1 De fariseu gucbeedeb dec mazru zieny xpɨny Jesús ne mazruza catiubnisny de bniety que Juany, 2 (masquɨ ni nápacni gati Jesústi rtiubnis bniety sino que de xpɨnny). 3 Ne pur ni gucbeedeb ziy ningui ax bdiia Jesús nez Judea par zény nez Galilea stuby.

4 Per chi zény nez Galilea napny que gudeedny nez Samaria. 5 Ax bdzɨnny tuby guɨdx xte Samaria rut lá Sicar, gax lo liu ni bguaad to Jacob llingaanbɨ to Gusé. 6 Ruy ná bzia ni rniideb, bzia xte Jacob. Ne cun Jesús abdxany cazany ax guriny ruu bziaqui zéedti gac laidxi. 7-8 Chiy de xpɨnny güedeb láani guɨdxqui par güesiideb ni iquiindeb. Horqui ax bdzɨny tuby gunaa Samaria ruu bziaqui zeldeeb nis, ax raipy Jesús laab:

—Bguaad nare duudx nis.

9 Per cun de bniety Israel quɨt rchaatideb de bniety Samaria, ax cuaby gunaaqui lony:

—Bɨny Samaria nare ne, ¿xílesani rnaabbiu nis luaa ne bniety Israel laabiu?

10 Chiy raipy Jesús laab:

—Belrulati racbiiu ni rcaaz Dios inɨɨdxny liú, ne belrulati racbiiu tú canaab nis liú, liú snaabu nis nare ne nare snɨɨdxa liú nis ni rguaad guelnabány.

11 Chiyru raipy gunaaqui Jesús:

—Dad, niclɨ quɨt xi caabiu par cuéebiu nis, ne bziac quesentiand guétni. ¿Calílesa chacáabiu nis ni rguaad guelnabány? 12 Bziac desdɨ to xpɨngulnɨ Jacob bsannény dunnɨ, ne lagac nisquɨ bquiinbɨ ziyza de lliinbɨ cun de ladxaa xtendeb. Anre, ¿tatix mazru sacbiu que laab?

13 Chiy raipy Jesús laab:

—Irate de ni rée nisquɨ rdxágacdebni stuby. 14 Per elquɨ ni guée nis ni ideeda, quɨtru chúuti dxi idxábni. Te pur nis ni ideedab zacni nez láanbɨ zec tuby rut quɨt rbezti rachy nis, ax anapbɨ guelnabány par chazy.

15 Chiyru raipy gunaaqui laany:

—Dad, bguaadbiu nare nisqui par quɨtru ibíiti idxaa nis, niclɨza quɨtru guedldéetiani ruc.

16 Jesús raipy laab:

—Quegüetɨdx chialu, chiyru gueedu.

17 Gunaaqui ax cuaibbɨ:

—Quɨtti chiala.

Chiyru raipy Jesús laab:

—Guldícu quɨtti chialu 18 te pur aguc gaay chialu ruu, ne anre bniety ni rbezníu niclɨ gati chialu racbɨ. Pur ningui, didxldíc ná ni rniiu.

19 Chi bindiag gunaaqui ziy, ax raipbɨ laany:

—Dad, rdxaluaa dec laabiu nábiu tuby profet xte Dios. 20 De to xpɨngul gulalnɨ quia danyquɨ btodeb Dios, per laat ni nát bniety Israel rniit dec Jerusalén ná par iton Dios.

21 Jesús ax cuaibny:

—Gunaa, güeldilaaz nare dec teru idzɨny dxi ni itot Xtadnɨ Dios sin quɨt gueedtit niclɨ quia danyquɨ niclɨza Jerusalén. 22 Laat niclɨ quɨt gántɨ tú rtot. Per dunnɨ nanchuun tú rton te pur lo de bniety Israel zá ni gún perdón bniety. 23 Ne anacre abdzɨny dxi ni irate de ni guldípac rto Dios, stodebny zec ni riáld pur Spíritu Sant xtenny. Te pur ziy rcaaz Xtadnɨ Dios gún de ni rto laany. 24 Dios ná Spírit ne de ni rto laany ná par itodebny dibyquia dibylaazdeb pur Spíritu Sant.

25 Chiyru raipy gunaaqui Jesús:

—Nare nánna dec ná par gueed Mesías ni láza Crist. Ne chi gueedny laany quixteeny lon irate.

26 Jesús raipy laab:

—Nareniy Crist ni rzeetu, laaniy caninény liú.

27 Horqui ax bdzɨny de xpɨnny ne bdxalodeb pur ni cayuenény tuby gunaa diidx. Per nic tubydeb quɨt ninabdiidxti laany xi rcaaz gunaaqui, o xiy cayueedeb. 28 Chiy gunaaqui bsáanacbɨ rii xtenbɨ ruu bziaqui, ax zégacbɨ láani guɨdx rut güegatsbɨ de bniety:

29 —Gultaguiaa tuby bniety ni agunii naa irate ni abaania. ¿Ladxa gati laabɨy Crist?

30 Chiyru bdiiadeb láani guɨdxqui par güedeb rut zuguaa Jesús. 31 Per lalzi ni zé gunaaqui láani guɨdxqui, de xpɨny Jesús raipdeb laany:

—Maistrɨ, bquiinbiu.

32 Per laany raipny laadeb:

—Nare a ni iquiinia rápa, per quɨt gántit xa náni.

33 Ax guzulo rnabdidxsaa de xpɨnny:

—¿Ladxa nuu ni bdeed xi bquiinny?

34 Chiyru raipy Jesús laadeb:

—Guelrquiiny xtena ná gúna zec ni rcaaz Dios ni bxiaald nare, ne yaloza gúna ni guniiny gúna. 35 Laat rniit: “Rieedx stap búiu par sulo gac de cosech.” Per nare rniia laat: Guldiaslo, gulguiaa lo de yáan aguld idopni. 36 Ne bniety ni rtopni, rcáab ni riáldbɨ pur dzɨɨny ni runbɨ. Chiy de cosech ni rtopbɨ a ná par rut nuu guelnabány par chazy. Ziy xquel ax zeclɨ ni rzibinni ne zeclɨza ni rtopni tubylote rzaclaazdeb. 37 Didxldíquɨy ni rnii bniety: “Irɨny ni run dzɨɨny chiy irɨny ni rtop de guelnazaac.” 38 Nare bxiaalda laat par chatoptɨ de guelnazaac rut niclɨ quɨt baantit dzɨɨny. Irɨnquɨ de ni baany dzɨɨny, chiy laat güetop, güetopzit de guelnazaac rut baandeb dzɨɨny.

39 Zieny de bniety Samariaqui güeldilaaz Jesús pur xtiidx gunaaqui, chi raipbɨ laadeb: “Aguniiny nare irate ni abaania.” 40 Pur ningui, chi bdzɨny de bniety Samariaqui rut zuguaa Jesús ax banlasdeb lony par suguanény laadeb. Chiy guzuguanény laadeb tiop dxi. 41 Ne mazru ziendeb güeldilaaz laany chi bindiagdeb ni rniiny. 42 Chiyru raipdeb gunaaqui:

—Anre agati purzíti ni guniiu dunnɨ roldilaaznɨny sino que pur ni lagac dunnɨ abindiagnɨ ni rniiny. Ne nanldín dec laaniy Crist ni run perdón bniety guɨchliu.

43 Chi gudeed tiop dxiqui, Jesús bdiiany nez Samaria ax güelaaru zény nez Galilea. 44 Masquɨ lagac laany guniiny dec nic tuby profet ni rnii xtiidx Dios quɨt ráptideb didxdoo laab ladxbɨ, 45 per chi bdzɨnny nez Galilea, de bniety nezqui güenquɨ baandeb recibirny. Te pur güézadeb laní pascu Jerusalén ax gunádeb irate ni baanny lo laníqui.

46 Chiyru gubíi biecqui Jesús Caná tuby guɨdx xte Galilea, rut baanny guctegac nis vin. Ne guɨdx Capernaum guu tuby xpɨny rey ni racxú tuby lliinni. 47 Chi gucbee xpɨny reyqui dec abdzɨny Jesús nez Galilea xte ni bzany nez Judea, ax güeb rut bdzɨnny ne banlasbɨ lony par chasiacny llingaanbɨ ni apacmer gaty. 48 Ax raipy Jesús laab:

—Laat axt bel quɨt iniát xi de seny o de milagrɨza, quɨt chaldilaaztɨ.

49 Per xpɨny reyqui cuaibbɨ:

—Dad, gueeldzi quedaabiu anste gaty llingaana.

50 Chiyru raipy Jesús laab:

—Quebiecqui lizu. A llingaanu anuzaac.

Bnietqui güeldilaazbɨ xtiidx Jesús ax zíagacbɨ lizbɨ. 51 Chiy lalzi ni zíab ax güechalo de xmosbɨ laab, raipdeb laab:

—A llingaanbiu anuzaac.

52 Chiy gunabdiidxbɨ laadeb xorti guzulo ruzaac lliinbɨ, ax raipdeb laab:

—Nay zecti rca tuby gudxi gubicá xliaaqui.

53 Chiyru biab bnietqui cuend dec hóracquiy raipy Jesús laab: “A llingaanu anuzaac.” Ax laab ne irate de xfamilbɨ güeldilaazdeb Jesús.

54 Niy guc ni rrop milagrɨ ni baany Jesús nez Galilea chi bzany nez Judea.