15
Masxaxa lu e he sav (7) lapo xat longpangasien kor xil tengan lisa ni ihe ut etan
1 Di, napus neta teimun xa eilep mistal nggo tilang hat xa misak ni nou di nanem usil koute teni. Napus masxaxa lu e he sav (7) xa di lapo xat longpangasien lu e he sav (7). Longpangasien xil ak labe longpangasien kor xil xa ipisen ni xa ekaten na Hi mei duxoh hoxalite teni. ✡ Lev 26:21; Rev 15:6
2 Di, e ut nesao, napus rute ak nggoni melele xa tas mieh e mexal nggoni kilas, e di minehin nggoni ngan xa upang da en. Napus ngan xil xa latesoh texeih e latevae teli e vaeen te neketen tetel vongoro tesa xa diamu, tetel nanao nan, e tetel pupuluen te hisen. Xil di lasoh sangas visal rute xa napus tan nen mahulong nggoni tas e mexal nggoni kilas, e lapo xat harp nae xil xa Hi tesa ni mi xil. 3 Xil lakikei ni sisien xa nggoni ngan xa Mosis, eloheoh na Hi, tekikei ni tetiamu. Lakikei mak tengan lapet rat his ngan xa nggoni sulut sipsip labit,
“Hi Suv te Xeihen,
holesok xil xa di opol ni be tellep e bos pupu. ✡ Eks 15:1; 15:11; Sam 92:5; 111:2; 139:14; Amos 3:13; 4:13; Rev 1:8; 4:8; 11:17; 16:7,14; 19:6,15; 21:22; Dut 32:4; Sam 145:17; Ser 10:10
Obe suv toto te kantri xil vus,
e sexien nam xil vus momal e be reitin.
4 Moletin xil vus limerere ni xouk.
Xil lipet rat hisom ihe nesao,
vengan xouk kestang obe eo.✡ Ser 10:6-7; Sam 86:9; Mal 1:11
Kantri xil vus limei e limot minuk,
vengan xa lapus kila xa sexien nam xil momal tevi.”
5 Dutou ni, naketeh be nesao, e vangit Nim Eo na Hi, e napusi xa ladivin rat kaliko xa dakoe xol ut eo te Nim Tavolin. ✡ Eks 38:21; 40:34 6 Masxaxa lu e he sav (7) lastal langgo en, e xil laleh xat longpangasien lu e he sav (7) tengan lisa ni mi moletin xil te ut etan. Xil lasing ni eising xil xa mieh xa lamese tevi e labos pupu, e lasoxolen kaliko xil da xol valhasexil xa kala nen nggoni gol. ✡ Lev 26:21; Rev 15:1 7 Di, tei e neta hat (4) xa meul, misa kekes ni pesin xa bos xa lapol ni ni gol ba mi masxaxa xil vus xa labe lu e he sav (7). Pesin nen xil ak lapolu ni ekaten na Hi xa meul vehakut tang. ✡ Sam 75:8; Aes 51:17,22; Ser 25:15; Rev 14:10; 16:19 8 Eas xa nggo minehinen te xeihen na Hi mei mise xat vangit Nim Eo. Misak ni, moletin ti tave vangite ba vuma … longpangasien lu e he sav (7) xa masxaxa lu e he sav (7) laleh xati mei laduxoh hoxalite teni.✡ Eks 40:34; 1King 8:10-11; 2Kron 5:13-14; Aes 6:4; Esek 44:4
✡15:3: Eks 15:1; 15:11; Sam 92:5; 111:2; 139:14; Amos 3:13; 4:13; Rev 1:8; 4:8; 11:17; 16:7,14; 19:6,15; 21:22; Dut 32:4; Sam 145:17; Ser 10:10
✡15:4: Ser 10:6-7; Sam 86:9; Mal 1:11
✡15:5: Eks 38:21; 40:34
✡15:7: Sam 75:8; Aes 51:17,22; Ser 25:15; Rev 14:10; 16:19
✡15:8: Eks 40:34; 1King 8:10-11; 2Kron 5:13-14; Aes 6:4; Esek 44:4