1 Ege E uiabi detaut nerute mer babisidarie, iaueakai ner kak esorerapare, a nolea obogai;

2 E uiabi daratagerare, kega, Nerute autumer le emeri nerute uteb, E nole geum Adim, pako leem:

3 Abele uteb nagri kosker, emetu eumida abara kimiar; E ko bakeamulu abim gaire gerger, a abi detager, kega, Ma itimer, le nagri kara lu abi dog.

4 Uader gerger umer kak asoli: a keubu ga dikiapore muige taba nerkep ge, kega, Kaka nole geum Adim, pako leem;

5 A nerute, abele kosker, emetu eumida abara kimiar, E ner kak kari namosili, kaka ko nautumerare abi lu gem, iaueakai nole kari aogat kak.

6 Ege Opole lut uiabi daratagerare, Ua aserare autumer le la mer.

7 Ege Ade uapum abelelam gaire abara le, uiaba ner kak ereretikri gerger ge a ki ge, nako uiaba itimer uiaba lu?

8 Kaka uabi detagereda, E dudum nautumerare uiaba lu. Ese Le la Uerem uatabaruk, nako E nagri le abim oituli geseb ge?

9 E ge daratagerare abele mer babisidarie uiabim uader le, uiaba dikiapor oituli, a uader dituaki:

10 Neisi le bakeamulei zogo meta ge esorerapare; nerute Faresaio, a nerute telona.

11 Faresaio no tepteb ekue, E gebgeb esorerapare abele mer, Ade, kaka marim esoao, kaka nole mokakalam uader lu gatkamer le, adud tonar, a eruam, a nole mokakalam abele telona.

12 Gaire sabath ge, neis gaber kaka leuer baili; kaka mari naisuere ten lu kaka erdali.

13 Abele telona ekuei muriz ge, umer kak kotorem egreemalu, epe marmot ge bamu, a detager, kega, Kara Ade, ma omare kaka uit le.

14 Kaka uabi detager, kega, Abele le bakeamu taba metaem, E debele, nole mokakalam nerute: abelelam E lagelag aule, le kebile; abele le E lagelag kebile, E aule.

15 Ege uiaba tais sursur sursur uerem, iaueakai E uiabi uaituti: ege kaimeg giz erdarare, ege uiaba daisumdarare.

16 Iesu de nardarare, a uiabi darabgerare, kega, Karim sursur sursur uerem taraisare, ua nolea daraisumdarare: abelelam mokakalam uader emeri Ade ra baselaia.

17 Ageakar, kaka uabi detagereda, Ese nerute le nolea erpei Ade ra baselaia, E mokakalam kebile, umer kak ko bardare.

18 Ege nerute kole lut abi itimer, kega, Ereuer debele, nalu lu kaka ikeli, iaueakai kaka nagri eded aseamur kak?

19 A Iesu de abi detager, kega, Nalu ma detager kaka debele? nolea le debele, netate Ade tepteb.

20 Ege ma umele Ade ra gelar, Ma nolea adud tonar, Ma nolea ipit eumilu nerute le, Ma nolea eruam, Ma nolea bes mer, Mamoro asoli mabi abera a apuera.

21 Ege E abi detager, kega, Kaka irmili gaire lu uridili kebi ueremlam.

22 Ege Iesu de asoli abara mer, ege abi detager, kega, Netate lu ma nolea erdali: ma terapei mara lu uridili, ma naisuerare uader le nole lu kak, iaueakai ma nagri debe lu kotor ge: a ma tabakeam, kari narmili.

23 Ege E asoli abele mer, abara nerkep au asiasi; abelelam E lu giz ra apu.

24 Epe Iesu abi dasmer, E detager, kega, Au beber lu giz ra apu barota Ade ra baselaia!

25 Kamela norgor ko badare atketlu muige, a le lu giz ra apu etkoprida Ade ra baselaia badare.

26 Uader le giz aserare abele mer, a uiaba detagerare, kega, Ese mokakalam, nete le umele eded?

27 Ege E uiabi daratagerare, kega, Abele lu le umer kak ikeli, epe Ade umele ikeli.

28 Epe Peteru abi detager, kega, Dasmer, keriba dikaer gaire lu uridili, a keriba mari irmili.

29 Ege E uiabi daratagerare, kega, Ageakar, kaka uabi detager, kega, Ese nerute le dikaer tabara meta, pako aba a apu, pako tabara le, pako tabara kosker, a omasker, Ade ra baselaialam,

30 Epe E nagri gaire dordor lu peirdi, pako kerker ge niaiem, eded aseamur kak.

31 E ge naisare tuelf le, E uiabi daratagerare, Dasmer, mi nabakeuare Ierusalemaem, iaueakai ageakarem gaire lu uridili perofeta giz detarare abele mer abim Le la Uerem.

32 Abelelam, E nakuarare uiabim gaire nogle, ui ge abi negdegarare, a abi dedkoli, a uiaba mosu ituare:

33 A uiaba abi damarik, a abi ipit eumilu: a thri gerger E ko eded akaida.

34 A uiaba umer kak asoli gaire lu; ege ispilu abele mer uiabim, uiaba umer kak abele mer, E uiabi daratagerare.

35 Ege E maike Ieriko ge, a nerute sadamer le emeri gab ge E lu damosi:

36 Ege E asor gaire le lakub bakeuare, E uiabi nautumerare, kega, Nalu abele lu?

37 Ui ge abi detagerare, kega, Iesu, Nazareta le, E bakeamu.

38 Ege E ereretikri, kega, Iesu, Dauida ra Uerem, ma kari omare.

39 Ui ge, uader kekiam, a abi daisumdarare, Ma baimi: epe E au kase ereretikri, Dauida ra Uerem, ma kari omare.

40 Ege Iesu ekuei, a uiabi daratagerare, kega, Karim tegardare; ege abi maiem, a abi itimer, kega,

41 Nalu lu ma laglag, kaka marim akere? E abim detaut, kega, Opole, kara pone bakaerti.

42 Ege Iesu de abi detager, kega, Mara pone obakaelei: mabi oatulam ma nagri eded.

43 Ege abara pone bakaelei, E abi irmili, E Ade deseper: ege abele le uridili ui nardarare, epe uiaba Ade desepereda.