1 Seini se keteboan te Mèpiya Indan tepad te Batà te Timanem, si Jesu Cristo. 2 Gebii doen insolat te telekeliwat te kagi te Timanem si Isaias,

4 Nayan, dimoton si Juan Memonyagay te kebigtilan. Migtoladà sikandin te kedita te otaw te keilangan megselsel dan te salà ininang dan aw bonyagan dan amon ipetaga-taga dan te pigwedad den te Timanem se salà dan. 5 Medita se otaw lekat te menge lonsod sakop te probinsya te Judiya aw lekat te Jerusalem dimoton amon menenalan kandin. Migselsel dan te menge salà ininang dan, aw binonyagan din dan doton te wayeg te Jordan.

6 Nayan, egpenaol si Juan te saol inabel lekat te bolbol te ayam-ayam kamilo, aw egpengelen te kindal te ayam-ayam. Egpengànen din se menge dolon aw teneb eg-ebaten din doton te kebenesan. 7 Migtoladà sikandin, kagi din, “Doen domateng labi pa melangkaw diyà kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak. 8 Nemonyag a kenyo pineokit te wayeg, meneng sikandin se memonyag kenyo pineokit te Espiritu Santo.”

9 Nayan, wedà kenamay, dimateng si Jesus lekat te lonsod te Nasarit sakop te probinsya te Galiliya, aw migpebonyag sikandin ki Juan kidoen te wayeg te Jordan. 10 Peg-anggin i Jesus lekat te wayeg, pegketà kinità din se langit neowang aw migpedanà se Espiritu Santo diyà kandin iling te selepati. 11 Penga niyan, dinineg dan se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”

12 Penga niyan, inibing sikandin te Espiritu Santo doton te kebigtilan. 13 Mig-ogpà sikandin kidoen taman te kepatan se aldaw, aw binoyo peden i Satanas. Doen menge menenanap te kebenesan dimoma kandin, meneng doen menge anghil mig-ipat kandin.

14 Nayan, penga te pegpedakep i Herod ki Juan Memonyagay, dimoton si Jesus te probinsya te Galiliya aw migtoladà te Mèpiya Indan lekat te Timanem. 15 Minikagi sikandin, “Netoman den se aldaw tapay impakang, aw agpet den lomowan se Timanem diyà kenyo. Pegselsel kaw den te menge salà ininang niyo, aw pemenal kaw den te Mèpiya Indan.”

16 Nayan, minipanaw si Jesus doton te kilid te lanaw te Galiliya. Kinità din se didowa memokotay si Simon aw adi din si Andres nemokot. 17 Timawal si Jesus, “Taking kaw kanak, so megtoladà a kenyo amon kenà ikan se meabat niyo, meneng otaw se ibingen niyo diyà kanak.”

18 Pegketà, tinenanan dan se pokot aw timaking dan ki Jesus.

19 Penga niyan, dimeleg si Jesus te kenà mediyò, aw kinità din si Santiago aw adi din si Juan didowa dan batà i Sebedeo. Kidoen dan te belangay aw migtigmes dan te pokot. 20 Pegketà, tinawal dan heman i Jesus. Tinenanan dan se amay dan kidoen te belangay sipat menge doma otaw egtendanan din, aw timaking dan heman ki Jesus.

21 Penga niyan, dimoton dan te lonsod te Kapirnaom. Pegkesebado, dimoton si Jesus te simbahan te Judiyo aw migtoladà kidoen. 22 Ontò nepela se kedita te otaw dimineg te intoladà din, so kenà iling te pegtoladà te menenoladà te punù ingkeliwat i Moises se pegtoladà i Jesus, so tinekingan si Jesus te tolos.

23 Pegketà, dimateng kidoen te simbahan se otaw dinetengan te bosaw. 24 Timawal sikandin, “Tay, Jesus tege Nasarit. Ikà eg-inabut kenami. Ikà egbaet kenami. Netegahan ko aw sinu ka. Sikona se metòlid otaw insogò te Timanem.”

25 Meneng migsagda si Jesus te bosaw, kagi din, “Kepenek ka den. Lowà ka den diyà kandin.”

26 Impekeseg te bosaw se otaw aw timawal te dakel se kagi din, aw penga niyan limowà diyà kandin. 27 Nepela se kedita te otaw, aw migpebelaw-belaway dan, kagi dan, “Tay law. Sebad se ipegtoladà din. Metolos sikandin, so aw megpelowà sikandin te menge bosaw, egtolò dan kandin.”

28 Wedà kenamay, ontò nedengeg si Jesus kidoen te kedita te ogpeanan medapag doton te probinsya te Galiliya.

29 Wedà kenamay, nesayo si Jesus lekat te simbahan te Judiyo aw dimoton te balay i Simon aw si Andres. Timaking heman si Santiago aw si Juan. 30 Nayan, netigdaan se ogangan i Pedro bayi piglegenaw, aw inindanan dan si Jesus tepad kandin. 31 Penga niyan, dimoton si Jesus kandin, aw minawid te belad din, aw impeenaw din. Migkèpiya sikandin, aw penga niyan mig-inang te kànen i Jesus aw menge doma din.

32 Pegsallep te aldaw sìyan, inibing dan doton ki Jesus se kedita te otaw doen mesakit aw otaw dinetengan te bosaw. 33 Ontò medita se tege Kapirnaom netipon doton te lowà te balay. 34 Pinegolian din se medita otaw doen medita kemolò te mesakit, aw medita heman se bosaw impelowà din lekat te otaw. Meneng sinagda i Jesus se menge bosaw amon eked dan ikagi, so netegahan dan aw sinu sikandin.

35 Pegkeiselem niyan te wedà pa libtak se aldaw, minenaw si Jesus aw dimoton te wedad otaw eg-ogpà, aw migtawal-tawal doton. 36 Meneng nengemahà si Simon aw menge doma otaw kandin. 37 Pegkità dan kandin, minikagi dan, “Pinengemahà ka te kedita te otaw.”

38 Meneng minikagi si Jesus, “Domeleg kidon den doton te menge doma lonsod amon megtoladà a heman doton, so yan se doun te dimini a.”

39 Yan timeped sikandin te kedita te lonsod doton te probinsya te Galiliya, aw migtoladà kidoen te menge simbahan te Judiyo, aw impelowà din se menge bosaw lekat te otaw.

40 Nayan, doen otaw pigtompig dimoton ki Jesus, aw migpeido-ido diyà kandin. Limongken heman sikandin aw minikagi, “Aw doen ibeg nikaw, netegahan ko te mekebatog ka megpegolì kanak.”

41 Neido si Jesus aw nemaed kandin, aw minikagi, “Meibeg a. Kegolian ka.”

42 Pegketà, negolian sikandin. 43-44 Ontò migpunù si Jesus kandin, kagi din, “Keilangan wedad palos otaw indanan no tepad te ininang ko kamno. Meneng doton ka te pengolo te simbahan, aw pekitai se lawa no diyà kandin. Penga niyan, begayi se ibowang no iling te impunù i Moises amon metaga-taga se kedita te otaw te negolian ka den.”

Penga niyan, impekesayo sikandin i Jesus. 45 Meneng pegkesayo din, medita se otaw inindanan din tepad te ininang i Jesus kandin. Yan se doun te wedà pekeokit si Jesus te menge lonsod so pelaban medita se otaw metipon. Yan miglegeb sikandin doton te ogpeanan mediyò te lonsod, aw medita se otaw dimoton kandin lekat te kedita te ogpeanan.