144
144-küy •••• Padishahning nijatliqi — xelqning bexti
1 Dawut yazghan küy: —
Qollirimgha jeng qilishni,
Barmaqlirimgha urushni ögitidighan,
Méning Qoram Téshim Perwerdigargha teshekkür-medhiye qayturulsun!■ 2Sam. 22:35; Zeb. 18:34
2 Méning özgermes shepqitim we méning qorghinim,
Méning égiz munarim we nijatkarim,
Méning qalqinim we tayan’ghinim, men Uningdin himaye tapimen;
U Öz xelqimni qol astimda boysundurghuchidur!■ 2Sam. 22:48; Zeb. 18:47-48
3 I Perwerdigar, Sen uningdin xewer alidikensen, adem dégen zadi néme?
Uning toghruluq oylaydikensen, insan balisi dégen néme?■ Ayup 7:17; Zeb. 8:4; 31:7; Ibr. 2:6
4 Adem bolsa bir nepesturla, xalas;
Uning künliri ötüp kétiwatqan bir kölenggidur, xalas.■ Ayup 8:9; 14:2, 3; Zeb. 39:5-6; 62:9; 102:11; Yaq. 4:14
5 I Perwerdigar, asmanlarni égildürüp chüshkeysen;
Taghlargha tégip ulardin is-tütek chiqarghaysen;■ Zeb. 18:7-9; 104:32
6 Chaqmaqlarni chaqquzup ularni tarqitiwetkeysen;
Oqliringni étip ularni qiyqas-süren’ge salghaysen;■ 1Sam. 7:10; 2Sam. 22:8; Zeb. 18:13-14
7 Yuqiridin qolliringni uzitip,
Méni azad qilghaysen;
Méni ulugh sulardin,
Yaqa yurttikilerning changgilidin chiqarghaysen.
8 Ularning aghzi quruq gep sözleydu,
Ong qoli aldamchi qoldur.□ «Ong qoli aldamchi qoldur» — belkim qesem qilghanda qolini yalghandin kötürgen yaki bashqilar bilen kélishkende yalghandin qollashqan.
9 I Xuda, men Sanga atap yéngi naxsha éytimen;
Ontargha tengkesh bolup Sanga küylerni éytimen.□ «Ontargha tengkesh bolup sanga küylerni éytimen» — «ontar» on tarliq chiltardek bir saz.
10 Sen padishahlargha nijatliq-ghelibe béghishlaysen;
Qulung Dawutni ejellik qilichtin qutuldurisen.
11 Méni qutuldurghaysen, yat yurttikilerning qolidin azad qilghaysen;
Ularning aghzi quruq gep sözleydu,
Ong qoli aldamchi qoldur.
12 Shundaq qilip oghullirimiz yashliqida puxta yétilgen köchetlerge oxshaydu,
Qizlirimiz ordiche neqishlen’gen tüwrüklerdek bolidu;
13 Ashliq ambarlirimiz toldurulup,
Türlük-türlük ozuqlar bilen teminleydighan,
Qoylirimiz otlaqlirimizda minglap, tümenlep qozilaydighan;
14 Kalilirimiz boghaz bolidighan;
Héchkim bésip kirmeydighan, héchkim jengge chiqmaydighan;
Kochilirimizda héch jédel-ghowgha bolmaydighan; □ «Kalilirimiz boghaz bolidighan...» — bashqa birxil terjimisi: «Ulaghlirimiz éghir yüklerni kötüridighan....».
15 Ehwali shundaq bolghan xelq némidégen bextliktur!
Xudasi Perwerdigar bolghan xelq bextliktur!
■144:1 2Sam. 22:35; Zeb. 18:34
■144:2 2Sam. 22:48; Zeb. 18:47-48
■144:3 Ayup 7:17; Zeb. 8:4; 31:7; Ibr. 2:6
■144:4 Ayup 8:9; 14:2, 3; Zeb. 39:5-6; 62:9; 102:11; Yaq. 4:14
■144:6 1Sam. 7:10; 2Sam. 22:8; Zeb. 18:13-14
□144:8 «Ong qoli aldamchi qoldur» — belkim qesem qilghanda qolini yalghandin kötürgen yaki bashqilar bilen kélishkende yalghandin qollashqan.
□144:9 «Ontargha tengkesh bolup sanga küylerni éytimen» — «ontar» on tarliq chiltardek bir saz.
□144:14 «Kalilirimiz boghaz bolidighan...» — bashqa birxil terjimisi: «Ulaghlirimiz éghir yüklerni kötüridighan....».