22
1 Tɔɠɔɠulagi vizɔgɛ naavolo wolaiti ba,
è unfe zɔiti ma, naa vizɔgɛ, é leʋe walii ʋa ta zanugi.
2 Kpɛtɛ nui ta bala nui ti ɓɔgɛ faa ɠila ma:
Ɠɔoɠɔ GALAGI ɠa é ti felegɔ pɛ kpɛtɛa.
3 Ɠima nui ɠa ɗa maanɔɠɔi ɠa é ʋaazu, é lɛkpɛ tuɠɔ,
kɛlɛ nui é la dɛ faa mɔinmɔin kwɛɛ, naa ɠa ɗa ziɛ ná ɠobaʋɛ, é ma ɓɔlɔi zɔlɔɔ.
4 Ɓɔɠɔmaayeii ta Ɠɔoɠɔ GALAGI ɠaazuluabai ma ɠulanumai ɠa ga,
kulagaanɛɛzui, ta unfemai, ta sii zuɠoozai.
5 Yaava ʋelei, ɠaingiti ka ti su, ta baliiti, maanɛai nu maaɠooza ba,
ni è-yɛnvui wɔin ɠa è ma.
6 Doungoi ɠala ga pelei maanɛai é ziɛ la,* Tati pelei taɠili ɓalaa ka ga niiti: doungoi maaɠolo ga siɛ ʋelei, ɓaa doungoi maaɠolo ná-eteai lɔɔzei ziɛgi zu.
anɛɛ siɛgi zu é ʋɔlɔzaɠasu da, é la zeɠea ba.
7 Kpɛtɛ nui ɠa ɗa zei, bala nui unda.
Kuye zeɠe nui ɠa ga duɔi, kuye ʋɛɛ nui ya.
8 Zɔi a telebotalai vaza, toɠa teʋe ga maanɔɠɔi,
ná-zobogi ɠa ɠoloɠolo, nii é toomai ɠɛɛzu la.
9 Nui é nuɓɔɠɔlai ɠɛɛzu seiɲɔɠɔiti bɛ, toɠa tuyai zɔlɔɔ,
tɔɔzei ta ɓɔsu ná-daamianigi ma ta bala nui.
10 Ɲɛɛɠulasu nui ɓɛ, kpɔɛi ɠa ɓe,
goomaaɠaaliiti ta poomugiti ta ɓe.
11 Ni nu wɔinʋɛ é ɠɛ ga masagi nɛɛɲɔɠɔi,
kɛni kisiɛ ʋagɔiti ti nɛɛ bɛ, ta nɛɛnɛ kpɔɛiti.
12 Ɠɔoɠɔ GALAGI ɠa wɛlɛzu faaɠwɛgi ma,
kɛlɛ toɠa ɗa yaava nui ná-kisiɛiti supu.
13 Ɲaka nui ɠɛ: «Zalai ɠa loni eteaʋɛ,
é mina lia bàlizu ga pelei zu taa zaamaʋɛ!»
14 Wɛɛnziɛ anzanuiti daaʋɛ ɠa ga zeɠezaɠai suɠoozaai,
nui Ɠɔoɠɔ GALAGI yiiɠaawanazu ma, naa ɠa loo su.† Wɛlɛ ʋɛti: 2:16; 5:3, 5; 6:24; 7:5.
15 Ɠimalalai ɠiliʋɛ doungoi yii ʋa,
maaɠolo ɓakɔi ɠa maaɠooza ba.
16 Zɔi é bala nui laazuɠɔlizu, é ʋa tɔnɔ sɔlɔɔ ba,
ta zɔi é vebɛaniiti feezu kpɛtɛ nui ʋɛ, naati gaaɓelazuʋɛ ɠa ɠɛ ga baladai.
Ɠima nuiti daawooiti
17 Dama, è woilo ga pagɔ ɠima nuiti gooi ma,
yiilaalao faaɠwɛgi luɠɔ, gè feezu è ya.
18 Mazɔlɔɔ fizɔgɛ è ti makɛ ɠisu,
è ɠɛʋele ɓɛtɛ yeenɔpɛ, è ɗa ti zuɠula.
19 Wɔ̀inʋɛ ga è ɠito Ɠɔoɠɔ GALAGI ʋa,
naa ɠa é ba, za, nà è ɠalasu, ɗa ɓalaagi.
20 Gè la tɛnɛ gooiti ta kidafaawu vaiti sɛʋɛni è ma,
ná zeizu ʋa ɠɛ ga puusaʋagɔ (30),‡ puusaʋagɔ: Nii wola la ɠoleni Eɓulu wooi zu. Tati pelei taɠili ɓalaa ka ga niiti: mɔunpa, ɓaa niiti ti wola ʋagai. ɓaa?
21 Naati ta kala kitei ve è ya, soloogai kitogi ma.
Ni nui ta a è leʋena, gaamai ɠaiziɛzu,
ɗa zoo è faa gaamaiti bo ma, kisuɠala.
22 Mina lo bala nui ná-zobotalai ma, è ʋa maavo,
mina maawɔin nui maanɔɠɔ tukpɔɠaaleʋezuʋɛ.
23 Tɔɔzei Ɠɔoɠɔ GALAGI ɠa ti maalobo,
toɠa naama nuiti zɛnvui ɠula ti ya, niiti ti zɔiti zeaɠɔligiti kulazu ti ya.
24 Mina ziiɠaawanawana nu zeizei,
mina ziiɠula nu ɠɛ ga ziɛpoluɲɔɠɔ,
25 è ʋa li ɓɔɠɔ maaɠolozu ga siɛ ʋelei,
è ʋa bali la ɓɔɠɔ luɠɔ ɗa-eteai zu.
26 Mina ɠɛ naati saama, niiti ta ɠɛ ga zeelagaiti,
ziingao faa zu, ta kuye zeɠe vaa zu.§ Wɛlɛ 6:1 zu, ta suɠulazuʋɛ.
27 Mazɔlɔɔ ni ani la è ya, è ʋa sala,
ta è ɓɔɠɔ ʋetei ɠula è ya, è laazu ga.
28 Mina kwɛpelema ʋɔlɔzaɠagi zeɠe daazu,
nii è-mɛmɛwolani ti daani.
29 Ni ɗa zunui ta ɠaana ɠigi ma ná-botii zu,
toɠa zoo é botii ɠɛ masagiti bɛ,
é mina yɛ naati saama, niiti ti la ga sɔɓelama nu.
*22:6 Tati pelei taɠili ɓalaa ka ga niiti: doungoi maaɠolo ga siɛ ʋelei, ɓaa doungoi maaɠolo ná-eteai lɔɔzei ziɛgi zu.
†22:14 Wɛlɛ ʋɛti: 2:16; 5:3, 5; 6:24; 7:5.
‡22:20 puusaʋagɔ: Nii wola la ɠoleni Eɓulu wooi zu. Tati pelei taɠili ɓalaa ka ga niiti: mɔunpa, ɓaa niiti ti wola ʋagai.
§22:26 Wɛlɛ 6:1 zu, ta suɠulazuʋɛ.