1 Iyan heini lalag te Nengazen diyà te ki Zefanias dutun te timpu he si Josia he anak ni Amon iyan hadì diyà te Juda. Si Zefanias anak ni Cushi, si Cushi anak ni Gedalia, si Gedalia anak ni Amaria, ne si Amaria anak ni Hezekia.

2 Migkaǥi is Nengazen te, “Ebpurungan ku edezeeti is langun he ziyà te tanà– 3 is menge etew, is menge langgam ragkes en is menge tagbis wey menge isdà. Id-awè ku is menge edtukù te menge etew wey zan mekesalà ragkes en is menge mekesesalà. Edezeetan ku is langun he etew ziyà te tanà. Iyan a, is Nengazen, is migkaǥi kayi.

4 “Edsilutan ku is menge meǥinged diyà te Juda ragkes en is langun he menge meǥinged diyà te Jerusalem. Edezeetan ku is nengesamà he menge ed-azap te ed-ezapen he si Baal ragkes en is menge memumuhat he ebpenilbi kayi, su wey kenè en sikandan metenuzi. 5 Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec. 6 Edezeetan ku is menge mid-iniyug kedì wey is menge wazà medangep kayi te kedì.

7 “Pereremek kew kayi te etuvangan ku, su meǥaan en egkeuma is andew te kedsilut ku. In-andam ku en is menge etew he para ebpenhimetayan iring te uyaǥen he ibpemuhat. Insivey ku en is menge kuntada he mid-umew ku wey zan medsurung diyà te Juda. 8 Dutun he andew, ebpenhimetayan ku is menge tig-Juda he iring te uyaǥen he ibpemuhat. Edsilutan ku is menge upisyal zan wey is menge anak te hadì, wey is langun he mid-iring te mezaat he menge vetasan te ziyà te menge lumelengyawà. 9 Edsilutan ku zaan keniyan he andew is langun he midtampu te menge tulumanen te menge etew he wazà mekekilala kedì wey is menge mibpesipala wey nenlimbung su wey zan mepenù te menge azen is baley te egalen dan.”

10 Migkaǥi is Nengazen te, “Zutun he andew egkezineg is kulehian te ebpekitavang diyà te pultahan he migngezanan te Pultahan te menge Isdà diyà te inged he Jerusalem wey is lendag diyà te veǥu he vahin kayi he inged. Egkezineg daan is dekelà he keǥurub te egkengerundus he menge valey ziyà te menge vuvungan. 11 Edsineǥew kew is ebpemen-ubpà diyà te alug he vahin te inged he Jerusalem su ebpemematey is langun he menge nigusyanti niw.

12 “Dutun he timpu ebpurungan ku edsusiya is menge tig-Jerusalem ne edsilutan ku is menge etew he ebpeeyehey zà he egkaǥi ziyà te gehinawa zan, ‘Wazà ebeelan te Nengazen he meupiya etawa mezaat.’ 13 Ed-eǥawen is menge azen dan ne ed-ewaan dan is menge valey zan. Kenà iyan sikandan ebpekeubpà diyà te menge valey he mibangun dan. Wey kenà iyan sikandan ebpekeinum te vinu he ebpuun diyà te menge pinemula zan he paras.”

14 Meǥaan en egkeuma is mekahandekhandek he andew te kedsilut te Nengazen. Hapit en heini egkehitavù ne merasey heeyan he andew, su minsan is menge sundaru ebpekepengulahì te kebuyù te tavang. 15 Keniyan he andew is kebpeǥezama te Megbevayà te pauk din. Andew haazà te kelised, kemeresayan, kezeetan, wey kepirdiyan. Merusirem wey ebpenggapun dutun he andew, 16 ne egkezineg is daǥing te menge vudyung wey kulehian te menge sundaru zutun te edsurung dan diyà te vinerengbeng he menge inged wey ziyà te metikang he menge turi kayi.

17 Migkaǥi is Nengazen te, “Ibpaaǥi ku heeyan he kemeresayan diyà te menge etew, ne edhipanew sikandan he henduen be te menge lakap, su ǥeina te nekesalè dan kayi te kedì. Egkeiring te wahig he edtudà is lengesa zan, ebpekepeyapat is menge lawa zan iring te menge tai. 18 Kenà ebpekelibri kandan is menge pelata zan wey menge vulawan dutun te andew te kebpeǥezama ku te pauk ku he iring te hapuy he ebpekeepur te tivuuk he tanà. Edtik-awan ku edezeeti is langun he ed-ubpà kayi he tanà.”