1 Uiaba maike Ierusalema, a bosi Bethefage, abele Oliua paser, ege Iesu namariklu neis tabara kaimeg giz,

2 A kega, Ua bakeamlam abele uteb uaba opem, ege uaba sobkak erdali abele asina didbarda, abara uerem okakis: a uaba uiaba detue, a karim tegared.

3 Ese nerute le uabi nerute mer detager, a uaba abi detager, Opole lagelag; E sobkak uabi ikuar.

4 Epe gaire lu uridili ikerare, iaueakai bakedilu abele perofeta ra mer, kega,

5 Uaba abi detagerare Siona ra neur uerem, Dasmer, mara Opole marim tabarki, E gebegeb tonar, E egimulu abele asina, a abara uerem ko.

6 Ege neis abara kaimeg giz bekeamulei, a ko ikeli mokakalam Iesu uiabim mer tigri;

7 Ui ge dagaretlei abele asina pako abara uerem, a uiaba am uali dikmerikare abi sor ge, a Iesu ko egimulu.

8 Abele gaire le lakub uiaba am uali esegarare abele gab ge, a uader le isemar lu tam, a esegarare abele gab ge.

9 Abele gaire le lakub uader le kekiam pako uader le irmili, a uiaba ereretikri, kega, Hosana abele Dauida ra Uerem: Mapodan le tabarki Opole ra nei, Hosana gaire lu tumge.

10 E bosi Ierusalema, abele uteb uridili boro, a mer kega, Nete le dali?

11 Ege le lakub uiaba kega, Abele Iesu ike, Nazareta perofeta, Galilaialam.

12 Iesu bao Ade ra zogo meta ge, E namuare uridili adige gaire le lu terarpeirare abele zogo meta ge, a erasigilu laulau uader le mani bodomalam, pako sik uader le dibadib bodomalam;

13 E uiabim detager, Emetu detali, Kara meta nei atker esorerapare meta; a uaba ikerare mokakalam baker kur ge eruam le giz.

14 Ege abim tabakeuare abele zogo meta ge, uader le pone asamasam, pako uader le ibibi; E uiabi nadgirare.

15 Gaire au zogozogo le giz pako aotale giz a uiaba erdali abara adigir E ikeli, a kebile giz ereretikri abele zogo meta, kega, Hosana abele Dauida ra Uerem; ege uiaba au uekueku,

16 Ege uiaba abim kega, Nako ma asoli uiaba mer? Ege Iesu uiabi etkalu, Uao; nako uaba nole atager kak, Ma derser uedakiriare gaire sursur uerem giz uiaba telam, pako nano uerem giz?

17 E uiabi dikaer, a bakeam abele uteblam Bethania tabarki, a emrilu.

18 Abele kebi gerger E iako takomeda abele utebim, E uererege.

19 E dasmer nerute suke abele gab ge, E tabarki, a erdali a nole lu kak abi dog, no lam tepteb; E abim kega, Ma nole ko omeid mara turum niai karem. Epe abele suke sobkak uatuet.

20 Abara kaimeg giz uiaba erdali a uiaba abi damerare, a mer kega, Nako abele suke ike keserkeser ekeamud?

21 A Iesu uiabi detager, kega, Ageakar kaka uabi detager, Ese uaba oituli, a nole asared kak, uaba ko ikerare nole abele lu suke tepteb, epe ese uaba detagerare abele paser, Ma agisi ma ko bataueret abele gur ge, E umele bakeam.

22 Gaire lu uridili uaba karim damosare abele esoreraparlam, a oaturlam nagri, uaba ko nagri.

23 E balu abele zogo meta, a ereuerem, E abim tabakeuare au zogozogo le giz pako aule giz abele ged ge, a uiaba mer, kega, Nalu abele sirdam ma ikeli gaire lu? Nete le marim ikuar abele sirdam?

24 Ege Iesu uiabim etkalu, kega, Kaka uabi itimer netat mer, ese uaba kari etomeret, a kaka ko uabi etomeret abele sirdam gaire lu kaka ikeli.

25 Nako Ioane ra bapataiso nagelam? nako kotorlam, nako lelam? Ege uiaba mer atager, kega, Ese meriba daratager, kega, Kotorlam; ege E meribim detager, Nalugelam uaba nole oatur kak abim?

26 Ese meriba abi detagerare, Lelam; meriba geum gaire le lakub; abelelam uiaba uridili dikiaporare Ioane E perofeta.

27 Ege uiaba Iesuim etkalu, kega, Keriba umer kak. E uiabim detager, Kaka umer kak uabi etomeret abele sirdam kaka ikeli gaire lu uridili.

28 Nako uaba dikiapor? Nerute le neis abara uerem; E bakeam abele narbet uerem, a abim kega, Makanali ma bakeam peirdi abele gerger kara uina gedub dorge ikeli.

29 Ege E abim etkalu, kega, Kaka nole lakak; keubu ko obazgeda, E bakeam.

30 E ko bakeam nerute uerem, a abara netat mer mokakalam, Ege E abim etkalu, kega, Opole ae, Kaka umele bakeam; epe no mer, a nole bakeam.

31 Nete le neis uerem ikeli taba aba ra lag? Ege uiaba abim kega, Narbet uerem. Ege Iesu uiabim etkalu, Ageakar kaka uabi detager, Kekiam telona giz pako gab kosker giz abele Ade ra baselaia ge bardare, a uaba keubu.

32 Abelelam Ioane kekiam uabim tabarki barkak tonar ra gab, ege uaba nole abi oatur kak; ege gaire telona giz pako gab kosker giz abi egardare; a uaba umele erdali, a uaba nole keubu obazged, ueakai abim oituli.

33 Uaba aserare nerute mer babisdarie: Nerute tarim le, E ikeli tabara uina gedub, E kar dirumed, a daiui abele uteb uina detager, a ko ikeli au kar, E uiabim nakuarare gaire uina gedub le, E bakeam muriz gedim.

34 Maike nur abi, E uiabim namarkare abara memeg le giz uiaba uina gedub le, ko taraisare gaire uina turum.

35 Ege uiaba gaire uina gedub le erpeirare abara memeg le giz, uiaba damarka nerute, a ipit eumilu nerute, a nerute le uiaba baker erborare.

36 E uader memeg le ko namarkare gaire le keubu, mokakalam a neis neis memeg le kekiam: a uiaba ko dedkolare uiabim.

37 Epe keubu E namarid tabara uerem uiabim, E dikiapor, kega, Uiaba geum kara uerem.

38 A gaire uina gedub le uiaba erdali abara uerem, ege uiaba mer atager, Abara kesem peike; tabakeuare meriba abi ipit eumilu, iaueakai meriba ais abara ged.

39 Ege uiaba abi erpeirare a ko batauerd adige uina gedublam, epe uiaba abi ipitare eumilu.

40 Dasmer, ese opole tabarki, E ged kem le, nalu lu ikeli uiabim gaire uina gedub le?

41 Ege uiaba abi detagerare, E aukase narsare gaire le adud tonar, E ko nakuarare abele uina gedub uader le ko dorge ikerare, a uiaba abi ikuarare turum gaire urut.

42 Iesu uiabi detager, Nako uaba nole etag abele jauali zogo, Abele baker gaire meta tonar le desauersili, a dikri, a mena ko ikeli kop tumge; abele lu Opole ikeli, meriba dasmerare, a abi damreda?

43 Abelelam kaka uabi detager, Ade ra baselaia ais adem uabielam, a ko nakuar nerute ged, ueakai tais abara turum.

44 Ese le abi tumgeabele baker abara lidi erpei: epe abele le baker abi tumge, E mogmog a diskimir.

45 Au zogozogo le giz pako Faresaio giz aserare abara mer babisdarie, a uiaba opasereret uiabielam Iesu detager.

46 Ege uiaba lagelag abi erpeirare, a uiaba geum lekublam, abelelam uiaba dikiaporare E perofeta dali.