Evanjelhu
Mateus
1
Nai Jesus nia bei-ala sira
(Lucas 3:23-38)
1 Livru nee koalia kona ba Jesus Kristu. Jesus husi liurai David nia jerasaun, i David nee husi Abraão nia jerasaun.
2 Jesus nia bei-ala sira nia naran komesa husi Abraão too liurai David hanesan tuir mai nee:
Abraão nia oan Isac.
Isac nia oan Jacó.
Jacó nia oan Judá ho ninia maun-alin sira.
3 Judá nia oan Perez ho Zerá, sira nia inan naran Tamar.
Perez nia oan Hesron.
Hesron nia oan Aram.
4 Aram nia oan Aminadab.
Aminadab nia oan Nahason.
Nahason nia oan Salmon.
5 Salmon nia oan Boaz, nia inan naran Rahab.
Boaz nia oan Obed, nia inan naran Rute.
Obed nia oan Jessé.
6 Jessé nia oan liurai David.
Jesus nia bei-ala sira husi liurai David too nia jerasaun nebee mak militar lori baa dadur iha rai Babilónia, sira nia naran mak tuir mai nee:
David nia oan Salomão, nia inan nee uluk Urias nia feen.
7 Salomão nia oan Roboão.
Roboão nia oan Abias.
Abias nia oan Aza.
8 Aza nia oan Josafat.
Josafat nia oan Jorão.
Jorão nia oan Uzias.
9 Uzias nia oan Jotam.
Jotam nia oan Ahaz.
Ahaz nia oan Ezequias.
10 Ezequias nia oan Manassés.
Manassés nia oan Amon.
Amon nia oan Jozias.
11 Jozias nia oan mak Jekonias ho nia alin sira. Iha sira nia tempu mak militar lori povu Israel baa dadur iha Babilónia.✡ 2 Liurai sira (Reis, Raja-raja) 24:14-15; 2 Krónikas (Tawarikh) 36:10; Jeremias 27:20
12 Jesus nia bei-ala sira husi tempu dadur nee ba oin mak tuir mai nee:
Jekonias nia oan Salatiel.
Salatiel nia oan Zorobabel.
13 Zorobabel nia oan Abiud.
Abiud nia oan Eliakim.
Eliakim nia oan Azur.
14 Azur nia oan Zadok.
Zadok nia oan Jakim.
Jakim nia oan Eliud.
15 Eliud nia oan Eleazar.
Eleazar nia oan Matan.
Matan nia oan Jacó.
16 Jacó nia oan José.
José kaben ho Maria, i Maria mak kous Jesus. Jesus nee, ema mos bolu Nia Mesias, nee dehan katak, Salvador nebee Maromak promete hori uluk kedas atu haruka mai.
17 Nunee, komesa husi Abraão too David hamutuk jerasaun sanulu resin haat. Husi David too militar lori povu Israel baa dadur iha Babilónia mos jerasaun sanulu resin haat. I husi jerasaun nebee dadur iha Babilónia too Mesias hamutuk jerasaun sanulu resin haat tan.
Nai Jesus Kristu moris mai
(Lucas 2:1-7)
18 Istoria kona ba Jesus Kristu nia moris hanesan nee: Nia inan Maria troka prenda ona ho José. Maibee bainhira sira nain rua seidauk moris hamutuk nudar feen ho laen, Maria hatene ona katak nia isin rua liu husi Espiritu Santu nia kbiit.✡ Lucas 1:27 19 Bainhira José hatene katak Maria isin rua ona, nia hakarak atu hakotu sira nain rua nia relasaun. Maibee José lakohi halo moe Maria iha ema barak nia oin, tanba nia ema ida nebee laran moos. Nunee nia desidi atu hakotu nonook deit.
20 Maibee bainhira José hanoin hela buat nee, Nai Maromak nia anju ida mai hatudu aan ba nia liu husi mehi. Anju nee dehan, “José, liurai David nia jerasaun, la bele tauk atu kaben ho Maria. Tanba Labarik nebee mak iha Maria nia kabun laran nee mai husi Espiritu Santu. 21 Maria sei tuur ahi oan mane ida. O tenki foo naran Jesus, tanba Nia mak sei salva Nia povu husi sira nia sala.”* Naran Jesus dehan “Nai Maromak foo salvasaun”. ✡ Lucas 1:31
22 Buat hirak nee hotu sai nunee tuir saida mak Nai Maromak nia profeta hori uluk kedas hakerek ona dehan, 23 “Aban-bainrua iha feto raan ida sei isin rua hodi tuur ahi oan mane ida. Labarik nee nia naran Emanuel.” Nee dehan katak “Maromak hamutuk ho ita”.✡ Isaias 7:14
24 Bainhira José hadeer, nia halo tuir saida mak anju nee hatete ba nia. Nia kaben ho Maria. 25 Maibee nia la halo relasaun ho Maria hanesan feen-laen too Maria tuur ahi. I José foo naran ba Labarik nee, Jesus.✡ Lucas 2:21