47
Maaron ye kinik to ighamgham pooz pa mbeb tisob
Mbouŋ to yes Kora
1 Yam tamtoghon to ndug ndug, tinimim iza ve apambar nimamim!
Yam asob alool, ve ambou tapirimim pa Maaron.
2 Pasa Yoova, ye Maaron Tiina To Ilib Pa Ndimaronŋa Tisob. Amatughez pani ve ataghon ŋgar toni.
Onoon kat, ye kinik tiina. Tamtoghon tisob to taan tineep ila samba. Mbo 46:10, 95:3
3 Ye itatan ndug ndug, ve ighur di tineep ila sambamai.
Yes to tiwatagi maau ne, ye irab di tizi, ve nivazag di ila aghemai samba.
4 Iit siŋ to Yakop, Yoova lolo ineep toit kat. Tauto irab motin taan suruvu eez, ve igham pait.
Iit tiniid iza ve tapakur ghiit pa taan to ye igham pait. 1Pe 1:4
5 Maaron izala ina to ghamuuŋ pooz ve ineep tonowe. * Sawa pida, yes Israela timbaad bokis to saveeŋ mbuaaŋ, ve tilaagh irau Yerusalem lolo pa tapait Maaron. Ghoro tighur bokis ilooŋ ila Rumai Tiina lolo muul.
Tovenen tavuur itaŋtaŋ, ve tamtoghon tilolool toman lolodi poia. Mbo 68:18
6 Ambou, ambou!
Ambou ve apait Maaron!
Ambou ve apait kinik toit iza!
7 Pasa Maaron, ye kinik tiina. Tamtoghon tisob to taan tineep ila samba.
8 Maaron ineep ila ina patabuaŋ to ghamuuŋ pooz, ve iŋgin ndug tisob.
Tamtoghon tisob tineep ila samba. Syg 4:9
9 Daba to ndug ndug tilup toman iit to tambesmbees pa Maaron to Abaram, ve itiŋa tapait iza.
Pasa, pooza tisob to taan tineep ila nima.
Tapait iza izala le izala kat.
*47:5: Sawa pida, yes Israela timbaad bokis to saveeŋ mbuaaŋ, ve tilaagh irau Yerusalem lolo pa tapait Maaron. Ghoro tighur bokis ilooŋ ila Rumai Tiina lolo muul.