1 Iesu Oliua paserem bakeamulu.

2 Idim ge, Iesu iako zogo meta ge balu, gaire le lakub abim tabakeuare; E emri, a uiabim okadeskeda.

3 Uiaba aotale giz pako Faresaio giz abim tegaret nerute eruam kosker, emetu erpei kerker eruamlam; a eipu ekueirare,

4 A Iesuim detager, kega, Eruere le, abele kosker keriba eruamem terpei.

5 Emetu Mose keribi mer tigri, muige gelar, ko bakeru itimdare mokakalam: nako mara mer abim?

6 Uiaba detaut abele ge ko abi mirem, ueakai nagri mer ais abielam. Iesu esorgiru, a seb ge detali tagu.

7 Uiaba elele abi itmerare, E tekue, a uiabim detaut, kega, Debele le eruam kak kekiam bakeru abi itimdi.

8 E iako esorgiru, a seb ge detali tagu.

9 Uiaba emetu asoli, uiaba nerute a nerute eosmeda, ditimeda aule a mop ge itiagi: Iesu tepteb pako kosker eipu ekueilu.

10 Iesu etilu, a kosker tepteb dasmer, a abi detager, Kosker, uiaba nade marim mer ais? nako nole le mari bakeru natimdi?

11 E detaut, kega, Opole, nolea kar. Iesu iako abim detager, kega, Ka ko nole mari bakeru natimili: bakeam; iako nole eruam kak.

12 Iesu iako uiabim detaut, kega, Kaka geseb datki: abele le kari narmili E nole kupkupi ge bakeam, epe E nagri datki eded.

13 Faresaio giz abi detautare, kega, Mabu ma ageakarem; nole ageakar mara mer.

14 Iesu uiabim detaut, kega, Ese karababu kari ageakarem, kara mer ageakar; abelelam kaka umele kaka nagelam, a kai na gedim bakeam; uaba nole umer kak kaka nagelam, a kai na gedim bakeam.

15 Uaba erkepse irmi gem ge irmili; kaka nole nerute le erkepse irmi.

16 Ese kaka erkepse irmi, ageakar kaka erkepse irmi; abelelam kaka nole tepteb, epe kaka pako Baba, kari namarida.

17 Emetu detali muige uaba gelar, kega, Ageakar abele mer neisi le ageakarem.

18 Karbabu kari ageakarem, a Baba, kari namarida, kari ageakarem.

19 Uiaba abi detautare, kega, Mara Aba nade? Iesu detaut, Uaba nole kari umer kak, a kara Aba: ese uaba kari umele, uaba kara Aba umele.

20 Abele gaire mer Iesu detaut mani epei ge, E zogo meta ge okadeskeda: a nole le abi terpei; abelelam abara kerker nole tabarki.

21 Iesu iako uiabim detaut, kega, Kai nabakeamulu, a uaba ko kari naraimerare, a uaba ko eumida uabi uitelam: uaba umer kak ko bakeam abele utebem kaka bakeam.

22 Iudaia le giz mer atager, kega, Nako, tababu ko abi ipit, abelelam E detager, kega, Uaba umer kak ko bakeam abele utebem kaka bakeam?

23 E uiabim detaut, kega, Uaba lokodlam; kaka kotorlam: uaba geseplam; kai nole geseplam.

24 Abelelam kaka uabi detager, kega, Uaba ko eumida uaba uitelam: ese uaba nole egaret Kakanali, uaba ko eumida uabi uitelam.

25 Uiaba abi detautare, kega, Mama nete? Iesu uiabi detaut, kega, Pedali kaka uabi detager gizlam.

26 Kaka nagri dordor lu ko detager, a ko dikiapor uabim: E ageakar, kari namarida; kaka gesepem detager gaire lu kaka asoli abielam.

27 Uiaba nole akmer kak E Abaem uiabim detager.

28 Iesu uiabim detaut, kega, Ese uaba Le la Uerem armem tagis, uaba ko akmer kakanali, a kaka nole karbabu nerute lu ikeli, epe mokakalam Baba kari ereuerem, kaka detaut abele gaire lu.

29 E kari dog, kari namarida; E nole kari nakaerti; abelelam kaka gaire lu ikeli abim sererge.

30 E detager abele gaire lu, a gaire le abim oituli.

31 Iesu detager, uiabim gaire Iudaia le giz abim oituli, kega, Ese kara mer niaiem uabi dog, uaba kara kaimeg giz kar;

32 Uaba ko ageakar akmer, abele ageakar ko uabi emariklu.

33 Uiaba abi detautare, kega, Keriba Aberahama ra omasker, a nole didbare nerute le dog: epe nako ma detager, Keriba ko emariklu?

34 Iesu uiabim detaut, kega, Ageakar, ageakar, kaka uabi detager, kega, Abele le uit ikeli, E uite ra memeg le.

35 Abele memeg le nole uteb ge niaiem emri: mamoro uerem niaiem emri.

36 Ese Uerem uabi emariklu, uaba ageakar emariklu.

37 Kaka umele uaba Aberahama ra omasker; epe nako uaba deraimer kari ipit, abelelam kara mer nole uabi nerkep ge.

38 Kaka detager kaka dasmer kari Baba dog: a uaba ikerare abele gaire lu uaba asoli uaba abalam.

39 Uiaba abi detautare, kega, Aberahama keriba aba. Iesu uiabi detaut, kega, Ese uaba Aberahama ra omasker, uaba ko ikeli Aberahama ra dorge.

40 Peirdi uaba naraimer ko kari napit, nerute le uabi detager ageakar, kaka asoli Adelam: Aberahama nole ikeli mokakalam.

41 Uaba ikeli uaba aba ra dorge. Uiaba abi detager, kega, Keriba nole eruam omasker; netate keriba Aba, Ade.

42 Iesu uiabim detaut, kega, Ese Ade uaba Aba, uaba ko kari lag: abelelam kaka nabue, a ge tabarki Adelam; kaka nole karbabu tabarki, epe E kari namarida.

43 Nako uaba nole akmer kak kara mer? Abelelam uaba umer kak kara mer asoli.

44 Uaba uaba abalam diabolo, uaba lagelag uaba abara lag ikeli. E dipe le gizelam, a nole ageakar, abelelam nole nerute ageakar abi dog. Ese E bes mer detaut, E detaut tababielam; abelelam E besbes, a aba bes apu.

45 Abelelam kaka ageakar detaut, uaba nole kari oatur kak.

46 Nitide uabim kari uit natomerti? Ese kaka ageakar detaut, epe nako uaba nole kari oatur kak?

47 Abele le Adelam, Ade ra mer asoli: uaba nole asor kak, abelelam uaba nole Adelam.

48 Iudaia giz abi detaut, kega, Nako, keriba nole barkak detaut ma Samaria le, a demoni mari dog?

49 Iesu detaut, kega, Kara nole nagri demoni; ege kaka kara Aba naospereda, a uaba kari nakekeli.

50 Kaka nole deraimer karababu naospereda: ege nerute le deraimer, a baraditug.

51 Ageakar, ageakar, kaka uabi detager, kega, Ese nerute le kara mer asoli, E nole eud asmer kak niai karem.

52 Iudaia giz abi detautare, Peirdi keriba umele mari dog demoni. Aberahama emetu eumida, pako gaire perofeta; a mama detager, kega, Ese nerute le kara mer asoli, E eud asmer kak niai karem.

53 Nako, mama aule tumem keriba aba Aberahama emetu eumida? a gaire perofeta ko eumida: nete mama depegili?

54 Iesu detaut, kega, Ese kaka karababu baospili, nole ageakar karababu naospili: kara Aba kari naospili; E dali uaba detaut uaba Ade;

55 Uaba nole abi umer kak: kaka abim umele; ese kaka detaut, kega, Kaka nole abi umer kak, kaka iako besbes mokakalam uaba; epe kaka abim umele, a abara mer asoli.

56 Uaba aba Aberahama sererge kara gerger dasmer; E emetu dasmer, E ko sererge.

57 Iudaia giz abi detautare, kega, Mara urut nole fifeti, epe nako mama Aberahama dasmer?

58 Iesu uiabim detaut, kega, Ageakar, ageakar, kaka uabi detager, Kakanali, Aberahama aosmer kak.

59 Uiaba baker taisare ko abi itimdare: a Iesu gumik bakeamulu, a teosmelu zogo metalam.