81
Bab-Dummad e-dulamargi nueddaed
Namakmalad-e-iduedga sogleged:
Igi uva-nis-egurelealir gar-ogorledae, abali, namaklegoye.
Asaf, we-namaked narmaksad.
1 Bab-Dummadga weligwaledgi namakmala, e anmar-ogannogedid.
Jacob-e-Bab-Dummadga binnasuli weligwaledgi namakmala.
2 Namakmala, gar-pandero ogormala,
gar-lira ogormala, gar-arpa ogormala.
3 Nii-binid-gwisgunonikidgi, gar-trompeta ogormala.
Nii-dalu-naidgi anmar-iba-dummad-guedgi, gar-trompeta ogormala.
4 Ar weyob-imakoye Bab-Jehová Israel-dulemarga igar uksad,
weyob Jacob-e-Bab-Dummad igar mesisad.
5 José-wagan Egipto-yargi noargu,
Bab-Dummad José-waganbo igar mesisad.
6 Dule-sunmaked an itosad, an wissulid, doa anga sunmake.
Anga weyob soged:
“Be-gukingi be ibmar-ukusulid-semaid an bega osulosad.
Arbaed-dummad be imakdiidi an bega obelosad.
7 Bemar suli-suli-itoarmargua, be anse gochamalad,
agine, an be-bendaksamalad.
Mogir-gudureged-imbaba, an be-abin-imaksamalad.
Mar-gollomakmaid-abargi, an be-abin-imaksamalad.
Meriba-dii-naba an bemar-wilubdaksad.
8 ”An-dulamar, an be-owisogega bega ibmar-sogedi, be itomala.
Israel-dulemar, bitigi be an-itosmalana gadin.
9 Bab-dummagan-bamalad be-Bab-Dummadga be imakosurmalad,
bab-dummagan-bamalad-asabin, be yokorgi sindigar sigosurmalad.
10 Ani, an be-Bab-Dummad-Jehová gued.
Ani an Egipto-yargi bemar-onosad.
Guagwar be bukumala,
an bemarga mas-obinebaka ukoed.
11 ”Degi-inigwele, an-dulamar an-itossurmalad,
Israel-dulemar anba ibsabisur gusad.
12 A-ulale, na e-itolegedba-ibmar-imakega an imaksad.
Na e-itolegedba-nanadii gusmarsunnad.
13 ”Ar an-dulamar an-itosana,
ar Israel-dulemar an-igar-mamaidba nanasmalana,
14 an ega e-isdarmalad irgwensuli osulosanad,
an e-isdarmalad sabsur-odurdaksanad.
15 Dulemar-Bab-Jehová-isdar-dakmalad, Bab-Jehová-e-nug bela-bela odummodmaloenad.
Degi-inigwele, an a-dulemar degisadegu sabsur-odurdakoed.
16 An-dulemardi trigo-gwag-bur-nuedgi an oguchaled,
akwamargi-achanis-nanaidgi, immerba-itomalaga an imaksaled.”