Og tagnaꞌ Sulat ni
Piter
Og Piuna Taluꞌ paꞌali sog tagnaꞌ Sulat ni Piter
Og tiganaꞌ sulat ni Piter koni, posunguꞌ ini dia sog ain sinumolabuk na dia ni Kristu, nog iningolanan ilan nog, piniliꞌ nog pigotowan nog Mikpongon, nog mikpokpolaꞌ ilan dituꞌ sog gliwag nog Bataꞌbataꞌ Asia. Og tugyu nog sulat koni og pondoloꞌisog dia sog ain og poktanudanan kituꞌ nog dia ilan sog sinsaan bu sog posakit sabap sog kopokokunut nilan dia ni Kristu. Bu sinulat dosop ini ni Piter poꞌ pipikil non dianilan og Gombaꞌis kituꞌ nog Guksugan nog paꞌali dia ni Isukristu, nog bianan dia sog kopatoy non, sog kopotubuꞌ dianon tidu sog patoy, bu sog pinasad non kituꞌ nog kopokpuliꞌ non, mimung mokobogoy nog mosolag nog dodomaan ta dianon. Dadi sabap dituꞌ, sumboy tolimaꞌon nilan bu moglogaga ilan nog sinsaan. Bu saꞌan ituꞌ kibianbianan ilan dun poꞌ og suloy nog kopongandol nilan dia ni Kristu. Bu bila mokogaga ilan dun, kosugdaan ilan sog gondow kituꞌ nog potongowon na si Isukristu.
Dadi, bila maꞌ nini kipongimogonan ita noma sog timpu nog sasow, og pondoloꞌisog dosop dianita nog sumboy potongowon ta sog kotubuꞌ ta og kosolabuk ta dia ni Kristu.
1. Og bokna nog sulat koni, 1:1-2.
2. Og kopokpopikil nog tabang nog Mikpongon, 1:3-12.
3. Og pomali paꞌali sog polomotadon nog modulus, 1:13–2:10.
4. Og polosukuꞌan nog poktanudanan bila kodotongan ilan nog sinsaan, 2:11–4:19.
5. Og kopokpobabaꞌ nog poktanudanan bu og ginang nilan, 5:1-11.
6. Og gluksadan nog sulat koni, 5:12-14.
1
1 Akon si Piter og mikpoit nog sulat koni, og sosuguꞌon u ni Isukristu.
Og sulat u koni posunguꞌ dia sog ain piniliꞌ nog Mikpongon nog og doksaꞌdoksaꞌ nog mikpokpolaꞌ sog gliwag nog probinsiaanan nog Pontus, sog Galatia, sog Kapadosia, sog Bataꞌbataꞌ Asia, bu sog Bitinia. 2 Amu og piniliꞌ sumakup dia sog pigdotuꞌan nog Mikpongon. Poꞌ maꞌ nituꞌ og potugyuan dianiu nog Gamaꞌ ta nog Mikpongon. Bu bianan sog ginang nog Bolakat non dianiu, siniboy non na amu nog mokokunut amu dianon, bu bagun dosop kugasan og dusa niu nog duguꞌ ni Isukristu.
Posisayaꞌ kongon dianiu og tulung bu kotiknaꞌ nog pikilan.
Saꞌan songlitan ta Mikpongon poꞌ tumanon nonog dodomaan ta dianon
3 Songlitan ta og Mikpongon, og Gamaꞌ bu og piktamuy nog Kounutan ta nog si Isukristu. Poꞌ bianan sog kosolag nog glolat non dianita, binogayan non ita nog bogu kotubuꞌ bianan sog kopotubuꞌ non puliꞌ dia ni Isukristu tidu sog patoy. Bu sabap dituꞌ miimung nog pagon nog dodomaan ta dianon 4 bu dunut og kopogdodama ta nog malap ta og pusakaꞌ kituꞌ nog ondiꞌ moglaꞌat bu diꞌ mokpinda og kolongas non nog sinimpan non na dituꞌ sog glangit. 5 Bu sabap sog kopongandol niu dia sog Mikpongon, bianan sog dasig non, pigipat non amu solian niu mogbagad nog tabang non kituꞌ nog sagad na mokpotongow dun bila matong na og bungkas. 6 Sabap sog glolatan non dianiu, mokpogdaꞌdaꞌ amu, minsan siꞌoy solian nog numun koni mosinsa amu sabap sog gininisan nog suloy nog sumboy niu pa kobianan. 7 Og kopongandol niu domikian da maꞌ nog bulawan, nog og bulawan koyon tunagon pa poguna mangka siꞌoy poktantu bulawan, siꞌoy moglaꞌat da. Tibua, og kopongandol niu, labi pa dituꞌ kobololagaꞌ. Saꞌan ituꞌ sumboy pa mokobian amu nog suloy poꞌ bagun og kopongandol niu ompagon tokodoy nog boyaꞌan mimung kodongyaꞌan amu dun, bu pogodaban amu, bu ompotas amu bila matong na og gondow kituꞌ nog mokpuliꞌ si Isukristu. 8 Minsan siꞌoy daꞌ niu ion kotongow nog dili mata niu, molalam amu da dianon. Bu minsan siꞌoy diꞌ niu na ion motongow numun koni, tinumud amu da dianon. Bu sabap dituꞌ, miponuꞌ amu nog daꞌdaꞌan nog diꞌ mustalustal. 9 Poꞌ numun koni, miktolipun amu na mokotabuk nog doksuꞌan nog kopongandol niu dianon nog ion non ion og tabang non nog glimukud niu tidu dia sog bayaꞌ nog dusa.
10 Bu paꞌali sog tabang non koni nog mialap niu na, og polomolatasanan kituꞌ kobon nituꞌ nog mikpolatas dun, pikpikilpikil nilan kopia bu pinginabut nilan bosia mahatul bog olo dodaꞌ og bogoyon kituꞌ nog Mikpongon dianiu. 11 Poꞌ kolegan nilan bosia dun, kosunan nilan bog olo og bianan non bu nanu ituꞌ datong og pigolong kituꞌ dianilan nog Bolakat ni Kristu. Poꞌ og Bolakat non kituꞌ dia da nilan. Sinuksugan non dianilan paꞌali sog posunguꞌan ni Kristu kituꞌ nog ion mosinsa pa poguna mangka siꞌoy ion potasoy. 12 Pisabut dianilan nog og polosukuꞌan nilan koyon nog polomolatas nog taluꞌ nog Mikpongon, konaꞌ nilan dili koboꞌisan dun, sugaꞌid non, og koboꞌisan niu. Og pilatas nilan, ion non ion og Gombaꞌis kituꞌ nog Guksugan nog midongog niu na dia sog ain migustal koni dun dianiu bianan sog Bolakat nog Mikpongon nog pipangoy non dini tidu sog glangit. Minsan og moloikatanan kituꞌ, moleg ilan dosop bosia mokosabut dun ini.
Og pomali paꞌali sog polomotadon nog modulus
13 Dadi, saꞌan ituꞌ simpan niu og pikilan niu bu koto amu mogokbit nog pikilan niu. Dodomaoy niu tokodoy og tulung non kituꞌ dianiu sog matong Gondow kituꞌ nog mokpuliꞌ si Isukristu. 14 Pokokunut amu sog Mikpongon. Bu naꞌ amu na mokokunut dia sog glegan nog dinunya maꞌ nog polomotadon niu kituꞌ nog kobon nog sobuꞌ amu pa sog motud paꞌali dia sog Mikpongon. 15 Sugaꞌid non, sumboy kobon non modulus og glam nog polomotadon niu poꞌ og Mikpongon nog migonggat dianiu midulus. 16 Poꞌ maꞌ nini og taluꞌ nog Mikpongon nog sinulat sog Kitab, “Sumboy modulus amu poꞌ akon midulus u.”* 1:16 Levitikus 11:44-45
17 Bila mogyakin amu saka poksobion niu og Mikpongon nog Amaꞌ, sumboy longkaon niu kobon non og gondok niu dianon. Poꞌ bila lilingon non og ginang nog glam nog gotowanan, ondaꞌidun og pogbigyaꞌon non dun. 18 Poꞌ kosunan niu bog olo pigbayad non dun nog bagun molokat non amu tidu sog bayaꞌ nog polomotadon nog mokogulanganan niu kituꞌ nog daꞌ doksuꞌ non. Og pigbayad non dun, konaꞌ mamaꞌ nog bulawan otawaka og sin nog moglokulang og golagaꞌ non. 19 Sugaꞌid non, og binayad non dun bololagaꞌ tokodoy, poꞌ og duguꞌ tanan ni Kristu. Ion mamaꞌ nog nati nog bilibili nog daꞌ sinilaꞌ dun. 20 Piniliꞌ ion nog Mikpongon sog daꞌ pa pongonoy og dunya. Bu sog numun koni nog gimpusan na nog gondow, pitampal na ion bagun amu koboꞌisan dun. 21 Poꞌ bianan dianon tinumud amu na sog Mikpongon nog ion mikpotubuꞌ mokpuliꞌ dia ni Isukristu tidu sog patoy bu piotas non na ion. Dadi, og salig niu bu og dodomaan niu dia sog Mikpongon.
22 Dadi numun koni, bianan sog kopokokunut niu dia sog motud, milonuꞌ amu na bu miktantu amu na mololat sog dumaanan niu nog poktanud. Dadi, sumboy og pogopasan niu og mokilolamoy. 23 Poꞌ binogayan amu nog bogu kotubuꞌ nog daꞌ kopus non. Konaꞌ og sagyaotow nog matoy da og migbogoy dun dianiu, sugaꞌid non, og Mikpongon og mibogoy dun dianiu. Poꞌ ginamit non og taluꞌ non kituꞌ nog totubuꞌ bu diꞌ moksop asta sog daꞌ kopus non. 24 Poꞌ maꞌ nini sinulat sog Kitab,
“Glam nog gotow mamaꞌ da nog sagya sigbot bu og kolongas nilan mamaꞌ da nog kolongas nog bulakbulak. Molanos da og sigbot bu moloklag da og bulakbulak. 25 Tibua, og taluꞌ nog Pogbayaꞌ diꞌ moksop asta sog daꞌ kopus non.”† 1:25 Isaya 40:6-8
Og taluꞌ koyon nog pigolong, ion non ion og taluꞌ kituꞌ nog paꞌali dia ni Isukristu nog pigustal dianiu.