1 Man Paul one a Winaꞌam yamug ne Yesu Kiristo Tumtum ye m ke ka bane ka Winaꞌam gaŋ la yadda niŋir keŋ tuon ka nobug, ka ba baŋ Winaꞌam yelsida, line ket ka ba dol Winaꞌam suer la. 2 Ka ti mor tiꞌir ye ti na nye nyovur line kaꞌ naare, lin ka Winaꞌam one kaꞌa ziri sob la, da ziꞌel noor saŋkan ka dunia da nam pu maal la. 3 Ka li saŋa paae la, o nie nyovur line kaꞌa naar la yela o pianꞌad puugin, line ka on one aa ti faangid la, tisi m ye m mool.

4 M sobid gbauŋ kaŋa tisid Titus one ka tinam ne on laꞌam niŋ Yesu Kiristo yadda ka o liebi m biigi ameŋa la.

Ti Baꞌ Winaꞌam ne ti faangid Yesu Kiristo na tis uf yelsum ne sumalisim.

5 Neꞌeŋa yela ka m ke ka fu be Krete, ye fu naae line pu naae la, n gaŋ kpeenmnam yadda niŋidibin la teŋ teŋ wuu mam yel uf siꞌem la, 6 ka ba a popielim dim, ka a poꞌayiŋ dim, ka ba biis niŋ Yesu Kiristo yadda, ka kaꞌ ninyoodnam bee nimbeꞌednama. 7 Ka kpeenm one soꞌe Winaꞌam nidib nar ka o a popielim sob, ka da mor nyeesim bee supeen bee a danuud, bee zaba soba bee one maan zam ye o nye nyoode. 8 Asee ka o diꞌesid saam ne sumalisim, ka a one tum line a suꞌum, ka mor potenꞌer suŋ, ka dol Winaꞌam wada suer suꞌuŋa ka a suꞌum nyain, ka gbanꞌadi o meŋ suꞌuŋa. 9 Ka o siake dol yelmeŋir paꞌalug line ka ba zamis o la, ka o na nyaŋe zaŋ yelsida paꞌalug la, kpemis sieba ka nyaŋ bane zanꞌas paꞌalug la.

10 Ka nidib bedego be bane kiꞌisidi ti paꞌalug la ka ba pianꞌad kaꞌa gbin ne, ka a ziri dim. Li kas kas ane bane dol Jew dim malima line a baŋo kpenꞌeb la. 11 Li nar ka fu ke ka ba sin ka ba nwaꞌad ninsieba ya ne ban paꞌan line pu nar ye ba paꞌal la, ye ba diꞌe yood line pu nar ba la. 12 Li da ane Krete nid, ba meŋ nodiꞌes yinni, yel ye, “Krete dim ane ziri dim saŋa wusa, ka wen wuu moogin bunyuanam, ne gbanyaꞌanam bane a dindiis.” 13 Yel kaŋa a sida, dinzugo saꞌalimi ba ne kpiꞌeuŋ bedego, ye ba dol yelsida suer ne sukpiꞌem, 14 ka bas Jew dim solima yela ne nidib noyelug line yit nimbane zanꞌas yelsida la ni. 15 Bun wusa a nyain tisid one a nyain, amaa bane a dianꞌad dim, ka pu siakid Winaꞌam la, siꞌel siꞌel kaꞌa a nyain tisidi baa, bozugo ba yaꞌam ne ba potenda wusa ane dianꞌad. 16 Ba yet nidib ye ba miꞌ Winaꞌam, amaa ba tuuma paꞌan ye li kaꞌ sidaa. Ba ane nimbeꞌednam, ka pu siakid Winaꞌam noore, ka ku nyaŋe tum tuumsuŋ siꞌa.