1 Chiyru raipy Jesús laadeb:

—Per quɨt rdxibtɨ. Gulchaldilaaz Dios ne gulchaldilaaz nare. 2 Rut rbez Xtada Dios quesentiand sroo ná rut cuez bniety. Te pur belati quɨt calí náti, quɨt niniitia laat chaganzaaca rut cueztɨ. 3 Chi agüeganzaaca rut cueztɨ, chiyru guelda stuby par chanía laat, te par suguaat ruttiziac suguaa. 4 Laat anántɨ calí cháa, ne anánzactɨ nez par idzɨntɨ ruy.

5 Chiy raipy Mally laany:

—Dad, niclɨ quɨt gannɨ calí chiabiu. ¿Xólesa gacbeen xi nezqui rzeetbiu?

6 Jesús cuaibny:

—Nareniy nezqui, ne didxldí, ne guelnabány. Quesoltisy pur nare zelee idzɨny bniety rut rbez Xtadnɨ Dios. 7 Belati rumbeet naa ziyza rumbeet Xtada. Ne desde anre arumbeetny pur ni agunátny.

8 Chiy raipy Liby laany:

—Dad, bsaanbiu inián Xtadnɨ Dios par idxaannɨ cunformɨ.

9 Chiyru raipy Jesús laab:

—Liby, agulaliy zuguaníaa laat ne, ¿ta axt an gady gumbeetiu naa? Elquɨ ni aguná naa, agunázacbɨ Xtadnɨ Dios. ¿Xínii rniiu nare isaana iniát Xtadnɨ Dios? 10 ¿Ta quɨt reldilaazu dec rbeznía Xtadnɨ Dios, ne laany rbeznény naa? Irate ni rniia laat quɨt rniitiani pur xgabzia sino que lagac Xtadnɨ Dios ni rbeznía, laaniy runny ni rguiaat runa. 11 Gulchaldilaaz dec rbeznía Xtadnɨ Dios, ne laany rbeznény naa. Bel quɨt reldilaaztɨ, gulchaldilaaz pur de ni agunát runa. 12 Rguixtiia lot, ni reldilaaz nare zunbɨ zec ni cayuna, ne axt mazru ni gúnbɨ pur ni acháa rut rbez Xtadnɨ Dios. 13 Ne irate ni inaabtɨ lo Dios pur naa, nare zunani ax pur Lliin Dios yíany xa ná guelrnabee xte Dios. 14 Xitill ni inaabtɨ lo Dios pur naa, nare zunani.

15 ’Belati rcaaztɨ nare, scuadiagtɨ xtiidxa. 16 Ne nare snaaba lo Xtadnɨ Dios par ixiaaldny stuby ni gacné laat, ni suguanétec laat. 17 Ne laaniy Spíritu Sant xte Dios. De ni quɨt reldilaaz Dios, quɨt xo cueznétideb Spíritu Sant, pur ni quɨt rumbeedeb ne quɨt racbeedeb túngui Spíritu Sant. Per laat rumbeetny pur ni zuguanétny, ne chi gueedny sbeznétny iduibte ni ibánytɨ lo guɨchliuré. 18 Nare quɨt isanbzaibtia laat te pur sbíigac suguanía laat. 19 Astuudxzi aquɨtru iniáti de ni quɨt reldilaaz Dios nare, per laat sniát nare. Ne zec ni napa guelnabány ziyza zaadtɨ guelnabány. 20 Dxiqui gacbeet dec rbeznía Xtada, ne laat rbeznét naa, chiy naa rbeznía laat. 21 Elquɨ ni zéne cuend xtiidxa, ne runbɨ zec ni rniia, ziy xquel ríeny dec guldípacbɨ rcaazbɨ naa. Ni rcaaz nare scaazza Xtada laab, ne scaazzacab, ax ziy xquel gacbeeb tú nare.

22 Chiy Judas, (per gati Judas Iscarioteti) raipy laany:

—Dad, ¿xínii duntisnɨ gacbeen tú laabiu? ¿Xínii quɨt gacbee ira bɨnguɨchliu tú laabiu?

23 Jesús cuaibny:

—Ni rcaaz nare, zunbɨ cuend ni rniia, ax scaaz Xtada laab. Chiy nare cun Xtada yiopldeznénbɨ. 24 Elquɨ ni quɨt rcaaz naa, quɨt runtib cuend ni rniia. Ne de diidx ni caguindiagtɨ rniia, gati xtiidxtiani, xtiidx Xtada ni bxiaald narenni.

25 ’Caniitellga laat irate de cosquɨ laga zuguaníaa laat. 26 Per Spíritu Sant ni ixiaald Xtadnɨ Dios pur nare par gacnény laat, laany iliuuny laat irate ne isenelaazzacny laat irate ni aguniia laat.

27 ’Chi azaa sguaada laat guelnaldiulaaz, per quɨt caniitiani zeczi ni rnii bɨnguɨchliuni, te pur nare snɨɨdxani laat. Pur ningui quɨt chúut guelrsaa niclɨza quɨt idxibtit. 28 Abindiagtɨ ni guniia laat, záa per sbíigac yaicquia par suguanía laat. Belati guldípactɨ rcaaztɨ naa, laat saclaaztɨ chi gucbeet dec cháa cun Xtadnɨ Dios te pur laany rnabeeny naa. 29 Acaguixteetellga lot anre, te par chi gac ziy ax chaldilaaztɨ nare.

30 ’Astuudxzi güenía laat diidx te pur azéed ni rnabee lo guɨchliuré. Masquɨ quɨt rnabeetib naa, 31 per ná par gac zec ni ná par gac, par gacbee bɨnguɨchliu dec rcaaza Xtadnɨ Dios, ne cayuna zec ni bxiaaldny nare gúna.

’Gulchasú, gultoo.