ki faɲi
koni e falan mi lanma.
E sese mi nimisama e fe ɲaxine ra,
e mi a falama, e naxa,
“N nanfe ligaxi?”
E birin gixin sigama e xun xɔn
alo soon naxan sigan yɛngɛni.
7 Hali yaya xɔnla naxan kore,
na a xɛtɛ waxatine kolon.
Hali ganban nun tuntunna
nun saɲi xɔnla e xɛtɛ waxatine yatɛxi.
Koni n ma yamaan mi Alatalaa kiti saxine kolon.’ ”
Karamɔxɔ tantanxine
8 “Nayi, ɛ nɔɛ a falɛ di, ɛ naxa,
‘Nxu bata fe kolonna sɔtɔ,
bayo Alatalaa sariyana nxu yii?’
Anu, karamɔxɔne wule sɛbɛnle tima
alogo na xa findi wulen nan na.
9 Fe kolonni itoe yagima nɛn,
e yigitɛgɛ, e suxin na a ra
bayo e bata e mɛ Alatalaa falan na.
Fe kolonna sifan mundun fa e yii sɔnɔn?”
10 Ala naxa, “Nanara,
n na e ɲaxanle soma nɛn gbɛtɛye yii,
muxu gbɛtɛye yi e xɛɛne ba e yii.
Bayo keli muxudin ma han muxu gbeene,
e birin kunfaxi e yɛtɛ tɔnɔn nan xɔn,
keli nabine ma han saraxaraline,
e birin wulen falama.
11 E mi n ma yamana furen dandanma e sɔbɛɛn na.
E luma a falɛ nɛn, e naxa,
‘Bɔɲɛ xunbenla! Bɔɲɛ xunbenla!’
Koni, bɔɲɛ xunbeli mi na.
12 E yi lanma nɛn e yagi e xɔsi feene ra,
koni, e mi yagima hali!
E mi yagin yɛtɛɛn kolon!
Nanara, naxanye faxama,
e nun ne nan faxama.
N na e kɛwanle saranma e ra nɛn,
e yi bira bɔxɔni.”
Alatala naxa na kiini.
13 Alatalaa falan ni ito ra, a naxa,
“N wama nɛn n xa danna sa e ra,
manpa bogi mi fa luma na,
xɔdɛ bogi mi luma na,
e wudine dɛɛne xarama ayi nɛn.
N seen naxanye soxi e yii,
na bama e yii nɛn.”
14 Yamaan naxa,
“Nanfera en luma dɔxi?
Ɛ malan!
En na en gi,
siga taa makantanxine yi,
en sa halagi mɛnni!
Bayo Alatala, en ma Ala bata halagin nagidi en ma,
a ige xɔlɛne fi en ma,
bayo en bata yulubin liga a ra.
15 En yengi yi bɔɲɛ xunbenla nan ma,
koni en mi sese faɲi sɔtɔma.
En yi marakɛndɛyaan nan mamɛma,
koni fe magaxuxin nan fama.
16 En bata yaxune soone xuiin mɛ Dan bɔxɔn mabinni,
bɔxɔn birin bata yimaxa e soo kɛndɛne wuga xuiin ma!
E fama,
e yamanan nun a seen birin naxɔri,
e nun taan nun a muxune.”
17 Alatalaa falan ni ito ra, a naxa,
“N saɲine rasigama nɛn ɛ xili ma
naxanye seri mi na,
e yi ɛ maxin.”
Nabina mawuga xuina
18 N yi wama n ma tɔrɔni suxu feni,
n bɔɲɛn sunuxi n kui.
19 N ma yamaan wuga xuiin nan ito ra
sa keli yire makuyeni.
E naxa,
“Alatala mi fa Siyon taani ba?
A mangan mi fa na yi ba?”
Ala naxa,
“Nanfera e n naxɔlɔxi e suxurene ra,
e nun xɔɲɛne batu se fufafune?”
20 Se xaba waxatin bata ɲan,
kuye wolon waxatin fan bata dangu,
koni han to en mi rakisixi!
21 N ma yamana tɔrɔna n tɔrɔma,
n sunuxi, n kuisanxi.
22 Seri mi fa Galadi yamanani ba?
Dandan ti mi fa na?
Nanfera nayi,
n ma yamana furen mi yalanma?
23 Xa ige xunna nan yi n xunna ra nun
xa n yɛɛ yinle yi findixi tigin nan na nun,
n yi Siyon faxa muxune wugama nɛn kɔɛ nun yanyin birin na.