27
Isirayilaa sofane fe
1 Isirayila kaan naxanye wali mangana ganli, ne nan itoe ra, xabila xunne nun sofa kuntigin naxanye yi muxu wuli nun muxu kɛmɛ xun na e nun sofa kuntigi gbɛtɛye. E yitaxunxi muxu wuli mɔxɔɲɛn nun naanin yɛɛn nan ma. Ɲɛɛn kike yo kike gali keden yi fama nɛn walideni mangan xa.
2 Sabadiyɛli a diin Yasobeyami nan yi gali singen kuntigin na ɲɛɛn kike singeni. Muxu wuli mɔxɔɲɛn nun naanin nan yi a yamarin bun ma. 3 Sabadiyɛli yi findixi Peresi yixɛtɛna nde nan na. A tan nan findi ganla birin kuntigin na ɲɛɛn kike singeni.
4 Axoxi xabilan muxuna nde Dodayi yi findi gali kuntigin na ɲɛɛn kike firindeni. Mikiloti yi findi a sofa kuntigin na. Muxu wuli mɔxɔɲɛn nun naanin nan yi a yamarin bun ma.
5 Saraxarali Yehoyadaa diin Bɛnaya yi findi gali kuntigin na ɲɛɛn kike saxandeni. Muxu wuli mɔxɔɲɛn nun naanin nan yi a yamarin bun ma. 6 Bɛnaya nan yi Dawudaa sofa wɛkilɛxi tonge saxanne xunna ra. A diina Amisabadi yi a ganla nin.
7 Yowaba xunyɛna Asahɛli yi findi gali kuntigin na ɲɛɛn kike naanindeni. A diin Sebadiya nan ti a ɲɔxɔn na. Muxu wuli mɔxɔɲɛn nun naanin nan yi a yamarin bun ma.
8 Samehuti Yisira kaan yi findi gali kuntigin na ɲɛɛn kike suulundeni. Muxu wuli mɔxɔɲɛn nun naanin nan yi a yamarin bun ma.
9 Ikɛsi a diina Ira Tekowa kaan yi findi gali kuntigin na ɲɛɛn kike sennindeni. Muxu wuli mɔxɔɲɛn nun naanin nan yi a yamarin bun ma.
10 Efirami bɔnsɔnna muxuna nde Xɛlɛsi Pelon kaan nan yi findi gali kuntigin na ɲɛɛn kike soloferedeni. Muxu wuli mɔxɔɲɛn nun naanin nan yi a yamarin bun ma.
11 Sera xabilan muxuna nde Sibekayi Xusa kaan yi findi gali kuntigin na ɲɛɛn kike solomasɛxɛdeni. Muxu wuli mɔxɔɲɛn nun naanin nan yi a yamarin bun ma.
12 Bunyamin bɔnsɔnna muxuna nde Abiyeseri Anatɔti kaan yi findi gali kuntigin na ɲɛɛn kike solomanaanindeni. Muxu wuli mɔxɔɲɛn nun naanin nan yi a yamarin bun ma.
13 Sera xabilan muxuna nde Maharayi Netofa kaan yi findi gali kuntigin na ɲɛɛn kike fudeni. Muxu wuli mɔxɔɲɛn nun naanin nan yi a yamarin bun ma.
14 Efirami bɔnsɔnna muxuna nde Bɛnaya Piraton kaan yi findi gali kuntigin na ɲɛɛn kike fu nun kedendeni. Muxu wuli mɔxɔɲɛn nun naanin nan yi a yamarin bun ma.
15 Otiniyɛli xabilan muxuna nde Xɛlidayi Netofa kaan yi findi gali kuntigin na ɲɛɛn kike fu nun firindeni. Muxu wuli mɔxɔɲɛn nun naanin nan yi a yamarin bun ma.
16 Kuntigin naxanye yi Isirayila bɔnsɔnne xun na, ne ni i ra:
Rubɛn bɔnsɔnna xun na, Sikiri a diina Eliyeseri.
Simeyɔn bɔnsɔnna xun na, Makaa diin Sɛfati.
17 Lewi bɔnsɔnna xun na, Kɛmuyɛli a diin Hasabi.
Haruna yixɛtɛne xun na, Sadɔki.
18 Yuda bɔnsɔnna xun na, Dawuda tada Elihu.
Isakari bɔnsɔnna xun na, Mikeli a diina Omiri.
19 Sabulon bɔnsɔnna xun na, Abadi a diin Yisemaya.
Nafatali bɔnsɔnna xun na, Asiriyɛli a diin Yerimoti.
20 Efirami bɔnsɔnna xun na, Asasiyaa diin Hoseya.
Manase bɔnsɔnna fɔxɔ kedenna xun na, Pɛdayaa diin Yowɛli.
21 Manase bɔnsɔnna fɔxɔ kedenna fan xun na Galadi yamanani, Sakari a diin Yido.
Bunyamin bɔnsɔnna xun na, Abineri a diin Yaasiyɛli.
22 Dan bɔnsɔnna xun na, Yeroxamaa diina Asarɛli.
Isirayila bɔnsɔn kuntigine nan ne ra.
23 Dawuda mi xɛmɛne tɛngɛ, naxanye barin munma yi ɲɛɛ mɔxɔɲɛn ti bayo Alatala bata yi a fala a Isirayila kaane wuyama ayi nɛn alo sarene kore. 24 Seruyaa diin Yowaba bata yi Isirayila kaane yatɛ fɔlɔ, koni a mi a raɲan masɔtɔ Alaa xɔlɔn ma lan Isirayila yamaan ma. Na yatɛn mi sɛbɛ Dawudaa taruxu kɛdine kui.
Mangana kuntigi gbɛtɛye fe
25 Adiyeli a diina Asamawɛti nan yi mangana nafulu kantanna ra.
Yusiyaa diin Yonatan nan yi nafulu kantanna ra banxidɛne nun taa gbɛtɛne nun kantan ti banxi matexine yi. 26 Kelubu a diina Esiri nan yi xɛɛ biine xunna ra. 27 Ramati kaan Simeyi nan yi manpa bili nakɔ feene xun na.
Sefami kaan Sabidi nan yi manpa bili bogine nun manpa feene xun na.
28 Gederi kaan Baali-Xanan nan yi oliwin nun burunna xɔdɛ binle fe xun na yamanan lanbanni.
Yowasa nan yi ture feen xunna ra.
29 Sitirayi Sarɔn kaan nan yi ɲingene fe xunna ra Sarɔn yamanani.
Adalayi a diin Safati nan yi ɲingene fe xunna ra lanban yirene yi.
30 Sumayila bɔnsɔnna muxuna nde Obili nan yi ɲɔgɔmɛne fe xunna ra.
Yexedeya Meronoti kaan nan yi sofanle fe xunna ra.
31 Yasisi nan yi siine nun yɛxɛɛne fe xunna ra, Hagari bɔnsɔnna muxuna.
Na muxune nan yi yengi dɔxi Manga Dawuda sɔtɔ seene xɔn ma.
Dawuda bundɔxɔne
32 Manga Dawuda sɔxɔ Yonatan findi a kawandi muxun nun a sɛbɛli tiin nan na, a fekolonna yi gbo.
Xakimoni a diin Yɛxiyɛli nan yi mangana dii xɛmɛne masuxu muxun na.
33 Mangan kawandi muxun nan yi Axitofeli fan na.
Mangan xɔyin nan yi Xusayi ra, Araka bɔnsɔnna muxuna nde. 34 Bɛnayaa diin Yehoyada nun Abiyatari nan lu Axitofeli ɲɔxɔni. Yowaba nan yi mangana gali kuntigin na.