1 Se solat seini, lekat kanak si Pablo. Siak se sebad sogounun i Cristo. Kenà otaw se simogò kanak. Kenà heman pineokit te otaw se migsogò kanak. Meneng se simogò kanak, yan si Jesu Cristo aw Timanem Amay mig-antay ki Cristo lekat te nematay. 2 Kedita day nemenal se mig-indan kenyo te eg-eneng-enengen day se kedita niyo egpemenal te Timanem doton te teg sebad-sebad lonsod te Galasya.

3 Ibeg ko, begayan kaw te tabang aw kelinaw te pedowan lekat te Amay tadon Timanem, aw lekat te Pengolo tadon si Jesu Cristo. 4 Lekat te kandin ibeg, nematay si Cristo amon meabat se kedita te salà tadon, amon eked kidon taking te menge otaw eg-inang te medaet dini te keneyonan. Timolò si Cristo mig-inang kenyan, so yan se ibeg te Timanem Amay tadon. 5 Timanem se iduyun te wedad temanan. Metoman iyan.

6 Menge kedowa ko, ontò a nepela kenyo, so te wedà pa kenamay, timinàyog kaw den ekon te Timanem timawal kenyo pineokit te tabang i Cristo. Nemenal kaw den ekon te sebad kemolò toladà tepad te kelowaan te otaw. 7 Meneng wedad doma kelowaan te otaw, olò sìyan intoladà day kenyo. Se menge otaw egbulung te aneng-aneng niyo, ibeg dan selilinan se Mèpiya Indan tepad ki Cristo te kebolalaw. 8 Meneng eked iyan kepakay. Pengkey sinu se megtoladà te sebad kemolò toladà kenà onawa te intoladà day kenyo kedengan tepad te kelowaan te otaw, yan se ipelumun te Timanem, pengkey sikami, aw pengkey anghil lekat te langit. 9 Inikagi ko den ini kenyo kedengan, meneng todà ko ikegiyen. Pengkey sinu otawi, aw kenà onawa te pinemenalan niyo se itoladà din tepad te kelowaan te otaw lekat te salà, yan se ipelumun te Timanem.

10 Ikà niyo eg-aneng-aneng te ibeg ko iduyun a te doma otaw, meneng ibeg ko Timanem se domuyun kanak. Ikà niyo eg-aneng-aneng te ibeg ko meluba se doma otaw kanak, so aw yan se ibeg ko, eked a pegsagda te pegtoladà dan te kebolalaw. Meneng migsagda a den kandan so sogounun a i Cristo.

11 Menge kedowa ko, seini se ipetaga-taga ko kenyo, kenà lekat te aneng-aneng te otaw se Mèpiya Indan tepad ki Cristo, sìyan intoladà ko kenyo, 12 so wedad otaw migtoladà te Mèpiya Indan diyà kanak, meneng impetaga-taga i Jesu Cristo kanak se Mèpiya Indan seini.

13 Dinineg niyo den se kanak keogpà dalem te pegtaking ko te ketanem te menge Judiyo. Ontò ko pinemilang se menge otaw nemenal te Timanem, aw ibeg ko ipeimatay se kedita dan. 14 Labi a pa measeb diyà te doma ko menge Judiyo onawa te idad ko te peg-iling te punù ingkeliwat i Moises, so labi a pa measeb diyà kandan te pegtolò ko te kedita te ketanem te kemonaan day. 15 Pengkey yan se ininang ko, meneng pineokit te tabang te Timanem, pinemallì a din te wedà a pa tebaw amon inangen a din sogounun i Cristo. Netoman den iyan. 16 Impekità te Timanem kanak se Batà din amon itoladà ko doton te menge otaw kenà Judiyo. Penga niyan, wedad otaw dinotonan ko amon megtoladà kanak. 17 Wedà a heman likò doton te Jerusalem amon toledaan a te menge otaw doton, sìyan ininang sogounun i Cristo monà diyà kanak. Meneng dimeleg a onà doton te kebigtilan iningedanan Arabya, aw penga niyan, limikò a heman doton te lonsod te Damasko.

18 Wedà a doton te Jerusalem lamig nepenga se telo se omay. Miglegeb a doton ki Pedro. Olò dowa simana se kenamay ko mig-ogpà doton kandin. 19 Wedad doma sogounun i Cristo pigkità ko, olò sìyan kedowa i Jesus si Santiago. 20 Ontò benal se insolat ko kenyo seini. Netegahan te Timanem te kenà ini kebolalaw.

21 Peglekat ko doton te Jerusalem, dimeleg a doton te Sirya aw doton te Silisya. 22 Yan se doun te wedà kilala kanak se kedita te otaw nemenal ki Cristo doton te Judiya, so wedà a dan lumun kitai. 23 Meneng dinineg dan olò diyà te menge doma otaw eg-ikagi, “Kedengan, se otaw sida, ontò din egpemilangen se kedita tadon egpemenal ki Jesus. Ibeg din kedengan, ipeimatay se kedita tadon, meneng songkani sikandin den ekon se migtoladà te pegpemenal ki Jesus.” 24 Yan se doun te dimuyun dan te Timanem, so nemenal a den ki Jesu Cristo.