Муқеддес Калам (кирил йезиқ) Наһум 3

Нинәвәниң һалак болушидики сәвәпләр

1 Қанлиқ шәһәргә вай!

У ялғанчилиқ, зулум-зораванлиқ билән толған,

У олҗа елиштин һеч қол үзгән әмәс!□

2 Аһ, қамчиниң қарсилдашлири!

Чақлириниң дақаңшиватқан,

Атларниң чапчиватқан,

Пиңилдап кетиватқан җәң һарвулириниң садалири!

3 Қара, атлиқ ләшкәрләрниң қаңқишлири,

Қиличларниң валилдашлири,

Нәйзиләрниң палилдашлири,

Өлтүрүлгәнләрниң көплүги,

Өлүкләр дога-дога!

Җәсәтләрниң сани йоқтур;

Улар җәсәтләргә путлишиду.

4 — Сеһирләрниң пири у,

— Әлләрни паһишивазлиғи,

Җәмәтләрни сеһирлири билән сетиветиду;

Сән шеринсухән паһишиниң нурғун паһишиликлири түпәйлидин,□

5 Мана, Мән саңа қаршилишип чиққанмән, —

— дәйду самавий қошунларниң Сәрдари болған Пәрвәрдигар,

Көңлигиңниң етигини қайрип йүзүңгә йепип, сени ашкарилаймән,

Әлләргә уят йәрлириңни,

Падишаһлиқларға номусуңни көрситимән.

6 Үстүңгә ниҗасәтни ташлаймән,

Сени шәрмәндичиликтә қалдуримән,

Сени рәсва қилимән.

7 Вә шундақ болидуки,

Сени көргәнләрниң һәммиси сәндин қечип: —

«Нинәвә вәйран қилинди! Униң үчүн ким һаза тутиду?» — дәйду;

Мән саңа тәсәлли бәргүчиләрни нәдин тепип беримән?□

8 Сән дәрияларниң оттурисида турған,

Әтрапида сулар болған,

Истиһками деңиз болған,

Сепили деңиз болған Но-Амон шәһиридин әвзәлмусән?

9 Ефиопийәму, Мисирму униң күч-қудрити еди,

Уларниң күчи чәксиз еди;

Пут һәм Ливийәликләр униңға ярдәмчи еди;□

10 Уму елип кетилип, әсирликкә чүшкән;

Барлиқ коча бешида бовақлири чөрүп ташливетилди;

Улар униң мөтивәрлири үчүн чәк ташлиди,

Униң барлиқ әрбаблири зәнҗирдә бағланған еди.□

11 Сәнму мәс болисән;

Сән мөкүнүвалисән;

Сән дүшмәндин һимайә издәп жүрисән;□

12 Сениң барлиқ истиһкамлириң худди тунҗа мевигә киргән әнҗир дәриғиниң әнҗирлиригә охшайду;

Бирла силкисә, улар йегүчиниң ағзиға чүшиду.

13 Мана, хәлқиң шәһириңдә қиз-аяллардәк болуп қалди;

Зиминиңниң қовуқлири дүшмәнлириңгә кәң ичилиду;

От төмүр тақақлириңни йәп кетиду.□

14 Әнди муһасиригә тәйярлиқ қилип су тартип қой!

Қорғанлириңни мустәһкәмлә!

Сеғиз топидин лай етип,

Һак лайни чәйләп қой!

Хумданни раслап қой!

15 От сени шу йәрдә йәп кетиду;

Қилич сени үзүп ташлайду;

У сени чекәткә личинкисидәк йәватиду;

Әнди өзүңни чекәткә личинкилиридәк көп қил,

Чекәткидәк өзүңни зор көп қил!

16 Сән содигәрлириңни асмандики юлтузлардин көп қилдиң;

Мана, чекәткә личинкиси қанат чиқирип, учуп кетиду!□

17 Сениң әрбаблириң чекәткиләрдәк,

Сәрдарлириң миҗир-миҗир чақчиқизлардәк болиду;

Мана улар соғ күнидә читлар ичигә киривелип макан қилиду;

Қуяш чиққанда, улар қечип кетиду,

Барған йерини тапқили болмайду.□

18 Чопанлириң үгдәп қалди, и Асурийәниң падишаси;

Сениң ақсүнәклириң җим ятиду;

Хәлқиң тағлар үстигә тарқилип кәтти,

Һеч ким уларни жиғмайду;□

19 Сениң яраң давасиз,

Сениң зәхмиң еғирдур;

Хәвириңни аңлиғанларниң һәммиси үстүңдин чавак чалиду;

Чүнки тохтавсиз рәзиллигиң кимниң бешиға кәлмигәнду?

□3:1 «Қанлиқ шәһәргә вай!» — «қанлиқ шәһәр» Нинәвә шәһирини көрситиду, әлвәттә; 1-3-айәтләрдә, бөсүп киргән қошунлири, шундақла уларниң қирғинчилиғи тәсвирлиниду.

□3:4 «Сеһирләрниң пири у» — «у» бу йәрдә Нинәвә шәһирини көрситиду. «у... әлләрни паһишивазлиғи, җәмәтләрни сеһирлири билән сетиветиду; сән шеринсухән паһишиниң нурғун паһишиликлири түпәйлидин,...» — Нинәвәдикиләр рәһимсизлик, зораванлиқтин һәвәс алған болупла қалмай, йәнә көп әлләргә көп җадугәрлик һәм хурапатлиқ өрп-адәтлирини һәм өзлириниң паскина бутпәрәслигини тарқатқан еди.

□3:7 «Мән саңа тәсәлли бәргүчиләрни нәдин тепип беримән?» — Наһум пәйғәмбәр мошу йәрдә сөз ойини қилип өзиниң исми («тәсәлли бәргүчи» дегән мәнидә) үстидә кинайилик, һәҗвий гәп қилиду. У өзиниң Йәһуда хәлқигә бешарәтлири билән тәсәлли бәргән еди. Бирақ «Нинәвә шәһири үчүн «Наһум»лар нәдин тепилиду?».

□3:9 «Пут һәм Ливийәликләр униңға ярдәмчи еди» — «Пут» дегән жут һазирқи Сомалийә. «Ливийә», йәни «Либя»ниң қедимки исми «Куш».

□3:10 «Уму (Но-Амонму, 8-айәтни көрүң) елип кетилип, әсирликкә чүшкән; барлиқ коча бешида бовақлири чөрүп ташливетилди,....» — Мисирдики чоң шәһәр «Но-Амон» интайин мустәһкәм, һәтта Асурийә шәһиридин техиму «йеңилмәс» еди. У Нил (деңиздәк кәң болған) дәриясиниң төрт еқими арисиға җайлашқан болуп, 20000 җәң һарвуси, 100 дәрвазилиқ зор егиз сепили бар, төрт мәмликәт билән иттипақдаш еди. Шуңа у «йеңилмәс бир шәһәр» дәп һесапланған. Бирақ у Асурийә падишаси Ашурбанипал тәрипидин миладийәдин илгәрки 665-жили рәһимсизлик билән битчит қилинди.

□3:11 «Сәнму мәс болисән; сән мөкүнүвалисән,...» — «сәнму мәс болисән» — тарихта көп күчлүк шәһәрләр өзидә турғучиларниң бехәстилик қилиши вә өзлиридин мәғрурлинип һарақ ичип мәс болуши билән, дүшмәнләр бөсүп киргән. Но-Амонниң әһвалиму бәлким шундақ болған, Нинәвәниң ақивити җәзмән шундақ болиду.

□3:13 «хәлқиң шәһириңдә қиз-аяллардәк болуп қалди» — бу икки бислиқ гәп. Биринчидин Нинәвә шәһиридики көп әрләр шу дәвирдики падишаси Сардонополисқа әгишип бәччиваз болуп кәтти. Сардонополис өзи аялчә кийинип жүрәтти. Бу ишлар Худа алдида өзлиригә җаза елип келидиған еғир гуна еди. Иккинчидин, җәңгә кәлгәндә, Асурийә хәлқи қиз-аяллардәк қорқуп кетип қачидиғанлиғини көрситиду.

□3:16 «чекәткә личинкиси қанат чиқирип, учуп кетиду!» — «чекәткә личинкиси ... учуп кетиду» дегәнниң мәнаси бәлким Нинәвәниң көп содигәрлири бешиға еғир күн чүшкәндә униңға һеч ярдәм бәрмәй, «бекар тәләп» чекәткидәк қечип кетиду; 17-айәтниму көрүң.

□3:17 «Сениң әрбаблириң чекәткиләрдәк, сәрдарлириң миҗир-миҗир чақчиқизлардәк болиду; мана улар соғ күнидә читлар ичигә киривелип макан қилиду» — чекәткиләр соғ вақитларда «тоңлап қетип қалиду», һеч мидирлимас болуп қалиду. Асурийәниң әскәрлири охшашла җәңгә киргәндә һеч һәрикәт қилмай, бәлким қорқунучтин «қетип қалиду». Андин улар қечип «учуп кетиду».

□3:18 «Чопанлириң үгдәп қалди, и Асурийәниң падишаси.... хәлқиң тағлар үстигә тарқилип кәтти, һеч ким уларни жиғмайду...» — «чопанлириң» йәни «хәлиқ падичилириң», «хәлиқ баққучилириң» бәлким мәмликәтниң бехәтәрлигигә мәсъул болғанларни, йәни падишаниң ордисидики вәзир-вузралирини көрситиду. Һеч ким тарқилип кәткән Асурийә хәлқидин хәвәр елип уларни жиғмайду, бақмайду. «Хәлқиң тағлар үстигә тарқилип кәтти, һеч ким уларни жиғмайду...» — Асурийә хәлқи тарқитилғандин кейин һәргиз қайтидин бир әл-жут болмиған.